Ijije Hi Tro Epuni a Hetrenyi La Nyipi Madrin

1. Pine nemene matre tro sa madrin, e tro sa atre Iehova?

AME la nyipi madrin ke, tha ene kö la troa hnyimahnyima, ngo madrin ka cile hut. Kola hapeue lai? Öni Iesu ngöne la Cainöj Hune La Wetr ka hape: “Madrine la itre ka atrehmekune laka, nyipiewekë Akötresie koi angatr.” (Mat. 5:3) Atre hi Iesu laka, hna xup la atr matre troa atre me atrune la Atre Xup, ene Iehova Akötresie. Nge pine laka, Iehova la “Akötresie ka madrin,” tro fe a madrin la itre ka nyihlue i Nyidrë.—1 Tim. 1:11.

2-3. (a) Thenge la hnei Iesu hna qaja, drei fe la itre ka troa hane madrin? (b) Nemene la hne së hna troa ce wang ngöne la tane mekune celë, nge pine nemen matre ka nyipiewekë?

² Hapeu, tro hi sa madrin e kola tro loi la mele së? Waea. Öni Iesu ngöne la Cainöj Hune La Wetr ka hape, tro fe a madrin la itre ka “hacehni” pine la itre ngazo i angatr, maine pine la itre akötr ka traqa ngöne la mele i angatr. Ceitune fe hi kowe la “itre hna axösisine pine la thiina ka meköt” me itre hna “qejegele” pi Keriso. (Mat. 5:4, 10, 11) Ngo tro sa madrin tune kaa, e tro sa melëne la itre ewekë cili?

³ Iesu a ini easë e celë laka, tha easë kö a madrin ke, ka lolo la mele së. Ngo tro pe easë a madrin ke, easa atre Iehova me easenyi Nyidrë. (Iako. 4:8) Tro sa tune kaa? Ame ngöne la tane mekune celë, tro sa ce wang la köni ewekë nyine tro sa kuca matre tro sa hetrenyi la nyipi madrin.

TROA E ME ININE LA TUSI HMITRÖTR

4. Nemene la pane ewekë nyine tro sa kuca matre hetrenyi la nyipi madrin? (Salamo 1:1-3)

⁴ PANE EWEKË: Maine easa ajan troa hetrenyi la nyipi madrin, loi e tro sa e me inine la Tusi Hmitrötr. Hnei Iesu hna aceitunëne la Tusi Hmitrötr memine la xen. Ka nyipiewekë tro la itre öni me itre atr a xen matre mel. Ngo itre atr hmekuje hi la ka atreine e la Tusi Hmitrötr, nge jëne mele hi lai koi angatr. Celë hi matre öni Iesu: “Tha tro kö la atr a mel hnei falawa hmekuj, ngo hnene la nöjei trengewekë hna qaja hnei Iehova.” (Mat. 4:4) Haawe, loi e tro sa e la Tusi Hmitrötr e nöjei drai. Önine la atre cinyihane la Salamo ka hape: ‘Madrine la atr e la wathebo i Iehova, me lapa mekune ej e lai me jidr.’—E jë la Salamo 1:1-3.

5-6. (a) Nemene la itre ewekë hnei Iehova hna qaja koi së e hnine la Tusi Hmitrötr? (b) Kola xatua së tune kaa la easa e la Tusi Hmitrötr?

⁵ Tru la ihnimi Iehova koi së matre hnei Nyidrëti hna qaja e hnine la Tusi Hmitrötr la aqane tro sa madrin. Nyidrëti fe a qaja la aliene la mel, memine la aqane tro sa easenyi Nyidrë, me aqane tro Nyidrëti a seng la itre ngazo së. Ketre, Nyidrëti a qejepengöne la mele ka lolo hnei Nyidrëti hna hnëkën koi së elany. (Iere. 29:11) Itre ini lai qa hnine la Tusi Hmitrötr ka amadrinë së!

