Aqane Goeëne Akötresie La Ufi Sixa

Öni Naoko: “Eni a atreine troa saze la meleng, ke hnenge hna inine la nyipici göne la pengö i Akötresie, memine la aja i Nyidrë.” Ame la hnei angeic hna inin, tre hna nyitrepene hnene la Tusi Hmitrötr. Ngacama tha Tusi Hmitrötre kö a qeje sixa, ngo eje pe a xatua së troa trotrohnine la aqane goeëne Akötresieti la ufi sixa.a Ala nyimu la itre atr ka xomi trenge catre qa ngöne la atrehmekune cili, me nue me trije la ufi sixa. (2 Timoteo 3:16, 17) Tro sa ce wange la köni ethanyine la ufi sixa hna atre hnyawa hnene la itre atr, me mekuna ne la Tusi Hmitrötr göne itre ej.

KA IMUSINË LA SIXA

Hna nyiköne la tepek hnene la ketre dorog hna hape, nicotine. Ej a ahlën nge eje mina fe a akucakucane la atr ka ufi sixa. Ame la kola ufe la sixa hnene la atr, tre, anyimua hngölëne angeic la nicotine nge canga lapane hi la atuate i angeic. E aca ufe la sixa, kösë ca doz ne nicotine fe lai hna ulum. Matre e ca pake sixa ngöne la drai, tre, kösë 200 lao doz ne nicotine hna ulum. Tru catre kö la doz ne nicotine hna xom jëne ufi sixa hune la itre xa dorog. Pëkö dorog ka tune la. E thatreine hë nue la sixa hnene la atr, troa jole catre la mele i angeic, e tha xome kö angeic la doz ne nicotine i angeic.

Tusi Hmitrötr a xatua së troa hetrenyi la aqane waiewekë ka loi, ngöne la ej a qaja ka hape: “Tha ’te kö nyipunie laka ame la hnei nyipunie hna nue nyipunie kowe troa nyi hluene me denge thenge, ite hlue i angeice nyipunie lo hnei nyipunie hna denge kow?” (Roma 6:16) Maine hna musinëne la mekune me itre huliwa ne la ketre atr hnene la aja ne troa ufi sixa, canga tro hi angeic a kei kowe la ketre aqane ujë ka ngazo. Ngo ame la aja i Iehova Akötresie, tre, tro sa utretr, tha tro kö a musinëne me hnöthi së hnene la itre aqane ujë ka troa angazone la ngönetrei së. Ngo ene mina fe la itre ewekë ka troa adrone la aqane mekuna së. (Salamo 83:18; 2 Korinito 7:1) Celë hi matre, ame la kola kökötre la ole me metrötre ne la ketre atr koi Iehova, angeice hi a atrehmekune laka, Nyidrëti la nyine troa nyihluene hnyawa. Nge thatreine jë kö tro angeic a huujën la mele i angeic ka pexeje koi Nyidrë, e hna othi angeice pala hi hnene lai aqane ujë hna mecin. Celë hi mekune lai ka xatua angeic troa acatrene la aja ne troa cile kowe la itre aja ka ngazo.

Ame Olaf, ketre thupëtresij qa Alema, tre angeic a nyiqane ufi sixa nge 12 petre hi lao macatre i angeic. Kola e la sikisitrine lao macatre ne ufi sixa angeic. Ame la angeic a xötrei ufi sixa, tre kösë lo pëkö; ngo kola tro la itre macatre, nge kösë lo ase hë othi angeic hnene lai hna majemine cili. Öni angeic: “Ame ngöne la ketre ijin hna traqa koi ni la pi ufi sixa ngo pëhë. Eni a tro pi troa hleme la itre cane sixa hna trije hnine la ketre trengene sixa. Thupene lai, eni a xome jë la alien, me atuthe hnei pepa ne zonal. Hmahma catre ni la eni a mekune hmaca lo hnenge hna kuca.” Nemene la aqane trije angeice la sixa? Öni angeic: “Ame la ewekë ka tru koi ni, tre ene la troa amadrinë Iehova. Hnene la ihnimi Iehova kowe la itre atr asë memine la mejiun hnei Nyidrëti hna hamën, hna ithuecatrenge troa trije palua la sixa.”

ETHANE KOWE LA NGÖNETREI

Hna qaja hnene la itus, The Tobacco Atlas, ka hape, ame la troa ufi sixa, tre, kola angazon asë la nöjei götrane la ngönetrei, nge kolo fe a wezipo me meci la itre atr hnei sixa. Atre asë hi së laka, kola tithe la itre atr hnei cancer, me meci fë wenethëhmi, me ngazo la itre idrefitre i angatr hnei sixa. Ngo kola qaja hnene la Organisation mondiale de la santé (OMS) ka hape, kolo fe a tithe la itre atr hnene la itre mec ka ixötrekeu (ka tune lo tuberculose), ke hnene la hna ufi sixa.

Iehova Akötresie a ini së jëne la Wesi Ula i Nyidrë, troa wang atrune la mele së, me ngönetrei së, me mekuna së. Celë hi lai hna hane qaja hnei Iesu Hupuna i Akötresie; öni nyidrë: “Tro eö a aja Joxu Akötesi ’ö hnene la hni’ö ka pexej, me u i ’ö ka pexej, me mekune i ’ö ka pexej.” (Mataio 22:37) Kola mama hnyawa, laka, Akötresieti a ajane tro sa huliwane hnyawan, me metrötrëne la mele së me ngönetrei së . Ame hë la easa atrepengöi Iehova, me atre fe la itre hnei Nyidrëti hna thingehnaean, easa ha madrine me wang atrune la itre hnei Nyidrëti hna kuca thatraqai së. Celë hi ka upi së lai troa utretr qa ngöne la itre ewekë ka angazone la ngönetrei së.

