Loi e Tro Sa Ahnith Amë La Itre Aja Së Ngöne La Ua
1 Drei la hnëqa me madrine ka tru e troa atrunyi Iehova epine palua! Maine easë a ajan troa eatrën la aja së cili, eje hi lai laka, loi e tro sa canga ahnith amë la itre hne së hna ajan ngöne la ua, me catre troa traqa kow. Kolo lai a aijijë së troa catre huliwa pala hi cememin la inamacan, hmekune lo lai itre aja hne së hna mekun troa eatrën. (1 Kor. 9:26) Nemen la itre aja ka ijije tro epuni a eatrën?
2 Ini Tusi Hmitrötr: Epuni kö a lapaa hane hnëkën la nöjei icasikeu asë? Maine ewekë lai hnei epuni hna kuca, tune kaa, epuni kö a xomi ijin troa sine thele me mekune hnyawa la itre ini hna kapa? Hanawang la ketre ceitun, ame ngöne la epuni a hnëkë troa sin la itre icasikeu, ene la etid ngöne la zonal, La Tour de Garde, memin la Ini Tus ne la ekalesia, hapeu, epuni hi a nyihatren me sija la itre mekun ka sa la itre hnying, maine epuni fe a hane e la itre xötre ne la Tusi Hmitrötr, me mekune hnyawa la itre kepin la itre ini hna hamën? Hapeu, ijije kö tro epuni a ahnith amë me thele ngöne la nöjei wiik la itre xaa hnepe mekun, hna troa xom qa hnin la itre xötr hna amekötin troa isa e ngöne la Ini Ne Cainöje Trootro Qaathei Akötresie? Eje hi lai laka, ketre huliwa ka tru la troa thele traeme ne troa sine thele hnyawa la itre ini ngöne la götrane la ua, ngo aqane huliwa lai ka hetre thangane catr, pine laka, itre manathithi ka tru hna troa kapa qa ngön. —Ite edomë 2:4, 5.
3 Itre Icasikeu Ne La Ekalesia: Ame la ketre aja hne së hna thel troa eatrën, tre, ene la troa hane sine pala hi lo faifi lao icasikeu asë ne la ekalesia. Troa kökötr la ekalesia ngöne la ua, e hne së hna canga traqa troa porotrik memine la itre trejin me easë, me hane ce nyima me angatr me ce nyiqaan me angatr la icasikeu hnene la thith. Loi e tro mina fe së a hane hamë mekun ngöne la nöjei ijin kola icasikeu, me thele troa amacan hnyawa la itre mekune së. Maine jë loi e tro epuni a amaman la itretrengekeu ne la ketre xötr ne la Tusi Hmitrötr hna hamën ngöne la paragaraf, memine la mekun hna ce ithanatan, maine troa amamane pena la aqane troa trongën ngöne la nöjei drai lai mekun. —Heb. 10:24, 25.
4 Cainöje Trootro: Kola kökötre hnyawa la huliwa ne cainöje së, ngöne la easë a ahnith amë la itre hne së hna ajan troa eatrën. Hapeu, hnei epuni kö hna ahnith amë la itre hawa hnei epuni hna ajan troa eatrën, ngöne la epuni a troa cainöj ngöne la nöjei treu? Ame itre xan, angatr a mekun, ka hape, kola xatua angatr, la troa ahnith amë la itre hna ajan troa traqa kow. Maine tune kaa pena, atreine kö tro epuni a maca ngöne la itre xaa hnepe götrane ne la huliwa ne cainöj, maine troa xome la Tusi Hmitrötr ngöne la kola cainöj ngöne la itre hnalapa trootro, me iwai hmaca, maine troa nyiqaane etid memine la itre atr, maine troa atreine ini angatre hnyawa?
5 Itre keme me thin, epuni kö a hane catre xatuan la itre nekö i epun troa hane ahnith amë la itre aja nyine troa eatrën, ngöne la huliwa i Iehova? Xatua angatre jë troa wangatrehmekun ka hape, ame la troa pionie, me mesinare, maine troa huliwa hnine la Bethela, tre, celë hi ketre aqane tro angatre lai a amaman laka, angatr a olen atraqatr koi Iehova la ihnim i Nyidrë. —Ate Cai. 12:1.
6 Maine tro sa goeën la itre huliwa hne së hna kuca, nge easë a thel troa ahnith amë la itre aja hne së hna mekun troa eatrën, nge thupene lai, easë a catre huliwa troa traqa kow, haawe, tro ha atraqatr la madrine së ngöne la easë a nyihlue i Akötresie, nge ketre, tro fe hë së a ketre ithuecatre ka tru kowe la itre xaa atr. —Rom. 1:12.