MEKENE 40
Mekuna i Akötresie Göi Troa Porop Me Wië
Ame la nekönatr a tro troa ini, thine i nyëne a heetrë nyëne la iheetre ka porop, matre tha tro kö a tithi nyëne hnei mec. Nge kolo fe hi lai a amamane ka hape, hna thupëne hnyawa la nekönatr hnei keme me thin. Ceitune hi lai memine la Keme së e hnengödrai, Iehova Akötresie. Aja i Nyidrë tro sa porop, me wië la itre thiina së. Nge ame la easa porop me wië la itre thiina së, easë hi lai a atrunyi Iehova.
1. Kola hapeu la troa porop?
Hnei Iehova hna qaja ka hape: “Nyipiewekë tro nyipunie a hmitrötr.” (1 Peteru 1:16) Ame lai hna hape troa hmitrötr ke, ene la troa wië la thiina, me porop la ngönetrei. Ame la troa porop ke, troa si me heetrë iheetre ka porop, me aporopëne la uma, me loto, me jardin. Nge tro fe a nyidrawane la Uma Ne Baselaia. Itre aqane tro hi së lai a atrunyi Iehova.—2 Korinito 6:3, 4.
2. Nemene la itre hna majemine ka ngazo nyine troa nuetrij matre wië la thiina së?
Öni Tusi Hmitrötr: “Loi e tro sa ahmitrötrë së qa ngöne la itre ewekë ka adrone la ngönetrei së, me mekuna së.” (2 Korinito 7:1) Haawe, loi e tro sa nuetrije la itre ewekë ka ngazo ka adrone la ngönetrei së, me itre thiina së, me mekuna së. Maine easa ajane troa amadrinë Iehova, loi e tro sa nuetrije la itre mekun ka tha ihmeku kö memine la mekuna i Nyidrë. (Salamo 104:34) Ketre, loi e tro fe sa thupëne la aqane ithanata së.—E jë la Kolose 3:8.
Nemene la ka troa adronyi së? Kolo itre ewekë hna majemine kuca ka angazone la mele së, tune la ufi sixa me dorog. Matre loi e tro sa nuetrij itre ej. Ame la atr ka tha ufi sixa me ufi dorog, ke ka egöcatr, nge angeic a metrötrëne la mel, lo ahnahna qaathei Akötresie. Ame la ketre aqane tro sa amamane ka hape, ka wië la thiina së, ke tha tro kö sa huliwane menune la ka hmitrötre së, maine goeë iatr ka sisi pena. (Salamo 119:37; Efeso 5:5) Eje hi, tha ka hmaloi kö tro sa nuetrije la itre thiina ka ngazo cili. Celë hi matre nyipiewekë tro sa sipo ixatua koi Iehova.—E jë la Isaia 41:13.
TROA CE ITHANATAN
Tro sa ce wange la kepin matre ame la easa porop, ke easë hi lai a atrunyi Iehova. Nge tro mina fe sa ce wang la aqane tro sa nuetrije la itre hna majemine ka ngazo.
3. Easë a atrunyi Iehova la easa porop
Kola mama la aja i Iehova troa porop, ngöne lo itre wathebo hna hamën ekö kowe la nöje Isaraela. E jë la Esodro 19:10 me 30:17-19, nge ce ithanatane jë cahu itre hnying:
Tune kaa la aqane mama la mekuna i Iehova göi troa porop ngöne cahu itre xötr?
Nemene la itre nyine tro sa kuca matre tro sa porop?
Loi e tro sa xomi ijin me nue trengecatr, matre aporopëne me nyidrawane la itre ewekë së. Maine lapa ju hë së ngöne la ketre nöj, nge pë ju hë manie së, ngo ijije hi tro asë hi së a porop. Goeëne jë la VIDEO, nge ce ithanatane jë cahu hnying:
Maine ka porope së me ka nyihnyawa ewekë, tune kaa la aqane troa goeë së hnene la itre atr hne së hna cainöje kow?
4. Troa nuetrije tune kaa la itre hna majemine ka ngazo?
Jëne la ixatua i Iehova, ijije hi tro sa nuetrije la itre hna majemine ka ngazo
Atre hnyawa hi la ka ufi sixa me ka xomi dorog ka hape, tha ka hmaloi kö troa nuetrij la itre hna majemine cili. Matre nyipiewekë tro epuni a mekune hnyawane la itre thangane ka ngazo kowe la mele i epun. E jë la Mataio 22:37-39, nge ce ithanatane jë cahu itre hnying: Maine tro la ketre atr a ufi sixa me xomi dorog, nemene la thangan . . .
kowe la aqane imelekeu i angeic me Iehova?
kowe la fami angeic memine la itre atr ka lapa ezi angeic?
