Mekene 4

Akötresie a Thuemacanyi Së La Itre Trepene Mekuana i Nyidrë

1, 2. Hne së hna atre tune kaa ka hape Akötresieti a sa la itre hnyinge ne la itre atr ka nyipi hnying?

KOLA fe amamane hnene la Akötresie ka ihnime la itre trepene mekuana i Nyidrë, kowe la itre atr ka thele Nyidrë cememine la hni ka menyik. Nyidrëti a sa la itre hnyinge ne la itre atr, maine kola qaja la kepine matre, nyidrë a nue la akötr.

² Öni Tusi Hmitrötre ka hape: “Maine eö a thele [Akötresie], tro eö a öhnyi Nyidë.” “Hete Akötesie e hnengödrai ate amamane la ite ewekë ka sihngöd.” “Ke tha tro kö joxu Iehova a kuca la kete ewekë, maine tha hnapane amamane la hanengë i nyidrë kowe la ite perofeta ite hlue i nyidë.”​—1 Aqane lapa ite joxu 28:9; Daniela 2:28; Amosa 3:7.

Troa Xome Ekaa La Itre Mekune Ka Sa La Itre Hnying?

3. Tro së a öhne ekaa la kepine matre, kola nue hnei Akötresie la akötr?

³ Itre eje e hnine la ketre itus ka nyipi ewekë catre koi së, ngöne laka, eje a qatrenge lo itre mekune ka hamëne la kepine matre, Akötresieti a nue la iakötrë, nge kola amamane fe la hna troa kuca hnei Nyidrë matre troa apaatrene lai. Ame la itusi cili, ke, Wesi Ula i Nyidrë, ene la Tusi Hmitrötr. “Qathene la Ua i Akötesie la hna cinyihan’asë, nge nyipi ewekë troa inin, me nyine amekötin, me nyine eamo, me nyine ihajine ngöne la thina ka meköt; mate nyipi meköti la ate i Akötesie, mate hnëkënejë angeice thatraqane la nöjei huliwa ka loi asëjëihë.”​—2 Timoteo 3:16, 17.

4, 5. Nemene la itre ewekë ka aketrepengönëne la Tusi Hmitrötre hune la itre xaa itus?

⁴ Thatreine kö troa aceitunëne la Tusi Hmitrötre memine la ketre itus. Pëkö trenga thoi maine tria pena ngöne la eje a qaja la aqane trongene la mele ne la atr ekö, a thaa ijine xupe hmekuje kö la atr, ngo itre ijine fe qëmekene lai. Ketre nyipi ewekë mina fe eje koi së enehila, pine laka, hnene eje hna perofetane hë la itre ewekë ka traqa ngöne la hnedrai së, me ngöne fe la itre drai ka troa calemi.

⁵ Tusi Hmitrötre hmekuje hi la ka qaja la nyipici, ngöne la aqane trongene la mele ne la atr. Ketre, ame enehila ke, hna e pe hi la itre itusi hna cinyanyine ekö hnene la itre ka feja itus. Ame koi Tusi Hmitrötre ke, nyimutre catre enehila hnei tusi hna cinyihan, ka pexeje maine sine pena: tune la 6 000 lao tusi hna cinyanyine qene Heberu (ene lo 39 lao itus ne la “Isisinyikeu ka hekö”) nge 13 000 lao hna cinyanyine qene Heleni thatraqane la itre keresiano (27 lao itus ngöne la “Isisinyikeu ka hnyipixe”).

6. Pine nemene matre, xecie koi së laka, ka ihmeku hi la Tusi Hmitrötre enehila, memine lo hna cinyihane ekö jëne la uati hmitrötre i Akötresie?

