Atre Fe Hi Nyipunie?

Hnauëne laka, kola thë ekö la lue iwaca ne la itre atr hna athip?

Kola qaja hnei Tusi Hmitrötr göne lo lue atr ka kuca la ewekë ka ngazo, nge hna athipe ezi Iesu ka hape: “Ame hnei angete Iuda hna sipo Pilato troa lepe xecie la ite lue ca i angat, me xomi angat.”—Ioane 19:31.

Kola qaja hnene la wathebo i angetre Iudra, ka hape, maine hetre atr hna athip pine kuca la ewekë ka ngazo, “tha tro kö a hnene la ngönetei nyëne hune la sinö’ e jid.” (Deuteronomi 21:22, 23) Maine jë hnene la angetre Iudra hna trongëne la wathebo göne lo itre thupëtresiji hna athipe hnene la angetre Roma. Ke maine troa thë la itre waca ne la itre atr cili, tro hë angatr a canga mec, matre e traqa pë hë lai drai Sabath (lö pë hë la jö), tre ase hë kelemi angatr.

Maine hetre atr ekö ka kuca la ewekë ka ngazo, nge kolo ha troa humuthi angeic, tre troa pane jëi faone la lue iwanakoime i angeic, me lue iwaca hune la isinöe. Ame hë la kola acile la isinöe, tre kolo pë hë a nue angeice pi troa thip, me meci hnei akötr, ke ihul la ijön hmekune lo lai hna jei fao. Maine angeic a ajane troa ahmaloeëne la akötre i angeic, tro angeic a waja catrëne la isinöe. Ngo ame hë la kola thë la lue waca ne lai atr, thatreine hë angeice waja la isinöe. Ame hë la pun, ke kolo ha tha mano hnei angeic, maine mec pena hnene lo lai hna thë la lue ca.

Nemene la aqane huliwane ekö la trehle ngöne la hna isi?

Ame la trehle, tre kolo hnei Davita ekö hna xom göi troa lepi Goliatha. Hnei Davita ekö hna inine tha trehle ngöne lo angeic a thupë mamoe, nge nekö trahmanyi petre kö angeic.—1 Samuela 17:40-50.

Easa öhne la trehle ngöne la itre hna peidrëne hnei angetre Aigupito me angetre Asuria. Ame la trehle, tre ca itrapol, nge hna othe ngöne la pune la itrapol la lue sine eno. Nge tro lai ka tha trehle a hnaane la wene etë ka uthautha ngöne la itrapol. Ame la etrune lai wene etë, tre kolo hi a troa tune lo etrune lo wene sa ne bool (5 koi 7,5 cm la diamètre, nge 250 grammes la ehacen). Troa emoemothe lai trehle, matre ame hë la kola nue lai ketre sine eno, tre tro ha catrehnin, me tro meköti hnyawa la wene etë kowe lai ewekë hna ajane troa aeatrën.

Ame ngöne la ketre götrane e Moyen Orient, tre tru pe hi la itre ane trehle hna öhn hmekune lo lai itre götrane hna lapaa isi ekö. Ame lo itre soc ka maca, tre atreine angatr troa tha trehle koi 160 maine 240 km/h. Itre ka inamacane a qaja ka hape, hetre tane la trehle, nge itre xane pena a qaja ka hape, pëkö; ngo casi laka, atreine hi troa lepe humuthe la ketre atr, maine ketre öni pena, hnene la trehle.—Angete Amekötine 20:16.