Catre Jë Troa Kökötre Ngöne La Huliwa Ne Cainöj
1 Madrine catre la Tretretro së e koho hnengödrai, ngöne la kola kökötre hnene la itre ka nyihlue i Nyidrë e hnine la nyipici. Kolo fe lai a qaja, ka hape, troa kökötr matre troa ketre atre ka macaje troa tro fë la maca ka loi. Celë hi matre, hnei Paulo hna ithuecatre koi Timoteo, ketre qatre thup, troa catre ngöne la qa i angeic matre troa mama la itre huliwa i angeic. (1 Tim. 4:13-15) Haawe, loi e tro asë hi së a thele troa akökötrene hnyawa la atreine së troa cainöje trootro, ketre tune mina fe lo itre ka maca troa qaja la maca ka loi.
2 Loi e Tro Sa Eköthe Amë La Itre Hne Së Hna Ajan Troa Kuca: Maine easa ajane troa kökötre ngöne la huliwa ne cainöj, nyipi ewekë tro sa eköthe amë la itre hne së hna ajane troa kuca. Nemene jë la itre xaa aja nyine tro sa thele troa traqa kow? Maine jë tro sa thele troa maca hnyawa troa xome la taua së ngöne la götrane la ua, ene la Tusi Hmitrötr. (Efe. 6:17) Maine jë hetrenyi fe la ketre aqane cainöj nyine tro sa amacane hnyawa, tune la troa cainöj e cahu gojeny, me jëne telefon, maine pena ngöne la hna huliwa i maseta. Ketre, maine jë ijije tro sa hnëkë hnyawa matre troa hetre thangane ka lolo catr, ngöne la easa bëeke hmaca troa wange la itre atr ka drei së. Ame la ketre ewekë nyine tro sa thele troa eatrën, tre, ene la troa atreine troa nyiqaane inine la Tusi Hmitrötre memine la itre atr.
3 Itre Hna Amekötin: Hna hnëkëne la itre icasikeu ne la ekalesia, ene la Ini ne Cainöje Trootro Qa Thei Akötresie, memine la Icasikeu Ne La Huliwa, matre troa xatua së troa kökötre ngöne la easa cainöje trootro. Qa ngöne lai, maine tro sa catre troa hnëkë hnyawa me sine pala hi la itre icasikeu cili me trongëne la itre mekune ka tru hna hamën, eje hi lai laka tro hë sa kapa la itre manathithi ka tru.—2 Kor. 9:6.
4 Nyipi ewekë mina fe, tro sa itö ixatua matre troa kökötr. (Ite edomë 27:17) Maine tro sa drenge hnyawa la aqane ithanata ne la itre trejine hne së hna ce cainöj memin, tro hë sa kökötre ngöne la huliwa ne cainöj. Ketre, ijije tro la atre xomiujine la ini tusi a thele troa hamë ixatua koi së isa ala caas. Drei la itre manathithi ka tru hne së hna kapa qa ngöne la hna xatua së hnene la ketre pionie ka maca troa cainöj maine ketre trejine pena: laka troa hetre thangane ka loi la hne së hna cainöj, nge troa atraqatre mina fe la madrine së! Hetrenyi kö ngöne la hna ini tusi së la ketre atr ka xötrei cainöj? Maine jë, ijije tro sa sipo angeic troa ce cainöje me easë.
5 Ame la huliwa ka sisitria catre hna kuca enehila, tre, ene la huliwa ne cainöj ne la keresiano. Ame ngöne la easa hamëne koi Iehova la “huje ne atrunyi” tre, nyipi ewekë tro sa nua asë la hne së hna atrein. (Heb. 13:15) Maine tro sa thele troa kökötre ngöne la huliwa ne cainöj, tro hë sa itre atr ka kuca la huliwa “ka pë nyine ahmahman, kola thawa hnyawa la wesi ula ka nyipici.”—2 Tim. 2:15.