Pine Nemene Matre Easa Metrötrëne La Mus?

1, 2. (a) Pine nemen matre jole catre koi së troa metrötrëne la itre mus? (b) Nemene la itre hnying nyine tro sa ce wang?

HANE kö nyipunieti öhne la aqane ujë ne la nekönatr, la kola upi nyën troa kuca la ketre ewekë hnei nyën hna xele ma kuca? Ma canga mama ju hi ngöne la ialameke ne la nekönatr, laka, jole catre koi nyën troa idrei. Drenge hi nyën la kola ithahnata hnene la keme me thine i nyën, nge atre hi nyëne laka, tro nyën a metrötrëne la musi nyidro. Ngo ame la, tre, thaa ajane kö nyën troa drengethenge. Hetre ini hna amamane hnene la ewekë ka jole celë, ke, tro eje a traqa fe koi së asë ngöne la ketre ijin.

² Thaa ka hmaloi kö la troa metrötrëne pala hi la mus. Tune kaa, ka jole jë fe kö koi epuni la troa metrötrën e itre xaa ijin la itre ka musi hui epun? Maine jol, tre, thaa nyipunieti hmekuje kö la ka goce hnin hnene lai. Easa mele ngöne la ketre hneijin kola paatre trootro la metrötre ne la itre atr kowe la itre ka cilë mus. Ngo kola qaja hnei Tusi Hmitrötr ka hape, nyipi ewekë tro sa metrötrëne la itre mus hne së hna lapa fen. (Ite Edomë 24:21) Eje hi, nyipi ewekë tro sa ujë tune lai e ajane së troa lapa huti ngöne la ihnimi Akötresie. Qa ngöne lai, hetrenyi la itre xaa hnying nyine tro sa wanga atrune hnyawa. Pine nemen matre jole catre koi së troa metrötrëne la itre mus? Pine nemene matre Iehova a thele la ewekë cili the së, nge nemene la ka troa xatua së troa drengethenge? Kola hapeue koi së la troa metrötrëne la itre mus?

PINE NEMENE MATRE EWEKË KA JOLE CATR LA TROA METRÖTRËN LA MUS

3, 4. Hnauëne laka nyiqaane cia jë la ngazo, nge pine nemene matre ajolë së jë hnene la ngazo ka eje the së troa metrötrën la itre mus?

³ Tro sa pane nango ce wange la lue kepin matre jole catre koi së troa metrötrëne la itre ka cilë mus. Ame la pane kepin, tre, hnene laka, itre atr ka ngazo asë hi së; ame la hnaaluen, tre, ka ngazo mina fe la itre atr ka cilë mus. Hna nyiqaane hë ekö la ngazo thene la atr ngöne lo hlapa e Edena, ngöne la kola cile hnei Adamu me Eva kowe la mus i Akötresie. Haawe, hna nyiqaane fetra hi la ngazo hnene la hna icilekeu. Celë hi matre traqa pi hi koi së enehila la pi icilekeu.—Genese 2:15-17; 3:1-7; Salamo 51:5; Roma 5:12.

⁴ Pine laka itre atr ka ngazo së, haawe canga tro hi a fetra qa kuhu hni së la pi tru me pi draië, ngo ame pe kö la hni ka ipië, tre, maine easa ajan troa eën ej me melëne pala hi, loi e tro sa catre huliwane ej. Thaa hnene kö laka itre macatre ne nyi hlue i Akötresieti hë hne së, tre, thaa tro hë së a hane kei kowe la pi hun me pi tru. Hanawang la ceitune i Kora, ngacama hna traqa la itre itupath ka nyimutre koi angeice ngo hnei angeice hna mele nyipici me ce nyi hlue i Iehova pala hi memine la nöj. Ngo ame ju hi la ketre ijin, hnei angeice hna pi hune fë mekun, ene pe angeic a thele jë troa ithepe mus me icilekeu me Mose, ketre atr ka hni ka menyik nge ka mele ngöne la hneijine cili. (Numera 12:3; 16:1-3) Mekune jë fe së lo ewekë ka traqa koi Uzia joxu; hnei nyidrë hna pi tru me lö hnine la ēnē i Iehova, me thapa menune pena ha la ketre hnëqa ka hmitrötr ngo huliwa pe hna troa cilëne hmekuje hi hnene la itretre huuj. (2 Aqane lapa ite Joxu 26:16-21) Hnene la lue atr celë hna xeni pune qa ngöne la hna ithepe hnëqa. Haawe, wai së fe kö hnene la lue tulu ka ngazo celë, thaa tro pi kö sa ithepe hnëqa me icilekeu. Loi e tro sa catre xome trije qa hnine la itre hni së la pi tru, ke, celë hi ka ajolë së lai troa metrötrëne la mus.