⁶ Hetrenyi fe e hnine la Tusi Hmitrötr la itre eamo ka troa xatua së e nöjei drai. Nge ame la easa trongëne la itre eamo cili, ke easë hi lai a madrin. Matre ame la epuni a cil kowe la itre jol, ke catre jë e me lapa mekune la Tusi Hmitrötr. Öni Iesu: “Madrine pe la atre drenge la itre trengewekë i Akötresie, me catre trongëne ej!”—Luka 11:28.

7. Nemene la aqane tro epuni a kepe thangan qa ngöne la hnei epuni hna e Tusi Hmitrötr?

⁷ Ame la epuni a e la Tusi Hmitrötr ke, xomi ijine jë troa lapa mekun la hnei epuni hna e. Tro sa xom la ketre ceitun. Kola kuci xen koi epun hnene la ketre atr. Ngo pine laka, pëkö ijine i epun troa xen, maine epuni pena a mekune la ketre ewekë matre epuni a xen nyimenyimëne la trepa i epun. Ame la kola pë la trepa i epun, epuni lai a öhne laka, tha drenge ju kö epun la ehnyapane la xen. Ceitune hi lai memine la easa e la Tusi Hmitrötr. E tro sa e nyimenyimëne la Tusi Hmitrötr, ke tha öhne kö së la itre maca qaathei Iehova. Ame la epuni a e la Tusi Hmitrötr, xomi ijine jë troa mekun la itre ewekë ka traqa, me dreng la itre nine ithanata, me lapa mekun la hnei epuni hna e. E tro epuni a kuca lai, ke tro hë epuni lai a madrin.

8. Nemene la hna kuca hnene la“hlue ka nyipici me ka inamacan” koi së enehila? (Wange ju la ithuemacany.)

⁸ Hnei Iesu hna acil “la hlue ka nyipici me ka inamacan” matre troa thawa la xen qaathei Iehova ngöne la nyipi ijin. Nge kola mana la xen enehila.b (Mat. 24:45) Ame la xen hna thawa hnene la hlu, ke kola qaja la itre itus me video hna nyitrepene hnene la Tusi Hmitrötr. (1 Thes. 2:13) Tro la xeni cili a xatua së troa atre la itre mekuna i Iehova. Celë hi matre easa e la itre zonal Ita Ne Thup me Hmeke Jë! memine la itre tane mekun ka mama ngöne jw.org. Ketre, easë fe a hnëkëne la itre icasikeu ne nyipine wiik me pune wiik. Nge e nöjei treu, easa goeëne la JW Télédiffusion. Maine tro sa e me inine la Tusi Hmitrötr, tro lai a xatua së troa eatrëne la hnaaluene ewekë nyine tro sa kuca matre hetrenyi la nyipi madrin.

TROA MEL THENGE LA ITRE TREPENE MEKÖTI IEHOVA

9. Nemene la hnaaluene ewekë nyine tro sa kuca matre hetrenyi la nyipi madrin?

⁹ HNAALUENE EWEKË: Maine easa ajan troa madrin, nyipiewekë tro sa trongën la itre trepene meköti Iehova. Önine la atre cinyihane la Salamo: “Manathithi angat’ asë angete qoue Iehova, ene itete trongëne la ite jë i nyidë.” (Sal. 128:1) Ame la atr ka xoue Iehova ke, angeic a metrötrë Nyidrë, nge xele angeic troa kuca la ketre ewekë ka troa akötrë Nyidrë. (Ite edomë 16:6) Matre angeic a isine troa trongëne la itre trepene meköti Iehova göi loi me ngazo, thenge la hna qaja hnei Tusi Hmitrötr. (2 Kor. 7:1) Nge maine tro sa kuca la itre ewekë hnei Iehova hna ajan, me nuetrij la itre ewekë hnei Nyidrëti hna methinën, tro së lai a madrin.—Sal. 37:27; 97:10; Rom. 12:9.