Ame Jayavanth, ketre droketre qa Inde, tre 38 lao macatre ne ufi sixa nyidrë. Hnei nyidrëti hna qaja, ka hape: “Atre hnyawa hi ni la itre engazone la troa ufi sixa, jëne la itre zonal ka qeje pengöne la itre mec. Celë hi kepine matre eni a qaja kowe la itre ka wezipo troa trije la sixa. Ngo ame ni, thatreine pë hë ni troa nue la hna majemine cili, ngacama a faifi me sikisi lao thele ni troa triji sixa.” Nemene hë la ka xatua nyidrë troa triji sixa? Öni nyidrë: “Hnenge hna triji sixa thupene la hnenge hna hane ini Tusi Hmitrötr. Ame la ka upi ni troa triji sixa, tre, ene hi la aja troa amadrinë Iehova.”

ETHANE KOWE LA ITRE XAN

Hna mecin la so ne tepeke hna dreuth, me so ne sixa ka lö qa ngöne la idrefitr ne la atr ka uf. Tru catre la itre föe me itre nekönatr ka meci qa ngöne la hna hngölëne la so ne sixa. Ame ngöne la nöjei macatre, 600 000 lao atr ka meci hnei cancer me itre xa meci ju kö. Kola qaja koi së hnei OMS, ka hape, ngacama co hi la hna hngölëne la so ne sixa i ketre, ngo ka hetre ethane pala hi.

Thenge la hna qaja hnei Iesu, ame la troa hnime la atre lapa easenyi së, memine la hnepe lapa së, me itre sinee së, me itre xaa atr ju kö, tre, hnaaluene pë hë, ngo troa tro pane la ihnimi së koi Akötresie. Öni Iesu: “Tro eö a hnime la ate lapa eashenyi ’ö tui eö hi.” (Mataio 22:39) Maine easa xome la ketre hna majemine ka angazone la mele ne la itre atr ka lapa easenyi së, tha easë kö lai a hnimi angatr. Maine nyipici laka ka ihnimi së, tro sa trongëne la eamo qa hnine la Tusi Hmitrötr ka qaja ka hape: “The tro kö kete a thele la loi i angeice kö, loi pe la loi i kete ate kö.”—1 Korinito 10:24.

Öni Armen, ketre thupëtresij qa Arménie ka hape: “Hnene la itre atrene la hnepe lapange hna sipo ni troa trije la sixa, ke asesë hë lepi angatr. Xele ni ma jelenyipicine ka hape, ka hetre thangane ka ngazo koi angatr la eni a ufi sixa.” Ngo hetre ewekë ka sazene la mekuna i angeic; öni angeic: “Hnene la itre ini qa hnine la Tusi Hmitrötr, memine la ihniminge koi Iehova hna xatua ni troa triji sixa, me jelenyipicine laka, ka hetre ethanyine koi ni me kowe la itre ka ce mele me ni la sixa.”

TRIJE PI HË LA SIXA!

Itre ini qa hnine la Tusi Hmitrötr la ka xatua Olaf me Armen troa trije la sixa, ka angazone la mele i nyidro me mele ne la itre xa atr. Atre hi nyidroti la itre ethanyine la sixa. Ngo ame la ka xatua nyidroti hnyawa troa trije la sixa, tre ene la ihnimi nyidro koi Iehova, me aja troa amadrinë Nyidrë. Kola mama la enyipiewekëne la ihnim, ngöne la hna qaja ngöne 1 Ioane 5:3, ke kola hape: “Dei lola aja koi Akötesie, laka eësha denge thenge la ite wathebo i nyidë ; nge tha hace kö la ite wathebo i nyidë.” Eje hi laka, jole e itre xa ijine troa trongëne la itre trepene meköti ne la Tusi Hmitrötr; ngo maine ka tru catre la ihnimi ne la ketre atr koi Akötresie, tha tro kö lai a jole koi angeic troa trongën.

Iehova Akötresie enehila a inine la itre atr qa cailo, matre troa xatua angatr troa trije palua la sixa. (1 Timoteo 2:3, 4) Easenyi hë troa apatrene la itre ka salemë sixa hnene la Baselaia i Akötresie hna musinëne hnei Iesu Keriso, Hupuna i Nyidrë. Tro Nyidrëti a apatren epine palua la sixa me inine la itre atr ka idrei uti hë la troa pexeje me lolo la ngönetrei me mekune i angatr.—Isaia 33:24; Hna Amamane 19:11, 15.

Maine epuni a isiine troa triji sixa, catre pi. Maine tro epuni a inine troa hnimi Iehova, me xom la aqane goeëne Nyidrëti la sixa, tro hë epuni lai a atreine trije paluane la ewekë cili. Madrine la Itretre Anyipici Iehova troa xatua epuni troa atre me trongëne la itre trepene meköti ne la Tusi Hmitrötr. Loi e xeci hnyawa e kuhu hni nyipunie, laka, maine tro nyipunieti a sipone koi Iehova troa ngaane la sixa, tro kö Nyidrëti a hamëne la trengecatre ka ijij.—Filipi 4:13.