5. Nemene la aqane huliwaane menune la itre atr ka ngazo la musi angatr?

⁵ Ame pena ha la itre atr ka ngazo ka cilëne la itre mus, tre, ketre sipu zö i angatre kö matre kola thaa metrötrëne la mus i angatr. Ala nyimu thei angatr, lo itre ka iaxösisi, maine ka sasaithi tulu la aqane mus, me ithahluë. Eje hi laka ame ngöne la itre xötr atr asë, tre, kola mama laka hna sasaithi tulu pala hi la aqane mus i angatr. (Ate Cainöj 8:9) Hanawang la ketre ceitun, hna ië Saulo hnei Iehova troa joxu, pine laka ketre thupëtresiji ka lolo nge ka hni ka ipië nyidrë. Ngo thupene lai, hnei angeice hna pi tru me zalu; ene pe, angeic a icilekeu ju me Davita, ketre hlue i Akötresieti ka mele nyipici. (1 Samuela 9:20, 21; 10:20-22; 18:7-11) Ngacama Davita la ketre joxu ka sisitria ekö e Isaraela, ngo hnei nyidrëti hna huliwane menune la mus i nyidë, ngöne laka, hnei nyidrëti lo hna atrekënö la föi Uria, atre Heth, me upe la atr cili troa cilë mekene la isi ka catr, ene pe troa humuthi angeic e cili. (2 Samuela 11:1-17) Nyipici, hnene laka ka ngazo la atr, haawe, jole catre koi angatr troa cilëne hnyawa la mus. Nge e thaa metrötrë Iehova kö hnene la itre ka cilëne la mus, tre, tro lai a sasaithi tulu nge tro ha ngazo catr la aqane mus i angatr. Hnene la ketre atre musi ekö e Agele hna qaja la aqane haöthe la icilekeu hnene la itre xaa peen katolik; öni angeic: “Musi hi la hna nyiqaane angazon, ke, e musi caasi hë la atr, tre, tro ha sasaithi tulu menu la aqane mus i angeic.” Celë hi matre, loi e tro sa pane ce wange hnyawa la mekune celë, kola hape: Pine nemene matre loi e tro sa metrötrëne la mus?

PINE NEMENE MATRE TRO SA METRÖTRËNE LA ITRE MUS?

6, 7. (a) Nemene la hna upi së troa kuca hnene la ihnimi së koi Iehova, nge pine nemen? (b) Kola hapeue la hna hape, troa trongëne me kapa?

⁶ Ame la kepine ka sisitria ka troa uku së troa metrötrëne la itre mus, tre, ihnimi, ene la ihnimi së koi Iehova, me koi itre atre lapa eashenyi së, me koi easë kö. Pine laka sisitria catre kö la ihnimi së koi Iehova, haawe, hetre aja së troa kuca la itre ewekë nyine amadrinëne la hni Nyidrë. (Ite Edomë 27:11; Mareko 12:29, 30) Atre hi së laka, hna icilekeu ekö e celë fen hnei Satana memine la musi cile i Akötresie, nge hna thipetrije la emeköti Nyidrëti troa mus. Hna nyiqaane la icilekeu cili e Edena, matre nyimutre kö la itre atr ka ce me Satana, me thipetrije la musi Iehova. Tro pe së a catre sajuëne la musi cile i Iehova. Ame la easa e la itre trenge ewekë ka tru aliene ngöne Hna Amamane 4:11, ene pe itre ej a ketre ju la hni së. Thaa sihngödre kö koi së laka Iehova hmekuje hi la ka ijij troa Musi e koho hnengödrai me e celë fen! Easa cilë göline la musi cile i Iehova, ngöne la easa kapa la mus i Nyidrë ngöne la nöjei drai ne mele së.

