Ka calogitre ni me pi isi

MELENG EKÖ:

Hna hnaho ni ngöne la ketre götrane ka mingöming, Ciudad Mante la ëjen, ketre traon e Tamaulipas. Ka hame catr nge ka loi thiina la itre atrene la traone cili. Ngo ame pe, ketre götrane ka ngazo catr, ke, hna jilapane hnene la itre atr ka ihumuth.

Ala foa eahun hanekötrahmany, eni hi la hnalueen. Hna bapataiso ni hnei kaka me nenë ngöne la hmi katolik, nge thupene lai hnenge hna hane sine la itre ka nyima ngöne la uma hmitrötr. Eni a thele troa amadrinë Akötresie, ke, xounge catr wanga qeje gelenge jë hnei Nyidrë me dreuthetriji ni ngöne ifereno.

Ame lo kola faifi lao macatreng, kolo hi a tro triji huni hnei kaka. Tru catre la hleuhleung, nge kösë pëhë madrineng. Tha trotrohnine kö ni la kepin matre kakati a nuetriji hun, ngo tru catre pe la ihnimi huni koi nyidrë. Nge ame nenë, pine laka eahlo a hnehengazo huni ala foa, haawe eahlo a huliwa mec, celë hi matre patre pala hi eahlo e celë hnalapa.

Hnene laka patre kö nenë e celë hnalapa, tha jole kö tro ni a kötre qa hna ini, me ce tro memine la itre xa sine ce elong. Hnei angatr hna ini ni troa hane iqaqa, me ufi sixa, me atrekënö, me ijei. Pine laka, ka pi imusinë ni, hnenge hna inine troa ifaitrë me ikuië, me kuci karate, me ikuqany. Eni pe hi a mele ne isi. E ikuqanyi hi, eni pala fe hi e kuhu hnin, nge aija lepi ni jë kö maine meci hë ni, nge ka si madra ni hnene la itre eatreng. Tha nyine qaja kö la hace i nenë ngöne la eahlo a öhnyi ni me canga nyinyape sai ni a tro pital!

Ame la kola 16 lao macatreng, hnei Jorge ketre sineeng hna traqa troa iöhnyi me eahun. Hnei angeice hna qaja koi hun ka hape, ketre atre Anyipici Iehova angeic, nge aja i angeice troa ce thawa me eahuni la ketre maca ka nyipiewekë. Hnei angeice hna xome la Tusi Hmitrötr, matre troa qejepengöne la itre ini hnei angeice hna lapaune kow. Ka tha hane kö ni e Tusi Hmitrötr, ngo eni a madrine atraqatr la eni a atre la ëje i Akötresie, memine la itre aja i Nyidrë. Ame la Jorge a thele troa ini tusi me nyio, nyio hi a ini tusi jë me angeic.

AQANE SAZE LA MELENG HNENE LA TUSI HMITRÖTR:

Madrine catre ni lo eni a atre la nyipici göne la ifereno, laka tha ketre ini kö lai hna xome qa hnine la Tusi Hmitrötr. (Salamo 146:4; Ate Cainöj 9:5) Haawe, patre hë theng la xoue ifereno me xoue Akötresieti menu. Ngo eni pe a goeë Nyidrë tune la ketre Kem ka ihnim, ka ajane la mele ka loi kowe la neköi Nyidrë.

Ame la eni a atre la aja i Iehova ngöne la eni a inine la Tusi Hmitrötr, öhne hnyawa hi ni laka, nyipiewekë troa saze la thiinang. Tha tro hmaca kö ni a isi ngo loi e tro ni a hni ka ipië. Hna xatua ni hnene eamo hna qaja ngöne 1 Korinito15:33, ngöne la kola qaja la itre sinatro ka ngazo, ka hape, itre ka “angazone la thina ka loi.” Atre hnyawa hi ni laka maine ajange troa saze la thiinang, loi e tro ni a nue la itre sinee ka troa ajojezi ni. Celë hi matre, hnenge hna nue la itre sineeng ka ngazo me nyi sineene pena la itre keresiano e hnine la ekalesia. Eni a atrehmekune laka, ame la kola iwesitrë, tha hnei angatre kö hna isi, ngo hnei angatre pe hna thele troa xötrethenge la itre trepene meköti qa hnine la Tusi Hmitrötr.

Hna xatua ni fe hnene la tusi Roma 12:17-19. Kola qaja ngöne la itre xötre celë ka hape: “The të kö la ngazo i kete ate hnei ngazo. . . . E ateine nyipunie, lapa loi ju me nöjei ate asë. Ange hna hnime fe, the të kö la ngazo hnei nyipunie, . . . qa ngöne la ase hë cinyihan: ‘ Öni Joxu kola ulatin, qânge troa të ite ngazo; tro ni a nyi thupen.’ ” Ka xecie hnyawa koi ni laka, tro kö Iehova a amekötine elanyi la itre ewekë ka ngazo thenge la mekuna i Nyidrë me ngöne la nyipi ijin. Kola saze trootro la meleng, nge atreine hë ni thipetrije lo aqane melenge ekö ka pi isi.