Hnëkëne jë la nyine troa kuca.a Goeëne jë la VIDEO.
E jë la Filipi 4:13, nge ce ithanatane jë cahu hnying:
Pine nemene matre ame la easë a isine troa nuetrije la itre hna majemine ka ngazo, ke ka nyipiewekë la troa thith, me inine la Tusi Hmitrötr, me sine la itre icasikeu?
5. Aqane troa isi memine la itre mekun me itre thiina ka ngazo
E jë la Kolose 3:5, nge ce ithanatane jë cahu itre hnying:
Pine nemene matre ijije tro sa qaja ka hape, ame la goeë iatr ka sis, me sexting,b memine la troa huliwane menune la ka hmitrötr, ke itre ewekë lai ka sis qëmekei Iehova?
Pine nemene matre tha tro kö sa mekune ka hape, ka catrehnine palaha la itre wathebo cili hna acil hnei Iehova?
Ijije hi tro sa nuetrije la itre mekune ka sis. Goeëne jë la VIDEO.
Hnei Iesu hna amamane jëne la ketre ceitune la nyine tro sa kuca matre tro palahi a wië la thiina së. E jë la Mataio 5:29, 30, nge ce ithanatane jë cahu hnying:
Tha Iesu kö a qaja ka hape, tro sa akötrëne la ngönetrei së, ngo nyidrëti pe a upi së troa isine matre tha tro hmaca kö sa kuca la itre huliwa ka sis. Nemene la itre nyine tro sa kuca matre troa apatrene trije la itre mekune ka sis?c
Ame la epuni a isine troa apatrene trije la itre mekune ka sis, öhne hi Iehova la itre trengecatr hnei epuni hna kuca. E jë la Salamo 103:13, 14, nge ce ithanatane jë cahu hnying:
Maine epuni a isine troa nuetrije la ketre hna majemine ka sis, tune kaa la aqane tro la itre xötre celë a xatua epun?
E kei hmaca ju epun kowe la itre hna majemine ka ngazo, the cile kö!
Öni itre xan: “Thatreine hnyawa ha ni.” Pane mekune jë la atr ka iwaja. Maine tro angeic a kei, tro hmaca kö angeic a cil me nyinyape hmaca. Ceitune hi lai memine la epuni a kei, me kuca hmaca la itre hna majemine ka ngazo, nge tru hë la itre trengecatr hnei epuni hna kuca. Eje hi, tro epuni lai a kei, ngo the cile kö! Tro kö Iehova lai a xatua epun troa nuetrije la itre hna majemine ka sis.
HNE SË HNA MAJEMINE DRENG: “Thatreine kö ni nu.”
Nemene la xötr nyine tro epuni a amamane ka hape, ijije hi tro Iehova a xatua angeic?
HANE HI LA HNE SË HNA CE WANG
Ame la easa porop, me wië la itre mekuna së, me aqane ujë së, easë hi lai a atrunyi Iehova.
Nyine Amekunën
Pine nemene matre ame la troa porop me thiina ka wië ke, ka nyipiewekë catr?
Kola hapeue la troa porop?
Kola hapeue la troa wië ngöne la aqane mekun me ujë?
ITRE XAA NYINE WANG
Itre nyine troa kuca ka hmaloi, ngacama pëkö manie së.
Nyine Troa Kuca Matre Tha Tro Kö a Tithi Së Hnei Mec—Loi e Troa Wasi Wanakoim (3:01)
Itre mekune ka troa xatua së matre tha tro hmaca kö a ufi sixa.
Itre thangane ka ngazo qa ngöne la hna goeë iatr ka sis.
“Itre Iatr Ka Sis—Poizin Maine Ka Pë Pengön?” (Ita Ne Thup 1 Okotropa 2013)
Hnene la ketre trahmanyi hna isine matre tha tro hmaca kö a goeë iatr ka sis.
“Qëmekene Tro Ni a Cile Catr, Anyimua Kei Ni” (Ita Ne Thup Na. 4 2016)
a Hetrenyi la tane mekune “Comment arrêter de fumer” ngöne lo lai götran hna hape, “Itre Xaa Nyine Wang,” ne la mekene celë. Kola qaja la itre mekun ka troa xatua së matre tha tro hmaca kö sa ufi sixa.
b Ame la sexting, ke kola qaja la troa iupifë message ka ngazo, maine foto, me video ka amamai huliwa ka sis
c Ame göi troa huliwane menune la ka hmitrötre së, goeëne jë la mekene 25 ngöne lo itus Les jeunes s’interrogent. Réponses pratiques (volume 1), hna hape, “Comment arrêter de me masturber ?”