Bëeke Hmaca Jë Koi Iehova

AME e nöjei macatre, alanyimu la itre mamoe i Iehova ka bëeke hmaca kowe la ekalesia. Pane mekune jë “la trenge madrin e hnengödrai” ngöne la ijine cili! (Luka 15:7, 10) Maine epuni fe la ketre ka bëeke hmaca ngöne la ekalesia, loi e xecie koi epun laka, atraqatre la madrine i Iesu, me itre angela, me Iehova. Ngo hetre itre xaa jol ka troa traqa ngöne la epuni a thele troa easenyi koi Iehova. Nemene la itre jol cili, nge nemene la ka troa xatua epun?

NEMENE LA ITRE JOL?

Ngacama bëeke hmaca ha la itre xaa trejin, ngo angatr palahi a kucakuca. Maine jë, caasi hi la mekuna i epun me Dravita joxu. Thupene la Iehova a nue la ngazo i angeic, öni Dravita: “Hna xome cilë ni hnene la ite ngazong.” (Sal. 40:12; 65:3) Ame la atr ka bëeke koi Iehova ke, maine jë, itre macatre ne troa huliwa la mekuthetheu i angeic. Hanawang la hna qaja hnei Isabelle,a ketre trejin hna upetröneë koi 20 lao macatre. Öni angeic: “Jole koi ni troa mekun laka, ase hë Iehova nue la ngazong.” Ngo tha tro kö epuni a kucakuca, wanga nanazije hmaca pi la lapaune i epun. (Ite edomë 24:10) Haawe, catre pi epun!

Ame koi itre xan, tru catre palaha la itre nyine troa kuca matre acatrene hmaca la aqane imelekeu i angatr me Iehova. Öni Antoine, thupene la angeic a bëeke koi Iehova: “Kösë thëthëhmine hë ni la meleng ekö ngöne lo eni palakö ngöne la nyipici.” Tro la itre aqane mekun cili a ajolëne la ketre trejin troa catre huliwa i Akötresie.

Pane mekune jë la ketre uma ka kei hnei wene. Maine jë, tro la atrekë hnalapan a kucakuca ke, angeic a goeëne la itre nyine troa kuca matre acile hmaca la uma. Ketre tune fe, maine hna thë la aqane imelekeu së me Iehova hnene la ketre ngazo ka tru hne së hna kuca, tro hë sa mekun la itre nyine kuca matre bëeke hmaca. Ngo tru catre palaha, matre easa kucakuca. Ngo tha tro pi kö sa seseu ke, hetre ixatua.

Öni Iehova: ‘Trohemi enehila, tro sa isenyin.’ (Is. 1:18) Ase hë epuni nue trengecatr matre ‘troa isenyin’ maine iloi me Iehova. Eje hi, ka sisitria catre lai koi Iehova ke, epuni a aijijë Nyidrë troa sa koi Satana!—Ite edomë 27:11.

Iehova a thingehnaean laka, maine tro epuni a easenyi koi Nyidrë, tro fe Nyidrëti a easenyi koi epun. (Iako. 4:8) Ketre, tro fe a kepe epun hnene la itre xaa trejin. Ngo nyipiewekë tro palahi epuni a acatrene la ihnimi epun koi Iehova, Kem me Sinee i epun. Tune kaa?

MEKUNE JË LA ITRE NYINE TROA EATRËN

Loi e tro epuni a pane mekun la itre nyine eatrën. Maine jë, atre palahi epuni la itre hnei epuni hna inine ekö ngöne lo xötrei, tune la pengöi Iehova me itre hnei Nyidrëti hna thingehnaean. Ngo tune kaa kowe la itre ini ka hnyipixe? Nyipiewekë tro hmaca epuni a ini tus, me cainöje trootro, me ce tro memine la itre trejin. Hanawang la itre xaa mekun nyine eatrën.

Troa ithanata koi Iehova. Atre hi Iehova laka, jol koi epuni troa thith e kolo palahi a huliwa la mekuthetheu i epun. (Rom. 8:26) Ngo “thithi jë the mano kö.” Qaja jë koi Iehova la aja i epun troa easenyi hmaca koi Nyidrë. (Rom. 12:12) Öni Andrej: “Eni a hmahma nge kolo palahi a huliwa la mekuthetheung. Ngo ame la eni a thith, kola paatre trootro la itre mekun cili. Tingetinge hë la hning.” Maine thatre kö epuni la nyine troa qaja ngöne la thith, e jë la itre thithi Dravita joxu ngöne Salamo 51 me 65.

Troa catre ini Tus. Tro hë lai a acatrene la lapaun me ihnimi epun koi Iehova. (Sal. 19:7-11) Öni Felipe: “Tha hnenge kö hna catre inine la Tusi Hmitrötr. Matre, hna nanazije trootro la lapauneng uti hë la eni a trotriji Iehova. Tha ajane kö ni troa kei hmaca. Celë hi matre, hnenge hna eköthe la ketre porogarame ne ini Tus.” Loi e troa nyitipu angeic. Maine thatre kö epuni la nyine troa inin, hnyingëne jë kowe la ketre sinee ka macaj.