Tha thëthëhmine kö ni la ka traqa koi ni, ngöne lo ketre hej eni a bëeke kowe la hnalapang. Hna ce uti koi ni hnene la itre thöth, nge hnene la ka elemeke i angatr hna lepi ni qa hutrö me sue koi ni ka hape, “Amamane jë ka hape, trahmanyi eö!” Ame ju hi e cili, hnenge hna pane thithi koi Iehova, matre tro Nyidrëti a xatua ni troa xomihnine la iakötrë. Ngacama eni a pi iatëkeun, ngo atreine hë ni cile kowe la jole cili. Ame la drai thupen, hnenge hna iöhnyi hmaca memine lo lai ka elemeken lo itre thöthi ka lepi ni. Hnenge hna elëhni me pi lepi angeic, ngo ame e cili hnenge hna cile me thithi koi Iehova troa xatua ni troa xomihnine la elëhning. Sesëkötre ju hi ni la angeic a tro meköti koi ni me qaja ka hape: “Menu hë ni lo ewekë ka traqa lo ketre hej. Eni a ujëne tune lo lai, ke, eni a hane pi tui ‘ö. Eni a pi ini Tusi Hmitrötr.” Thatreine kö ni troa qaja la madrineng, ke, atreine hë ni xomihnine la elëhning! Ame hë e cili, hnenge hna nyiqane ini tusi me angeic.

Hace catre ni ke, ame la itre xa atrene la hnepe lapang, tha hnei angatre kö hna sisedrëne la ini tusi angatr ngöne la ijine cili. Ngo ase hnyawa ni mekune laka, tha tro kö ni a nue la ini tusing, nge tha tro kö ni a nue la ketre atr maine ketre ewekë troa abëekë ni hmaca kowe lo aqane meleng ekö. Atre hnyawa ni laka maine tro pala hi ni a ce tro memine la itre hlue i Akötresie, haawe tro hë angatr a xatua ni troa nue la itre thiinange ka ngazo, me hamë ni la ketre hnepe lapa hnenge hna ajan. Hnenge pala hi hna thele troa akökötrene la imelekeunge me Iehova, matre ame hë lo macatre 1991, hna bapataiso ni matre ketre atre Anyipici Iehova hë ni.

ITRE MANATHITHI HNENGE HNA KAPA:

Ka calogitre ni ekö, nge ka pi imusinë me iakötrë. Ngo hnene la Wesi Ula i Akötresie hna saze hnyawa la meleng. Ame hë enehila, eni a hane tro fë la maca ne tingetinge kowe la itre atr ka ajane troa dreng. Ketre manathithi ka tru la eni a pionie hut koi 23 lao macatre.

Hnenge hna hane huliwa ngöne la filial ne la Itretre Anyipici Iehova e Mexico. Ame ngöne lo ijine cili, hnenge hna iöhnyi me Claudia, ketre keresiano ka catre huliwa, nge hnei nyio hna faipoipo lo macatre 1999. Eni a olene atraqatre koi Iehova la hnei Nyidrëti hna hamëne koi ni la ketre föe ka nyipici!

Hnei nyio hna ce huliwa ngöne la ketre ekalesia ne Mexique ka qene hum, matre troa xatuane la itre ka simi hnangenyë troa atre Iehova. Thupene lai, hna hë nyio a tro Belize matre troa inine la Tusi Hmitrötr kowe la itre atr ne la nöje cili. Ngacama nyio hi a nango melëne la ka ijij, ngo ame pe ka madrine pala hi nyio, ke, pëkö hnei nyio hna pë. Ame koi nyio, celë hi aqane mele lai ka loi.

Hnei nenë hna xejë hmaca la ini tusi eahlo, uti hë la eahlo a xomi bapataiso. Ame fe lo mamang trahmanyi memine la ifëneköi angeic, me haneköi nyidro, tre, Itretre Anyipici Iehova fe hë angatr enehila. Nge ame lo itre sine ce elonge hnenge hna cainöje kow, ke angatre fe hë enehila a hane nyihlue i Iehova.

Eni a hacen, ke, meci hë la itre xa atrene la hnepe lapang; tha hnei angatre kö hna saze la aqane mele i angatr. Maine tha hnenge ju hna saze la meleng, tro hë ni a ce patr me angatr. Eni a olene atraqatr koi Iehova la hnei Nyidrëti hna ee ni koi Nyidrë, me kowe la itre ka nyihlue i Nyidrë. Hnei angatre hna xomihni me thiina ka menyik, me ini ni la aqane troa trongëne ngöne la meleng, la itre trepene meköti qa hnine la Tusi Hmitrötr.