Loi e Tro Sa Maca Troa Cainöj
1 Hnei Paulo hna ithuecatre troa maca la aqane troa cainöj. Hnei nyidrëti hna cinyihane ka hape: “Catejë eö mate amamai ’ö kö laka hna kapa aloine hnei Akötesie, nge ate kuci huliwa ka pë nyine ahmahman, kola thawa hnyawa la wesi ula ka nyipici.”—2 Tim. 2:15.
2 Thaa hna hnaho së kö memine la atreine troa cainöj, ngo loi pe troa huliwan matre troa maca. Haawe, loi e tro sa ‘catr’ kuca hnyawa la hne së hna atrein matre troa itretre tro fë la maca ka loi ka maca. Ngo nemene la ka troa xatua së?
3 Troa Xomi Ini Qa Hnine La Wesi Ula i Akötresie: Ka hetre thangane la atrehmekune hne së hna kapa qa hnine la Tusi Hmitrötr, ngöne la aqane tro sa maca troa cainöj. Maine tro sa atre hnyawa la itre ini qa hnine la Tusi Hmitrötr, haawe, tro fe hë së a hane “thawa hnyawa la wesi ula ka nyipici.” Celë hi matre nyipi ewekë tro sa thele ijine troa isa inine hnyawa la Tusi Hmitrötr.—1 Tim. 4:15, 16.
4 Ame la ketre jëne troa akökötrene la atrehmekune së ngöne la Wesi Ula i Akötresie, tre, ene la troa “nyipine catëne” la ini qa hnine la Tusi Hmitrötr hne së hna kapa jëne la itre icasikeu ne la ekalesia. (Heb. 2:1) Kola eköthe jëne la itre cainöj kowe la ka alanyim la itre topike ka sisitria thatraqane la huliwa ne cainöj, maine hna kapa pena jëne la itre Ini Tusi ne la Ekalesia. Hetre ini ka lolo catre mina fe hne së hna kapa qa ngöne la Ini Ne Cainöj Qaathei Akötresie, matre troa maca hnyawa troa cainöj. Nge ame ngöne la Icasikeu Ne La Huliwa, tre, kolo mina fe a hamëne la itre mekune ka lolo me iamacanyine la itre xan matre tro sa maca troa tro fë hnyawa la maca ka loi. Ngo maine easa ajane troa kepe thangane qa ngöne la itre icasikeu cili, loi e tro sa hnëkë hnyawa me hane qeje mekune ngöne la itre ijine icasikeu.
5 Itre Mekune Nyine Ixatua: Hnei Paulo hna qaja kowe la itre Keresiano ne la ekalesia ne Filipi, troa trongëne la itre ini hnei angatre hna kapa jëne nyidrë. (Fil. 4:9) Loi e tro mina fe sa hane trongëne la itre ewekë hne së hna kapa jëne la organizasio i Iehova. Drei la ketre ceitun, ame ngöne la zonal La Tour de Garde ne 15 Julai 1988, götrane 15 koi 20, tre, hne së hna atre la itre aqane troa “ahnyipixene” la itre götrane hna majemine cainöje ngön. Thaa kolo hmekuje kö a amamane la aqane troa xome la itre aqane nyiqaane ithanata ka hnyipixe nge ka lolo, ngo kolo fe a amamane koi së hnene la hna cinyihane la aqane tro sa kuca matre tro pala hi la atr hne së hna wang a hmala troa treqe së. Kola eamo së fe troa thele hnyawa la itre atr ka hetre hni ne ajan, me kuca asë la hne së hna atreine troa ithanata memine la nöjei atrene la hnalapa. Maine tro sa trongëne la itre eamo celë, easë hi lai a melëne la itre ewekë hne së hna inin, nge ketre easë fe a maca trootro ngöne la huliwa ne cainöj.
6 Easë kö a xome pala hi la itusi Comment raisonner ngöne la huliwa ne cainöje trootro? Jëne la itre aqane nyiqaane ithanata memine la itre mekune hna hamëne nyine troa sa hnyawa la itre hnying ne la itre atr, ijije hi tro sa inine troa tro fë hnyawa la maca ka loi. Ketre, maine tro sa hnëkë hnyawa matre troa ithanatane la topik hne së hna hnëkëne hë, me troa tro fë la itus nyine troa hamën ngöne la treu, haawe, tro ha hetre thangane hnyawa la huliwa ne cainöje së.
7 Ajane kö epuni troa hetrenyi la itre xaa mekune nyine ixatua matre troa hetre thangane la aqane cainöje i epun? Sipo ixatua jë kowe la atre thupëne la huliwa ne cainöj ne la ekalesia i epun, maine kowe pena la atre xomiujine la Ini Tusi epun. Ijiji së asë hi troa itre ka maca hnyawa troa cainöj, nge ka “thawa hnyawa la wesi ula ka nyipici.” Easenyi hë matre apaatrene pi Iehova la fene ka ngazo celë. Celë hi matre, nyipi ewekë catre tro së enehila a xatuane la nöjei atr asë matre tro fe nyudreni a hane mel, me hane atrune la Akötresi së, ene Iehova.—Ioane 15:8.