Hna Hane Ketr La Itre Atr Ka Loi Pine Nemen?

Itre atr a mekune laka, pine laka, ka mene Iehova Akötresie,a nge Nyidrë la qaane la nöjei ewekë hna xup, haawe, Nyidrëti fe la qaane la nöjei ewekë ka ngazo. Ngo hane hi la hna qaja hnei Tusi Hmitrötr:

• “Meköti Iehova ngöne la ite jë i nyidë asë.”—Salamo 145:17.

• “Meköti asë la ite jë i nyidë ; Akötesie ka nyipici, nge pë engazon, nge meköti me uthautha nyidë.”—Deuteronomi 32:4.​—Deuteronomy 32:4.

• “[“Iehova,” Traduction du monde nouveau] la ate utipine me hnime atraqat.”—Iakobo 5:11.

Tha qaathei Akötresieti kö la itre hulö. Ngo hapeu, zö i Nyidrë la kola kuca la ngazo hnene la itre atr? Ohea. Öni Tusi Hmitrötr: “The tro kö kete ate a qaja e kola tupathi angeic, ka hape, Hna tupathi ni qa thei Akötesie.” Pine nemen? “Ke tha’ teine kö troa tupathi Akötesie hnei ngazo, kete tha hnei nyidëti kö hna tupathi kete ate.” (Iakobo 1:13) Haawe, tha qaathei Akötresieti kö la itre itupath. Tha Akötresieti kö la ka axulune la itre hulö, maine ukune pena la itre atr koi ewekë ka ngazo. Nga drei kö, maine pena, hnei nemene matre traqa pi la itre ewekë ka akötr?

HNA ASESËKÖTRËN

Hane hi la qaane la itre xa akötr, hna qaja hnei Tusi Hmitrötr: “Ame la ijine memine la ewekë ka xulu, te, kola traqa koi angat’ asë.” (Ate Cainöj 9:11) Ame la hulö, ke tha ka ië tha kö; ngo eje pe a asesëkötrëne la atr ngöne la götrane me ijine traqa ej. Ame ngöne lo hneijine i Iesu Keriso, hnei nyidrë hna qaja lo ala 18 hna mala tran hnei ita. (Luka 13:1-5) Tha angatre kö a mec qa ngöne laka, ngazo la thiina i angatr; ngo angatre pe a mec, ke angatr e cili fene la ita, la ej a lapa kötr. Ame lo Januare 2010, hna traqa la sa ka tru e Haiti; ala 300 000 lao atr ka mec, hna e hnei mus. Isapengöi angatre kö, ngo casi la ijine angatr a mec. Itre meci fe la ka lep la itre atr.

Ma tro sa hnyinge ka hape: ‘Hnauëne laka tha kuca kö Akötresie, matre trianyi së kö hnene la itre hulö cili? Hnauëne laka tha thupëne kö Nyidrë la itre atr ka loi?’ Tro Akötresieti a thupë së, e atre hi Nyidrë ka hape, troa traqa la itre hulö cili. Nyipici laka, atreine Akötresie troa canga atre la ewekë ka troa traqa; ngo hapeu, Akötresieti kö a huliwane lai atreine cili göne la nöjei pengöne ewekë?—Isaia 42:9.

Öni Tusi Hmitrötr: “Eje kö e hnengödrai la Akötesi shë ; ase hë nyidëti longëtin’ [öhn] asë la hnei nyidëti hna ajan.” (Salamo 115:3) Tha Iehova kö a huliwane menun la atreine i Nyidrë. Nyidrëti a iëne la hnei Nyidrëti hna ajane troa canga atre. Mekune ju së la hnei Nyidrëti hna qaja koi Aberahama, lo ijine kola hlemu ngazo la thiina ne la angetre Sodoma me Gomora. Öni Nyidrë: “Tro ni a uti enehila me wang, ma hnei angate hna cengöne kuca thenge la hë teije ka xulu koi ni ; nge maine pëkö, tro ni a ate.” (Genese 18:20, 21) Thatre kö Iehova la etrune la ngazo ne la lue lapa. Kolo lai a amamane ka hape, tha Iehova kö a thele troa canga atre la nöjei ewekë asë ka troa traqa. (Genese 22:12) Tha kolo kö lai a qaja ka hape, thatreine kö Nyidrë. Ngo ka “pexeje la huliwa” i Akötresie, celë hi matre, Nyidrëti hmekuje hi a thele troa canga atre la itre ithuemacany ka xatua Nyidrë troa aeatrëne la aja i Nyidrë; ngo tha göi tro kö a musinën la itre atr.b (Deuteronomi 32:4) Kolo lai a hapeu? Akötresieti a iëne la hnei Nyidrëti hna canga pi atre, nge ka nyipi ewekë koi Nyidrë.

HAPEU, ZÖ I ATR?

Ame la kola akötr hnene la atr, tre zö i itre xa atr kö e itre xa ijin. Tusi Hmitrötr a qeje pengöne lai ka iuku koi ewekë ka ngazo. “Hna isa tupathe la nöjei ate e hna huli angate hnene la ite aja i angate kö, me hnihnin. Nge e upune hë la aja, ame hnen’ eje hna hnahonepi la ngazo ; nge e macajë hë la ngazo, ame hnen’ eje hna hnahonepi la mec.” (Iakobo 1:14, 15) Ame la itre atr a kei kowe la ngazo, tre tro angatre lai a menuëne la akötr. (Roma 7:21-23) Kola mama ngöne la mele ne la atr, ka hape, ame la thangane la hna kuca la itre ngazo ka tru, tre itre akötr ka tru. Kolo fe a elë la ngazo, ke ase hë amenune la itre atr me huli angatr kowe la ngazo.—Ite Edomë 1:10-16.

