Tru La Itre Akötr!

Smita,a la ketre föe hmae (35 lao macatre) qa Dhaka, e Bangladesh, ka ihnim nge ka meku itre xan. Ame koi itre atr ka atre angeic, tre ketre föe lai ka huliwa catr, nge ka ajane troa qaja koi itre xan la hnei angeice hna hane atre göi Akötresie. Ngo, sesëkötre ju hi itre sinee i angeic la kola tithi angeic hnei mec, nge meci ju fe kö, a tha ca wiike ju kö!

Ceitui Smita hi, me James me föi angeic. Ame lai ketre ijin, nyidroti pë hë a tro jë kowe la götrane ahuë ne Amerika, göi troa wang la itre xa sinee. Tha bëeke hmaca ju kö nyidro kowe la hnalapa i nyidro e New York. Kolo pë hë a treije pi nyidro hnei itre sinee me itre sine huliwa i nyidro, ke meci hë nyidro ngöne la ketre akesida.

Easë fe a öhne ngöne la isa nöje së la kola mana la nöjei pengöne ewekë ka ngazo, me ka akötr. Kola ce humuthe la sooc me itre xa atr kö ngöne la hna isi. Kola eatr la itre atr hna lepe menun, maine hna humuthe pena. Sin atr pë hë itre xan qa ngöne la hna akesida, maine hna tithi pena hnei itre mec ka agenyine la ketre götrane la ngönetrei. Kolo fe a hane lepe la itre xa nöj hnene la itre hulö, ka tune lo itre wene. Kola hane akötr la itre xa atr hnene la itre atr ka ië hna hnim, me ka iwangatrehmekunyi atr. Maine jë, hna hane traqa fe koi epuni la itre ewekë celë.

Celë hi kepine matre easa isa hnying ka hape:

• Hnauëne laka kola hane ketr la itre atr ka loi hnene la itre akötr celë?

• Akötresieti kö la atrekë zön?

• Ka traqa xane la itre hulö, maine hnei atr?

• Tha kolo jë kö lo hna hape Karma, laka, easë kö a xeni pun la itre ewekë ka ngazo hna kuca ekö?

• Maine ka mene ju lae Akötresie, hnauëne laka, tha thupëne kö Nyidrë la itre atr ka loi?

• Tro kö a patr la ngazo me akötr?

Lue ewekë nyine tro sa atre, matre atreine jë së sa la lue hnyinge celë; hnauëne la kola traqa la itre akötr kowe la nöjei atr asë, nge nemene la hnei Akötresie hna troa kuca?