Tro Nyipunieti a Eatrëne Tune Kaa La Itre Aja i Nyipunie Ngöne La Götrane La Ua
1. Nemene la itre aja ngöne la götrane la ua ka eje thene la itre thöthi Keresiano ka nyimutre?
1 Maine ketre thöthi Keresiano epun, eje hi lai laka hetre thangane jë ngöne la itre aja i epun, la ihnimi epuni koi Iehova memine fe lo itre trenge ewekë i Iesu kowe la itre Keresiano asë, ene la troa ‘pane thele la Baselaia.’ (Mat. 6:33) Maine jë aja i epuni troa hane akökötrene la huliwa ne cainöje i epun, hnene la troa hane pionie maine troa tro pena kowe la ketre götrane gaa aja ka troa cainöjën la Baselaia. Ame itre xan, tre, ma tro angatr a mekune göi troa hane saen troa xupi uma e cailo fen, maine troa huliwa hnine la Bethela, maine troa hane mesinare. Drei la itre itre aja ka lolo catr!
2. Nemene la ka troa xatua epuni troa eatrëne la itre aja i epuni ngöne la götrane la ua?
2 Ame la ketre ka troa xatua epuni troa eatrëne la itre aja i epuni ngöne la götrane la ua, tre, ene la troa cinyihane itre ej. Hna qaja ngöne la zonal La Tour de Garde ne 15 Julai 2004, ka hape: “Kola nualai hnyawa la ketre mekun ka hajihaj, ngöne la [epuni] a xome la itre hnëewekë troa eköthe lai mekun. Celë hi matre loi e tro [epuni] a cinyihane la itre aja i epuni ngöne la ketre pepa memine la aqane troa eatrëne itre ej.” Ketre, tro la itre hnepe mekune hnei epuni hna aeatrëne hë a xatua epuni troa kökötre ngöne la ua, me catre traqa kowe la itre aja ka tru.
3. Qaja jë la itre xaa hnepe mekun nyine tro ketre atr a eatrën matre ijije troa hane xome la Bapataiso.
3 Itre Hnepe Mekune Nyine Troa Nyiqaane Eatrën: Maine thaa hna bapataiso epuni petre kö, wange jë la nyine troa kuca matre troa hane eatrëne lai aja cili. Maine jë nyipi ewekë troa trotrohnine hnyawa la itre ini qa hnine la Tusi Hmitrötr. Maine eje hi, loi e pane aja lai nyine troa eatrën, ene la troa etid jëne la itus Ini Tusi Hmitrötr, me xome asë la itre xötr ne la Tusi Hmitrötr hna hamën. (1 Tim. 4:15) Loi e tro fe a eje la ajane troa e asë la Tusi Hmitrötr qaane la Genese uti hë la Hna Amamane, tune la hna amekötine kowe lo itre ka mele e hnine la Bethela me kowe lo itre ka ini e Gileada. Thupene lai, troa kuca la ketre porogaram göi troa e pala hi la Tusi Hmitrötr e nöjei drai. (Sal. 1:2, 3) Drei la ketre ixatua ka tru elanyi koi epun, troa kökötre ngöne la götrane la ua! Nyiqaane jë me afenesine la itre ijine e Tusi Hmitrötr me inine ej hnene la thith, me thele pala hi troa trongëne la itre hnei epuni hna inin.—Iako. 1:25.
4. Nemene la itre hnepe aja nyine troa eköthe amë hnene la Keresiano, ka ajane troa hane huliwa elanyi hnine la Bethela maine troa mesinare?
4 Maine hna bapataiso epuni hë, nemene la itre aja nyine tro epuni a eatrën? Hapeu, epuni kö a ajan troa amacane la aqane tro epuni a cainöj? Drei la ketre ceitun, ijije kö tro epuni a eatrën la mekune celë matre troa maca hnyawa troa xome la Wesi Ula i Akötresie ngöne la hna cainöje trootro? (2 Tim. 2:15) Tro epuni a akökötrene tune kaa la huliwa ne cainöje i epun? Eköthe amë jë la itre hnepe aja hnei epuni hna mekune troa eatrën, thenge la macatre i epun, me aqane mele i epun; nge tro lai troa xatua epuni troa eatrëne la itre aja ka tru elany.
5. Nemene la aqane xatuane la ketre trejine hnene la itre hnepe mekune hnei angeic hna eköthe hë, troa hane eatrëne la aja i angeic, ene la troa huliwa hnine la Bethela?
5 Ketre Ewekë Ka Hetre Thangane Ka Loi: Hnei Toni ketre thöthi ka 19 lao macatre hna hane ihamë hnine la Bethela ne la Itretre Anyipici Iehova; ene pe hane jë hi cia la aja e kuhu hni angeic troa hane huliwa hnine Bethela. Ngo ame pe isazikeu kö la aqane mele i angeic memine la aja i Iehova, nge ketre, thaa ka hane pala kö angeic sa xepu koi Akötresie. Haawe, Toni a thele jë troa trongëne la itre jë i Iehova ngöne la mele i angeic, me eköthe la aja i angeic troa hane xome la Bapataiso. Thupene la hnei angeic hna eatrëne la aja i angeic, ene la troa bapataiso, haawe, angeic a cinyihane ju ngöne la idrai i angeic la ijine tro angeic a nyiqaane xome la huliwa ne pionie ka ixatua, nge thupene lai troa pionie lapaa. Drei la madrine i angeic, ngöne la kola hë angeic troa hane huliwa hnine la Bethela thupene la hnei angeic hna pane xome la huliwa ne pionie!
6. Nemene la troa xatua epuni troa eatrëne la itre aja i epun ngöne la götrane la ua?
6 Ame la epuni a pane thele la itre aja ne la Baselaia, ijiji epuni fe troa hane eatrën la itre aja i epuni ngöne la götrane la ua. Nue pi “la nöjei huliwa i ’ö” xajawa i Iehova jëne la thithi, nge catre pi troa eatrëne hnyawa itre ej.—Ite edomë 16:3; 21:5.