Troa acatrene hmaca la aqane imelekeu i epun memine la itre trejin. Itre trejin ka bëeke hmaca a xouene la aqane troa goeë angatr hnene la itre xaa trejin. Öni Larissa: “Eni a hmahma. Kösë hnenge hna nuetrije la itre trejin. Jole catr koi ni troa xometrije la mekun cili qa ngöne heng.” Loi e xecie koi epun laka, aja ne la itre qatre thup me itre xaa trejin troa xatua epun troa easenyi koi Iehova. (Wange ju la hna eköhagen hna hape, “Nyine Troa Kuca Hnene La Itre Qatre Thup.”) Angatr a madrin la epuni a bëeke hmaca koi Iehova, nge aja i angatr troa xatua epun!—Ite edomë 17:17.

Tune kaa la aqane troa easenyi hmaca kowe la itre trejin? Loi e troa sine la itre icasikeu me catre cainöj me angatr. Nemene la thangane lai? Öni Felix: “Hnene la itre trejin hna lapa treqene la ijine tro hmaca ni a bëeke koi Iehova. Mama cile koi ni la ihnimi angatr. Hnei angatr hna kepe ni hnyawa, matre xecie koi ni laka, hnei Iehova hna nue la ngazong.”—Wange ju la hna eköhagen hna hape, “Nyine Tro Epuni a Kuca.”

THE KUCAKUCA KÖ!

Tro palahi Satana a ufi “wene” epun, matre ajolë epuni troa easenyi hmaca koi Iehova. (Luka 4:13) Maine tro epuni a hnëkë enehila, tro ha hmaloi koi epun troa cile koi Satana.

Hnei Iehova hna thingehnaean ka hape: “Tro ni a thele la ka pat, me ahmacane la hna helën, me ote sine thuluhmatine la ka xeci, me aegöcatene la ka kucakuca.” (Ezek. 34:16) Alanyimu la itre mamoe ka paatr hnei Iehova hna xatuane troa bëeke hmaca. Haawe, tro kö Nyidrëti lai a xatua epun troa acatrene la aqane imelekeu i epon.

Nyine Troa Kuca Hnene La Itre Qatre Thup

Nyipiewekë tro la itre qatre thup a xatuane la itre trejin ka bëeke koi Iehova, troa acatrene hmaca la aqane imelekeu i angatr me Iehova. Maine ketre qatre thup epun, hane hi la nyine tro epuni a kuca.

Troa ithuecatr koi angatr. Atre hi Paulo aposetolo laka, troa “hleuhleu” la itre ka bëeke hmaca koi Iehova. (2 Kor. 2:7) Ketre, tro fe angatr a hmahma me kucakuca. Celë hi matre, öni Paulo kowe la ekalesia: “Nue hnyawane pi la ngazo i angeic, nge akeukawanyi angeice jë.” Eje hi, nyipiewekë troa ithuecatre koi angeic me amamane laka, tru la ihnimi Iehova koi angeic, nge ketre tu së fe. Maine tro la itre qatre thup a xatua me qaja aloinyi angeic, tha tro hë angeic a hleuhleu.

Troa ce thithi me angatr. “Ka hetre thangane catre la thithi ne la atre ka meköt.” (Iako. 5:16) Öni Larissa: “Hnenge hna qaja kowe la itre qatre thup ka hape, eni a luelu me xou. Nge hnei angatre hna thithi sai ni. Tha hnei angatre kö hna elëhni. Aja i angatre pe troa xatua ni matre acatrene la aqane imelekeung me Iehova.” Öni Theo: “Jëne la thithi ne la itre qatre thup, eni a öhne laka, Iehova a hnimi ni. Tha Nyidrëti kö a goeëne la itre ewekë ka ngazo, ngo itre ewekë ka loi pe.”

Troa nyisinee i angatr. Aja ne la itre trejin ka bëeke hmaca koi Iehova troa hetre sinee ngöne la ekalesia. Öni Justin, ketre qatre thup: “Loi e troa ce cainöj me angatr. Ketre, loi e tro fe sa wai angatr ngöne la hnalapa me nyisinee i angatr!” Öni Henry, ketre qatre thup: “Ame la itre atrene la ekalesia a öhne laka, itre qatre thup a nyisineene la itre trejin ka bëeke koi Iehova, kola ithuecatr koi angatr troa hane tun.”

Troa ithuecatr koi angatr troa ini tus. Ijije hi tro la trejin ka macaj a xatuane la trejin ka bëeke hmaca, troa eköth la ketre porogaram ne ini tus. Öni Darko, ketre qatre thup: “Eni a ce thawa me angatr la itre hnenge hna öhne ngöne la eni a ini tusi caas, me ce wang me angatr la ketre tane mekun ka ithuecatr. Eni a amamane la itre eloin e troa ini Tusi Hmitrötr.” Ketre öni Clayton, ketre qatre thup: “Eni a upi angatr troa thele la itre tulu e hnine la Tusi Hmitrötr, ka melën la itre jole i angatr me xomi ini qa ngön.”

Troa ketre atre thupë mamoe ka lolo. Ame la trejin ka bëeke koi Iehova ke, hnei angeic hna öhne la itre qatre thup a xome la hnëqa i angatr ne itretre amekötin. Ame enehila, loi e tro angeic a goeë angatr ceitu me itre atre thupë mamoe. (Iere. 23:4) Celë hi matre, loi e troa drei angeice hnyawa, me qaja aloinyi angeic, me ithanata me angeic. Öni Marcus, ketre qatre thup: “Ame la eahuni a iwai trootro, eahuni a xom la ketre xötr me qaja aloinyi angatr. Eahuni fe a qaja la madrine hun me Iehova ke, hnei angatr hna nue trengecatr matre troa bëeke hmaca. Thupene lai, eahuni a isa pui koi ketre ijin.”

a Hna saze la itre ëj.