⁷ Ame la metrötre cili, tre, kola qaja lo easa canga drengethenge Iehova ngöne la itre götran hne së hna trotrohnin, ke, atre hë së la itre kepin, ngo e thaa trotrohnine kö së nge ka jole koi së troa drengethenge, haawe, ame e cili, tre, loi e tro fe sa kapa. Easa canga drengethenge Iehova, pine laka, easa hnimi Nyidrë. Ngo hetrenyi la itre xaa ijin, troa jole catre koi së troa drengethenge. Ame ngöne la itre ijine cili, tre, easa tune lo nekönatr trahmany, laka, nyipi ewekë tro nyën a inine troa trongëne me kapa la hna amekötin. Mekune hi së lo Iesu a kapa la aja i Keme i nyidrë, ngacama jole catre troa kuca la hna upi nyidrëti troa kuca hnei Tretretro i nyidrë. Hnei nyidrëti hna qaja kowe la Tretretro i nyidrëti ka hape: “Loi pe tha eje kö troa longëtine la hanengëngö, ngo jiniati pe la hanengë i cilie.”—Luka 22:42.

8. (a) Nemene la aliene la hna hape troa trongën me kapa la mus i Iehova enehila, nge nemene lai hna amamane ngöne la itre aliene hni Iehova? (b) Nemene la ka troa xatua së troa drenge la eamo me kapa la ihaji? (Wange ju la itre mekune hna eköhagen ngöne götrane 46-7.)

⁸ Nyipici laka, thaa Iehova kö a isa ithanata meköti koi së isa ala caas enehila; Nyidrëti a xome la Wesi Ula i Nyidrë me iëne la itre atr troa nyi trenge ewekë i Nyidrë e celë fen. Qa ngöne lai, ame itre xaa ijin, easa trongëne me kapa la mus i Iehova hnene la troa metrötrëne la itre atr hnei Nyidrëti hna amë, maine hna acile troa musi hu së. Maine tro sa icilekeu memine la itre atr cili, maine jë hnene la hna xele ma kapa qaathei angatr la itre eamo me ihaji qa hnine la Tusi Hmitrötr, eje hi lai laka, easë lai a akötrëne la Akötresi së. Ame ngöne lo kola nyiulil me icilekeu koi Mose hnei angetre Isaraela, tre, kösë ame koi Iehova, tre, angatre hnyawa hi lai a icilekeu me Nyidrë.—Numera 14:26, 27.

9. Pine nemen matre troa upi së hnene la ihnimi së kowe la itretre lapa easenyi së, troa metrötrëne la mus? Hamëne jë la ketre ceitun.