Hnauëne laka, tha sawa kö Akötresie la itre atr troa kuca la ngazo? Pane ithanatane jë së la pengöne la atr. Öni Tusi Hmitrötr, hnei Akötresie hna xup la atr hnaiji Nyidrë, matre atreine angeice nyitipu Nyidrë. Celë hi kepin, matre hetrenyi the së la itre thiina ka loi ka eje thei Akötresie. (Genese 1:26) Hna xup la atr memine la atreine troa ië ewekë; ka tune la troa iëne troa hnimi Akötresie, me trongëne la itre trepene meköti Nyidrë. (Deuteronomi 30:19, 20) Maine Akötresieti ju la ka musi kowe la nöjei nyine tro sa kuca, me kowe la isa aqane troa nyipune la mele së, haawe, gufa ha lo atreine hnei Nyidrëti hna hamë së. Tro pe hi së lai a tune lo itre masiine hna xupe hë thatraqane la ketre huliwa! Madrine jë pe së laka, hnei Akötresie hna nue së troa ketre iëne la aqane tro sa isa mel! Ngo tha kolo kö lai a qaja ka hape, tro pë hë a akötre palua hnene la atr, pine la itre aqane ië ewekë ka ngazo.

ZÖ I KARMA LA ITRE AKÖTR?

Maine tro epuni a köjane kowe la ketre Hindou, maine ketre Bouddhiste lai hnying ka mama ngöne la icetrön la zonal celë, ma tro angeic a sa ka hape: “Kola traqa la itre ewekë ka ngazo kowe la atr, ke pengöne kö la Karma lai. Atr kö lai a kepe thangane la hna kuca ha ngöne la ketre aqane mel, qëmeken tro angeic a atr.”c

Ngo hetre mekune ka lolo hnei Tusi Hmitrötr hna qaja göi mec. Önine la Atre Xupi Adamu e Edena: “Tro eö a xeni qa ngöne la nöjei sinöe asëjëihë ngöne la hlapa ; ngo the tro kö eö a xeni qa ngöne la sinöe ne ate hmekune la loi me ngazo ; ke tro eö a meci ngöne la drai ne xeni eö qa ngön’ ej.” (Genese 2:16, 17) Maine drei Akötresieti ju kö hnei Adamu, tro hë angeic a mele palua. Ngo hnei angeice hna eni wathebo, ene pe fetra jë hi la mec. Ame hë la angeic a hnaho, kolo ha “traqa la meci kowe la nöjei ate asë.” (Roma 5:12) Celë hi kepine matre kola qaja ka hape, “ame la thupene la ngazo, te, mec.” (Roma 6:23) Ngo Tusi Hmitrötre fe a qaja ka hape: “Gufa la ate ka meci hë ene la ngazo.” (Roma 6:7) Kolo lai a hape, e meci hë la atr, ase hë angeice lai nyithupene la ngazo.

Itre milio enehila lao atr ka mekune ka hape, kola fetra la itre akötr, ke hnene lo Karma. Nge ame la atr ka lapaune kowe lai, tre tha qeje jole kö angeic la kola traqa la itre akötr koi angeic, me koi itre xa atr. Kösë lo kola qaja hnene la ini cili, ka hape, pëkö nyin kowe la itre akötr ka traqa koi së. Ngo kola qaja hnene la itre ka lapaune kowe la ini cili, ka hape, tro hi a mele hnene la itre atr ka loi thiina koi itre xan, nge ka hetre atrehmekune ka tru. Isapengöne kö la ini celë memine la hna qaja hnei Tusi Hmitrötr.d

SIPU QAAN

Tha atr kö la sipu qaane la ngazo. Satana Diabolo la ketre angela i Akötresieti ekö ka loi; ngo “tha cile huti kö ngöne la nyipici,” ene pe nyiqaane jë hi la ngazo e celë fen, hnei angeic. (Ioane 8:44) Angeic la qaan lo icilekeu e Edena. (Genese 3:1-5) Angeice la “jifelö [atr ka ngazo],” me “tane celë fene hnengödrai” hna qaja hnei Iesu Keriso. (Mataio 6:13; Ioane 14:30) Fen asë a kei thenge Satana, ke tha pi trongëne kö angatre la itre jë i Iehova ka lolo. (1 Ioane 2:15, 16) Öni 1 Ioane 5:19, “fene hnengödrai asëjëihë a meköle thene la ate ka ngazo.” Hnene la itre xa angela ka hane kuca la ewekë ka ngazo hna tro koi Satana. Celë hi matre Tusi Hmitrötr a qaja ka hape, “Ekölö hi ni la hnadro,” ke Satana me itre dremoni angeic a “amenune la fene hnengödrai asëjëihë.” (Hna Amamane 12:9, 12) Haawe, Satana Diabolo la sipu qaane la ngazo.

Tha Akötresieti kö la qaane la itre ewekë ka ngazo ka traqa kowe la atr; nge tha ka iakötrë kö Nyidrë. Nyidrëti pe la ka troa apatrene la ngazo, tune la hna troa amamane ngöne lai ketre götran.