IXATUA KOWE LA KA HNEHENGAZO

Troa Mele Ka Loi, Nge Pëkö Hnehengazo

Ijije hi tro la inamacane qa hnine la Tusi Hmitrötr a xatua së ngöne la easa hnehengazo. Eje hi laka, thatreine kö la atr troa apatrene asë la itre kepine matre easa hnehengazo. Ngo, atreine hi la Atre Xupi së. Hnei Nyidrëti hna acili Iesu Keriso, matre troa xatua së. Tro nyidrëti elanyi a kuca la itre ewekë ka sisitria catre hune ekö, lo nyidrëti e celë fen. Tro Iesu a:

NYINYINE LA ITRE SINE MEC, TUNE LA AQANE KUCA NYIDRËTI EKÖ.

“Hna traqa fë pi koi nyidrë la itre atr hna tith hnene la nöjei pengöne meci me akötr . . . . Nge nyidrëti a aloinyi angatr asë.”—MATAIO 4:24.

THUANE ME HAMË HNALAPA KOWE LA NÖJEI PENGÖNE ATR.

“Nge tro angat’ [itre hnei Keriso hna troa musi kow] a xupi ite uma me lapan’ it’ ej, nge tro angat’ a eënyi vine me iji wen’ it’ ej. Tha tro kö angat’ a xupi uma, nge kete ate a lapan ; tha tro kö angat’ a eënyi vin, nge tro kete ate a ij.”—ISAIA 65:21, 22.

MUS—TROA TINGETING ME PËKÖ HNA MECIN.

“Ngöne la nöjei drai angeice tro la ate ka meköti a mitefifë [maine, cia lolo] ; nge tro ha tru la tingetinge uti hë pë hë teu. Tro angeic’ a musi qa ngöne la kete hnagejë uti hë la kete hnagejë, nge qa ngöne la hneopegejë uti hë la ite cane la fene hnengödrai. . . . Tro la ite ithupëjia me nyidë a thinemëne [maine, hadrumëne] la hnadro.”—SALAMO 72:7-9.

APATRENE LA ITRE HULIWA KA NGAZO.

“Tro nyidëti a hnime la ate ka aköte me ate pë ewekë, nge tro nyidëti a amelene la ite u ne la ange pë ewekë. Tro nyidëti a amelene la ite u i angate qa ngöne la hna qana angazone memine la hna azekën [maine, isi].”—SALAMO 72:13, 14.

APATRENE LA AKÖTR ME MEC.

“Pë hmaca kö mec, me hleuhleu, me treij, me akötr.”—HNA AMAMAN 21:4.

“IJINE KOLA HNEHENGAZO CATRE LA ATR”

“Kola elë catre la etrune la itre ka hnehengazo, me seseu, me hleuhleu, me akötr enehila.”—Mohamed S. Younis, ketre maseta ka cinyihane la zonal Gallup.

Pine nemene matre nyimutre la itre atr ka hnehengazo? Ame ngöne 2 Timoteo 3:1, kola hape: “Ngöne la itre drai ne la pun, tro ha traqa la itre ijin akötr hna thatreine xomihnin.” Tusi Hmitrötr a amamane la kepine matre kola elë la etrune la itre ka hnehengazo. Hnene la itre thiina ka ngazo ka ej thene la itre atr. Itre ka hnimi angatre kö, me pi tru, me ka pë hni koi Akötresie, me pi isi, me ka tha hnimi sinee kö, me ka thatreine xomihni. (2 Timoteo 3:2-5) Troa nyipune la itre drai ne la pun, ngöne la Iesu Keriso a musi kowe la ihnadro, ke, nyidrëti la ka cilëne la Baselaia i Akötresie e hnengödrai.—Daniela 2:44.