⁹ Easë mina fe a amamane la metrötre së kowe la mus, pine laka easa hnime la atre easenyi së. Pine nemene lai? Pane mekune ju ka hape, epuni la ketre sooc hnine la ketre trongene isi. Tro epuni a hun, nge troa emelene la trongene isi, e hna caas la itre sooc troa isi, me drengethenge me metrötrëne la hna isa acili atr matre troa elemekene la itre trongene isi. Maine tro epuni a ajolën la trongene isi cili hnene la hnei epuni hna icilekeu, haawe, tro ha hetre ethane la icilekeu i epun ngöne la mele ne la itre sine sooce i epuni asë. Eje hi laka, kola angazone menune la fene enehila hnene la itre trongene isi. Ngo ame pe, tre, hetrenyi Iehova la itre trongene isi ka lolo kowe la itre atr. Kola anyimua qeje Akötresie hnei Tusi Hmitrötr ka hape, “Iehova ne sabaoth.” (1 Samuela 1:3) Nyidrëti la Tane la itre caa lapa ne la itre ua ka ala nyimu catr. Ame e itre xaa ijin, hnei Iehova hna aceitunëne la itre hlue i Nyidrëti e celë fen me itre sooce i Nyidrë. (Salamo 68:11; Ezekiela 37:1-10) Maine hne së hna icilekeu memine la itre atr hnei Iehova hna acile troa mus hu së, hapeu, thaa easë kö lai a kuca la ketre ewekë ka troa hetre ethan elanyi kowe la itre sine sooci së, ene lo itre trejine me easë ngöne la götrane la ua? Ame la kola icilekeu hnene la ketre Keresiano kowe la ketre qatre thup hna acil, tro lai a hetre ethane kowe la itre xan e hnine la ekalesia, nge tro fe angatr a hane drei akötr. (1 Korinito 12:14, 25, 26) Ame ngöne la kola icilekeu la ketre nekönatr, kolo fe a hane akötr me xeni pune lai hnene la hnepe lapa asë. Haawe, hnene la hne së hna metrötr me ce huliwa, easa hi lai a amamane la ihnimi së kowe la atre easenyi së.

10, 11. Nemene la aqane tro la sipu aja së troa kepe manathith, a upi së troa drengethenge la mus?

¹⁰ Easë fe a metrötrëne la mus, pine laka, hetre eloine mina fe kowe la isa mele së. Ame ngöne la Iehova a sipo së troa metrötrëne la mus, tre, Nyidrëti fe a qaja la itre manathith hne së hna troa kapa qa ngön. Hanawange la ketre ceitun, Nyidrëti a upe la itre nekönatr troa drengethenge la itre keme thine i nyudren matre tro nyudren a mele aqeany, nge troa lolo la mele i nyudren. (Deuteronomi 5:16; Efeso 6:2, 3) Nyidrëti a upi së troa metrötrëne la itre qatre thup ne la ekalesia, pine laka, maine thaa hna ujë kö tune lai, eje hi lai laka, troa hetre ethane lai kowe la aqane imelekeu së me Iehova. (Heberu 13:7, 17) Nge Nyidrëti a upi së troa drengethenge la itre musi ne fen matre troa ketre thupë së kö.—Roma 13:4.

¹¹ Tune kaa, easë kö a kapa la mekune laka, ame la easa atre la kepin matre Iehova a ajane tro sa drengethenge, ene pe kolo hi a hane xatua së troa metrötrëne la mus? Qa ngöne lai, loi e tro sa ce wange la aqane tro sa metrötrëne la mus ngöne la köni götrane ka tru ne la mele së.

AQANE METRÖTR E HNINE LA HNEPE LAPA

12. Nemene la hnëqa hnei Iehova hna athipe kowe la trahmany me kem e hnine la hnepe lapa, nge tune kaa la aqane troa cilëne la hnëqa cili hnene la trahmany?

¹² Hnei Iehova kö hna ketre sipu ami trepene la hnepe lapa. Thaa ka isazikeu kö la aqane eköthe Iehova la itre ewekë, tune la hnepe lapa laka, hnei Nyidrëti hna hnëkëne ej matre tro ej a tro loi. (1 Korinito 14:33) Nyidrëti a acile la trahmany nge kem matre troa mus, me ami angeic troa he ne la hnepe lapa. Nge troa metrötrëne hnene la trahmanyi la He e hui angeic, ene Keriso Iesu, me xötrethenge la aqane cilëne Iesu la mus i nyidrë e hune la ekalesia. (Efeso 5:23) Haawe, kola catre xome hnene la trahmanyi la hnëqa i angeic; ngo thaa tro kö angeice a huliwa qene joxune la hnëqa cili, maine calogitre pena, ngo tro pe angeice cilëne cememine la ihnim, me tuluthe hnyawa la aqane troa mel, me thiina ka menyik. Angeic a mekune hnyawa laka ka hetre ifegone la musi cili, nge ka draië catre kö la mus i Iehova hune ej.