⁶ Ka pucatine asë Akötresie, nge qathene la uati hmitrötre i Nyidrë matre cinyihane jë la Tusi Hmitrötr; ketre, hnei Nyidrëti hna thupëne matre thaa tro kö a atriane hnei ketre xötre atr, la itre mekune i Nyidrë hna fejane hnei wanakoim. Celë hi matre, thaa isazikeu kö la Tusi Hmitrötre së enehila memine lo itre hna cinyihane ekö ngöne la qaan, ene lo itre tusi ka qatrenge la itre mekune i Akötresie. Ame la ketre ewekë ka xatua së troa kapa la mekune cili, ke, ene la itre xaa pepa hna fejane qa ngöne la itre hna cinyihane qene Heleni; kösë thaa traqa ju kö kowe la caa hadredre lao macatre, qa ngöne lo kola nyiqaane cinyihane la itre pane tusi cili, memine la itre xaa hna fejan. Ame pena ha lo itre tusi hna cinyihane hë ekö hnene la itre atr, thaa tru pe kö la itre hna fejane qa ngöne itre eje enehila, nge nanyi catre itre eje qa ngöne la ijine kola xötrei cinyihan.

Ahnahna Qaathei Akötresie

7. Ije Tusi Hmitrötre hë enehila hna hamën?

⁷ Ngöne la mele ne la atr, tru catre hë la itre Tusi Hmitrötre hna salemëne ngöne la fene hnengödrai asë. Hna e enehila la 3 miliare lao Tusi Hmitrötre hna kuca ha. Pëkö ketre itusi ka ceitune memine ej. Nge hna ujëne asë maine sinëne ej, kowe la 2 000 lao qene hlapa. Celë hi matre hna aijijëne la itre atr, 98 koi 100 la etrune ngöne la fene hnengödrai, troa hane e la Tusi Hmitrötr.

8-10. Nemene la itre xaa kepine ka lolo, matre nyipi ewekë troa inine la Tusi Hmitrötr?

⁸ Nyipici, ketre itusi lai ka ketre sipu qaja ka hape, ka xulu eje qaathei Akötresie, nge kola amamane la enyipicine eje hnene la itre aliene eje memine la itre ewekë ka traqa; qa ngöne lai, nyipi ewekë tro së a wangatrune ej.a Ketre, eje mina fe a qeje pengöne la aliene la mel, memine la pengöne la itre ewekë ka traqa kowe la fen, memine fe la pengöne la itre drai ka troa xulu. Pëkö ketre itus ka atreine troa kuca tune lai.

⁹ Nyipici laka, hnei Akötresieti hna nyi jëne la Tusi Hmitrötr, matre troa ithahnata memine la itre atr. Hnei Nyidrëti hna elemekene la huliwa ne troa cinyihane ej, jëne la uati hmitrötr, nge jëne fe la 40 lao atr ka troa fejane la itre mekune i Nyidrë. Qa ngöne lai, Akötresieti a ithahnata koi së jëne la Wesi Ula i Nyidrë, ene la Tusi Hmitötr. Hnei Paulo aposetolo hna cinyihane ka hape: “Ke hnei nyipunie hna kapa la Wesi ula i Akötesie lo hnei nyipunie hna denge qa thei hun, tha hnei nyipunie hna kapa kösë tenge ewekë i ate, ngo Wesi ula i Akötesie.”​—1 Thesalonika 2:13.

¹⁰ Hnei Abraham Lincoln, lo hnaasikisitrine perezida ne Etats-Unis hna qaja göne la Tusi Hmitrötre ka hape, “pëkö ahnahna ka sisitria ka lolo catre hnei Akötresie hna hamëne kowe la atr . . . Maine paatre ju ej, thatreine jë kö së troa atre la loi memine la ngazo.” Celë hi matre, loi e tro së enehila a ce wange la hna qaja hnene la ahnahna ka sisitria cili, ngöne la qaane la akötr, memine la kepine matre Akötresieti a nue ej, nge nemene la hnei Nyidrëti hna troa kuca troa apaatrene ej.

[Ithueamacany]

[Iatr ne la götran 10]

Hna cinyihane la Tusi Hmitrötr, jëne la uati hmitrötre i Akötresie, nyine troa ithuemacanyi kowe la nöjei atr