Loi e Troa Atreine Thawa Hnyawa La Wesi Ula i Akötresie
1 Ame la angeic a ithanata memine la ketre atr ka tru, tre, “hnei Filipo hna ewekëpi, me amamane koi angeice la maca ka loi Iesu, hna qane ngöne la [ketre] hnepe hna cinyihane cili.” (Ite Huliwa 8:35) Hnei Filipo hna “thawa hnyawa la wesi ula ka nyipici.” (2 Tim. 2:15) Ngo kola öhne hnyawa enehila hnene la itre qatre thup ka wange trongën la itre ekalesia ka hape, nyimutre catr la itre trejin ka thaa xome hmaca kö la Tusi Hmitrötr ngöne la angatr a cainöje trootro. Hane kö nyipunie fe la Tusi Hmitrötr ngöne la hna cainöje trootro?
2 Wesi Ula i Akötresie la trepen la nöjei ini hne së hna tro fë, me itre ewekë hne së hna mejiune kow. (2 Tim. 3:16, 17) Celë hi ka troa aeasenyin la itre atr koi Iehova, me ini angatr la aqan troa mel. Qa ngöne lai, nyipi ewekë tro sa huliwan pala hi la Tusi Hmitrötr ngöne la hna cainöj trootro, ngo thaa tro kö a ithanatan hmekuje ju hi la itre mekun hne së hna ajan troa ifekeun. (Heb. 4:12) Pine laka ala nyimu la itre atr ka thatre pengöne hnyawa kö la Tusi Hmitrötr, nyipi ewekë tro sa e me amaman koi angatr la itre hna amekötin hnin la Wesi Ula, ka troa eatrongën hnyawa la mele ne la atr enehila memine mina fe la itre drai elany.
3 Troa e Mekötin Qa Hnin La Tusi Hmitrötr: Pane tupathe jë epun troa cainöje trootro, nge thaa tro kö xomi watreng. Amë ju la itre itus hnine la ketre trengen ka hmelele, nge tro xome trongëne ju la Tusi Hmitrötr, maine liine ju pena hnine poos ne la trauziz i epun. Celë hi matre ame ngöne la epuni a ithanata memine la ketre atr, xome amamane jë la Tusi Hmitrötr, ngo troa thupën wanga mekune jë lai atr ka hape, easë a tupath troa kuca la ketre cainöj. Cile hnyawa jë hmekun la ka drei epun, matre thaa jol koi angeic troa hane goeën la Tusi Hmitrötr. Pane sipo angeice ju troa hane e catrën la ketre xötr. Troa ketr hnyawa la hni angeic, ngöne la angeic a ketre öhn la hna qaja hnei Tusi Hmitrötr, ngo thaa hnene hmekuje kö la hnei angeic hna dreng jën easë. Eje hi laka, maine easë a ajan troa xatua angeic troa trotrohnin la mekun ka tru ne la xötr, loi e troa amaman la itre hnëewekë ka ihmeku memine la topik hne së hna ithanatan.
4 Caa Xötr Pala Hi e Kola Nyiqaane Ithanata: Ame la easë a ase ibozu, qaja jë ka hape: “Kola thele hnene la itre atr la nöjei pengön ihaji thatraqan la mele i angatr. Tune kaa la mekune i epun, nemen la trepen ka sisitria nge ka ijij troa eatrongëne hnyawa la mele së? [Nue pi troa sa.] Nemen la mekune i epun ngöne la itre trenge ewekë celë? [E jë la Ite Edomë 2:6, 7, nge nue pi troa sa.] Pine laka kola fedre catr la itre atr kowe la inamacane i atr, haawe, ala nyimu catr la itre ka hleuhleu atraqatr, nge ketre kucakuca angatr, ke pëhë mejiun. Ketre hna anyipicin pala hi laka, ame la inamacan qaathei Akötresie, tre, hna mejiune kow, nge ka hetre thangan ka loi kowe la mele së.” Thupene lai, amamane jë la itus hna tro fë, nge ithanatane atrune jë la ketre ceitun hna xom qa hnine ej, ka amaman hnyawa la eloin la inamacan qaathei Akötresie.
5 Hnei Iesu hna xom la itre xötr ne la Tusi Hmitrötr, matre troa xatuan la itre atr ka hni ka menyik. (Luka 24:32) Hnei Paulo hna anyipicin la itre ewekë hnei angeic hna inine kowe la itre atr. (Ite Huliwa 17:2, 3) Troa kökötre la mejiune së memin la madrine së ngöne la hna cainöje trootro, qa ngöne laka, maca hnyawa hë së troa huliwan hnyawa la Wesi Ula i Akötresie.