13. Tune kaa la aqane tro la föe nge thin a eatrëne la hnëqa i nyiidro me thele troa amadrinë Iehova?

¹³ Ame föe nge thin, tre, nyiidro la ixatua kowe la trahmany. Hetre musi nyiidro fe e hnine la hnepe lapa, ke öni Tusi Hmitrötr ka hape, “hna inine hnei thine i hmunë.” (Ite Edomë 1:8) Ngo eje hi lai laka, ka draië kö lo musi ne la trahmanyi nyiidro. Kola amamane hnene la föe Keresiano la metrötre i nyiidro kowe la musi ne la trahmanyi nyiidro, hnene la hnei nyiidro hna xatuane la trahmanyi nyiidro troa xome hnyawa la hnëqa i nyidrë, ene la troa he ne la hnepe lapa. Thaa eahlo kö a thaipië nyidrë, me iaö nyidrë, maine ithepe hnëqa pena me nyidrë. Ngo nyiidro pe a sajuë nyidrë me ce huliwa me nyidrë. Maine ka isazikeu la mekuna i nyiidro memine la itre mekune hnei nyidrëti hna axeciën, loi e tro nyiidro a fe amamane cememine la hni ka metrötr la itre mekuna i nyiidro, ngo tro nyiidro a thele troa kapa pala hi cememine la hni ka ipië la itre mekun hna axeciën. Maine thaa ka hmi kö la trahmany, tre, maine jë tro nyiidro a cile kowe la itre xaa jol, ngo tro la aqane atreine kapa eahlo la itre mekun hna axeciën, a upe la trahmanyi nyiidro elanyi troa hane thele Iehova.—1 Peteru 3:1.

14. Tune kaa la aqane hamë madrine hnene la itre nekönatr kowe la itre keme me thine i nyudren me koi Iehova mina fe?

¹⁴ Kola madrine la hni Iehova ngöne la kola drengethenge hnene la itre nekönatr la keme me thine i angatr. Nyudreni mina fe a atrune me hamë madrine kowe la keme me thine i nyudren. (Ite Edomë 10:1) Ame koi itre nekönatr ka mele caasi pe hi me kem maine thine pena, tre, caasi pala hi la itre trepene meköti göi idrengethenge nyine troa trongën hnei nyudren; kola atrehmekune hnei nyudren, laka, nyipi ewekë kowe la thin maine keme i nyudren, e tro nyudren a ixatua me ce huliwa e hnine la hnalapa. Troa tingeting me atraqatre la madrin, e hnine la itre hnepe lapa, e tro asë hi la itre atren a eatrëne la itre hnëqa hnei Akötresieti hna isa athipe koi angatr isa ala caas. Kolo hi lai a atrune la Atrekë ewekëne la nöjei hnepe lapa asë, ene Iehova Akötresie.—Efeso 3:14, 15.

METRÖTR E HNINE LA EKALESIA

15. (a) Tro sa amamane tune kaa hnine la ekalesia laka easa metrötrëne la mus i Iehova? (b) Nemene la itre trepene meköti ka troa xatua së troa drengethenge la itre ka elemekene la huliwa? (Wange ju la itre mekune hna eköhagen ngöne götrane 48-9.)

¹⁵ Hnei Iehova hna iëne la Hupuna i Nyidrë matre troa Musi hune la ekalesia i Keresiano. (Kolose 1:13) Ame pena Iesu, tre, hnei nyidrëti hna athipe kowe la “hlue ka nyipici me ka inamacan” troa xatuane la nöje i Akötresie e celë fen troa easenyi koi Iehova. (Mataio 24:45-47) Kola nyi trenge ewekëne la hlue cili hnene la Lapa Ne Xomi Meköt Ne La Itretre Anyipici Iehova. Tune ngöne lo itre ekalesia ne la hneijine i Iesu ekö, kola kapa hnene la itre qatre thup enehila la itre ithuemacany me itre eamo qaathene la Lapa Ne Xomi Meköt; kola kapa mekötin maine jëne pena la itre ka nyi trenge ewekë i angatr, tune la itretre thup ka wange trongëne la itre ekalesia. Haawe, ame hi la easa isa metrötrëne la musi ne la itre qatre thup Keresiano, tre, easë hi lai a drengethenge Iehova.—Heberu 13:17.

