Itre Thöth—Tuneka La Itre Aja i Epuni Ngöne La Ua?
1 Atre hi Iehova laka, jëne manathithi nge nyipi ewekë la huliwa ne cainöj, ketre tune mina fe la itre hna mekune kow, laka, ijije hi troa eatrëne itre ej. (Wange ju la Genese 1:28; 2:15, 19.) Ame enehila, hnei Iehova hna upe la nöje i Nyidrë troa cainöje me inine la nöjei atr. Hetrenyi the së la aja ka sisitria, ene la troa mele epine palua ngöne la paradraiso. Ketre, loi e tro fe së thele trongëne hnyawa palahi la itre aja së ngöne la ua, e xele së elanyi troa huliwane menune la trengecatre së me itre mo së.—1 Kor. 9:26.
2 Itre Hna Mekune Kow Ka Ijije Kowe La Itre Thöth: Loi e tro la itre thöthi a xome la itre hna mekune kow ngöne la ua ka ihmeku memine la isa hnei angatre hna atreine kuca. (1 Tim. 4:15) Ame itre xaa nekönatre ka co catr, hnei angatre hna eatrëne la mekune i angatr, ene laka, atreine hë angatre e gufane la itre tusi ne la Tusi Hmitrötr, ngo thatreine pala kö angatre e tus. Jëne la ini tusi ne la fami, itre nekönatre a inine troa hnëkëne la itre icasikeu, matre angatre a eatrëne la itre xaa hna ie, ene la troa hane qeje mekun, me hane kuca la itre hnëqa thatraqai Ini ne Cainöje Trootro Qa thei Akötresie. Ame ngöne la itre nekönatre a ce tro memine la itre keme me thine i angatre ngöne la hna cainöje trootro, haawe, angatre fe a hane inine troa hane anyipicin, me kökötre matre troa hane eatrëne la ketre aja hna lapa fë, ene la troa cainöje trootro ngacama thaa hna bapataisone petrekö. Loi e tro pala hi la itre keme me thine a qaja atrune la enyipiewekëne la troa hane sa xepu me xome la bapataiso hnene la itre nekönatr.
3 Maine ketre thöthi epun, tuneka fe la itre hnei epuni hna mekune kow ngöne la ua? “Mekune ju la ate xupi’ö”, hnene la troa wangatrune la aja ka nyipi ewekë catre kowe la mel. (Ate Cai. 12:1; Sal. 71:17) Tuneka matre hane fe epuni pionie ka ixatua ngöne la itre treu ne epuni a mano qa hna ini? Hane kö epuni mekune troa cainöje ngöne la nöjei drai, ene la troa pionie lapa? Nge tuneka pena matre inine hnei epuni la ketre qene hlapa, nyine troa xatuane elanyi la ketre gurupe ka ithahnatane la qene hlapa cili, maine ekalesia ngöne la teritoare i epun, maine ngöne la itre xaa götrane pena? Nyimutre enehila la itre trejine ka huliwa hnine la itre Bethela, maine ka iwai trootro ngöne la itre ekalesia, maine ka mesinare pena, ame ngöne la angatre petre kö a ini, hnei angatre hna lapa fë la mekun, ene la troa cainöje ngöne la nöjei drai. Tuneka matre hane fe epuni kuca tune lai?
4 Tupathe jë troa xötrethenge la tulu i Iesu, ngöne la epuni petre kö a nekönatr. Ame ngöne la kola 12 lao macatre i nyidrë, nyidrëti fe hë a hane ithahnatane hnyawa la itre mekune ne la ua. (Luka 2:42-49, 52) Maine tro epuni a isa amë hutine la itre aja ka lolo thatraqane la mele i epun, maine troa sipu inine la Tusi Hmitrötr, troa e eje e nöjei drai, me troa ce porotrike pala hi memine la itre keresiano ka macaje ngöne la ua ngöne la itre hna icasikeu me ngöne la hna cainöje trootro, haawe, tro ha xatua epuni troa hetrenyi la atreine troa inine la itre xaa atr lo gojenyi hna xötrëne hnei Iesu, ene la troa cainöjëne la Baselaia i Akötresie.