16. Nemene lai aliene la hna hape, hna iën la itre qatre thup hnene la uati hmitrötr?

¹⁶ Itre atr ka ngazo la itre qatre thup memine la itre drikona, pëkö ka pexeje e angatr. Hetre tria i angatre fe tu së. Ngo ame la itre qatre thup, tre, celë hi [“itre atr nyine ahnahna,” MN] hna hamëne nyine troa xatuane la ekalesia matre tro ej a cile huti ngöne la götrane la ua. (Efeso 4:8) Hna iëne la itre qatre thup hnei uati hmitrötr. (Ite Huliwa 20:28) Hna tune kaa? Troa mama thene la itre atr cili la itre thiina me aqane ujë hmekune la itre hna qaja e hnine la Wesi Ula hna cinyihane jëne la uati hmitrötre i Akötresie. (1 Timoteo 3:1-7, 12; Tito 1:5-9) Ketre, ame la itre qatre thup ka pane goeën maine ijije tro la ketre trejin a hane qatre thup, tre, angatr a thithi göi troa nue la uati hmitrötr troa ameköti angatr.

17. Pine nemen matre kola petr la föe e itre xaa ijin, ngöne la nyiidro a xome la itre xaa huliwa hnine la ekalesia?

¹⁷ Ame e hnine la ekalesia, maine jë pëkö qatre thup me drikona matre troa kuca la ketre hnëqa hna athipe koi angatr, tune la troa xomiujine la ketre icasikeu göi cainöje trootro. Ame e cili, tre, maine jë tro la itre xaa trejine hna bapataisone hë a xome lai hnëqa. Maine pëkö trejine hna bapataisone hë, haawe, ijije hi troa kuca hnene la itre trejine föe ka maca ngöne la götrane la ua. Ngo eje hi lai laka, maine kola xome la hnëqa hna athipe kowe la trejine trahmany ngöne la hnalapa maine e hnine pena la ekalesia, tre, loi e tro nyiidro a petr.a (1 Korinito 11:3-10) Thaa kolo kö a thaipiën la föe hnene la hna amekötine celë. Kolo pe a amamane hnene la ewekë cili la aqane metrötrëne hnene la itre föe la hna amekötine hnei Iehova göi mus, e hnine la hnepe lapa me e hnine la ekalesia.

AQANE TROA METRÖTRËNE LA ITRE MUSI NE FEN

18, 19. (a) Tro epuni a qeje pengöne tune kaa la trepene meköti ngöne Roma 13:1-7? (b) Tro sa metrötrëne tune kaa la itre musi ne fen?

¹⁸ Kola thele fe hnene la itre nyipi Keresiano troa catre trongëne la itre trepene meköt hna qaja ngöne Roma 13:1-7. Tune la hnei epuni hna e ngöne la xötre celë, kola mama hnyawa laka ame lai “angete musi atraqat,” tre, kola qaja la itre musi ne fen. Iehova a nue la itre musi ne fen, ke, hetre itre hnëqa ka nyipi ewekë hnene itre ej hna kuca, nge kola hane thupëne hnene itre ej matre thaa tro kö a gomegome menu la nöj, nge hetrenyi fe la itre ixatua hnene itre eje hna hamëne nyine loi kowe la mele ne la atr. Easa amamane la metrötre së kowe la itre musi cili, hnene la hne së hna drengethenge hnyawa la itre wathebo. Easa hamëne hnyawa la itre hotre së koi mus, me nyialiene hnyawa la itre pepa hna hamën koi së hnei mus, me trongëne hnyawa la itre wathebo hna acil nyine loi koi së me hnepe lapa së, me itre mo së, maine itre hne së hna hetrenyi pena. Ngo thaa tro kö sa drengethenge la itre musi ne fen, maine itre ej a upi së troa thaa drei Akötresie. Tro pe sa tune la itre aposetolo ekö, ngöne lo angatr a qaja ka hape: “Ijiji huni troa denge thenge Akötesie hune la at.”—Ite Huliwa 5:28, 29; wange ju la itre mekune hna eköhagen, hna hape, “Musi Drei La Nyine Tro Sa Drengethenge?,” ngöne götrane 42.

¹⁹ Easë fe a amamane la metrötre së kowe la itre musi ne fen hnene la aqane ujë së kowe la itre xan. Ame itre xaa ijin, tre, easa cile qëmekene la itre atr ka cilëne la itre mus. Tui Paulo aposetolo, hnei nyidrëti hna cile qëmekene la itre ka mus, ene Heroda Ageripa Joxu, me Feso ketre Gavena. Itre atr ka ngazo catre angatr, ngo hnei Paulo hna ithanata koi angatr cememine la hni ka metrötr. (Ite Huliwa 26:2, 25) Loi e tro sa xötrethenge la tulu i Paulo, ngacama easë ju hë a ithanata kowe la ketre atr ka cilëne la mus, maine ketre polis pena. Ame ngöne hna ini, loi e tro la itre thöth Keresiano a catre troa amamane la aqane metrötre cili kowe la itre ka hamë ini koi angatr, me kowe la itre atr asë ka huliwa ngöne lai uma ne ini. Nyipici laka, thaa tro kö sa metrötrëne hmekuje hi la itre ka kapa la itre ini së; loi e tro fe sa hane metrötre fe ngöne la easë memine la itre atr ka icilekeu memine la Itretre Anyipici Iehova. Canga tro hi a mama kowe la itre ka thaa ce hmi kö me easë la etrune la aqane metrötre së.—Roma 12:17, 18; 1 Peteru 3:15.

20, 21. Nemene la itre xaa manathithi hne së hna kapa qa ngöne la hne së hna amamane la hni ne metrötre së kowe la mus?

²⁰ Thaa tro pi kö sa cile troa amamane la aqane metrötre së. Hnei aposetolo Peteru hna cinyihane ka hape: “Atrunejë la nöjei ate asëjëihë.” (1 Peteru 2:17) Ame la kola öhne hnene la itre atr laka easa metrötrë angatre hnyawa, canga tro hi a ketr la itre hni angatr. Thaa tro kö sa thëthëhmine laka, kolo ha paatre trootro la metrötr enehila hneijine së. Ame hi lai easa amamane la metrötre së, tre, celë hi ketre aqane tro së lai a wanga atrune la hna amekötine hnei Iesu, kola hape: “Ahudumenejë la lai nyipunie qëmeke ne la nöjei at, mate goeëne hnei angate la huliwa ka loi nyipunie ; ame hna atrune la Tetetro i nyipunie e koho hnengödrai.”—Mataio 5:16.

²¹ Ame ngöne la fene ka jidri menu celë, tre, hna hule la itre atr ka hetre hni ka lolo kowe la lai ngöne la götrane la ua. Qa ngöne lai, ame la easa metrötr e hnine la hnepe lapa, me e hnine la ekalesia, me kowe la itre atr ne fen, maine jë tro ha thapa la itre xan me upi angatr troa hane ce tro me easë ngöne la lai. Drei la ketre ewekë ka lolo elany! Nge e thaa easenyi Iehova pena kö hnei angatr, ngo ame pe caa ewekë ka xecie hnyawa koi së. Ame la easa metrötrëne la itre atr, easë hi lai a amadrinë Iehova Akötresie, nge kolo fe a xatua së troa cile huti ngöne la ihnimi Nyidrë. Nga nemene pe kö la ketre manathithi ka tru hune lai?