10. Thenge la Roma 12:2, nemene la nyine tro sa kuca?

¹⁰ E jë la Roma 12:2. Maine jë, atre hi la ketre atr laka, Iehova hmekuje hi la ka ijij troa amekötine la ka loi me ka ngazo. Ngo loi e tro fe angeic a trongëne la itre trepene meköti Nyidrë. Hane hi la ketre ceitun. Atre hi la itre atr la itre hna amekötin hnei mus göne la aqane troa nyinyap ngöne la itre gojenyi ka tru. Ngo ame la itre xan, tha trongëne kö angatr la itre hna amekötine cili. Matre angatr a hleth ngöne la itre gojeny. Haawe, loi e tro sa amamane ngöne la aqane ujë së laka, nyine loi koi së la itre trepene meköti Iehova. (Ite edomë 12:28) Celë hi hna qaja hnei Dravita. Öni angeic göi Iehova: “Tro cilieti a amamane koi ni la jëne mel ; tiqa la madine xajawa i cilie ; nge ngöne la themie maca i cilie la ite nyine amadin’ epine palua.”—Sal. 16:11.

11-12. (a) Ame la easa kucakuca me hnehengazo, nemene la nyine tro sa thupën? (b) Nemene la aqane xatua së hnei Filipi 4:8 matre troa iëne hnyawane la itre nyine iamadrinë?

¹¹ Ame la easa kucakuca me hnehengazo, easa thel troa kuca la ketre ewekë matre loi pi la he së. Tha ka ngazo kö, ngo loi e tro sa thupëne wanga huli së jë troa kuca la ketre ewekë hnei Iehova hna sisin.—Efe. 5:10-12, 15-17.

¹² Ame ngöne la tusi Paulo koi angetre Filipi, hnei angeic hna thuecatre koi angatr troa thele catrëne la itre ewekë “ka meköt, me ka wië, me ka aciane la ihnim, . . . me ka lolo.” (E jë la Filipi 4:8.) Tha Paulo kö e celë a qaja la itre nyine iamadrinë, ngo ka nyipiewekë tro sa trongën la eamo celë ngöne la easa iëne la itre nyine iamadrinë. Ame la epuni a iëne la ketre nyine iamadrinë, tupathe jë troa nyihnane la hnaewekë hna hape, “ewekë” ngöne la xötr, hnene la itre hnaewekë “nyima,” “film,” “itus,” maine “jeux videos.” Tro lai a xatua epun troa öhne la itre nyine iamadrinë ka loi me ka ngazo qëmekei Iehova. Aja i easë troa mele thenge la itre trepene meköti Iehova. (Sal. 119:1-3) Haawe, e ka wië la mekuthetheu së, ijiji easë hë troa kuca la hnaakönine ewekë ka troa xatua së troa hetrenyi la nyipi madrin.—Itre hu. 23:1.

TROA AMË PANËNE LA HMI IEHOVA

13. Nemene la hnaakönine ewekë nyine tro sa kuca matre hetrenyi la nyipi madrin? (Ioane 4:23, 24)

¹³ HNAAKÖNINE EWEKË: Troa amë panëne la hmi Iehova ngöne la mele së. Pine laka, Iehova la Atre Xupi së, meköt e tro sa nyihlue i Nyidrë. (Hna ama. 4:11; 14:6, 7) Matre ame la ka tro pa ngöne la mele së, ke ene la troa nyihlue i Iehova thenge la aja i Nyidrë, “thenge la uati hmitrötr me nyipici.” (E jë la Ioane 4:23, 24.) Easa ajan tro la uati hmitrötr a eatrongë së matre tro la hmi së a ihmeku memine la itre nyipici hna qaja e hnine la Tusi Hmitrötr. Loi e tro palahi sa amë panëne la hmi së ngacama easë ju hë a mel ngöne la ketre nöje hna wathebone la hmi së. Ame enehila, ase hë sasaith la 100 lao trejin hna akalabusine pine la hmi së,c ngo angatre palahi a catre thith, me inine la Tusi Hmitrötr, me qeje Iehova me Baselaia koi itre xan. Ame la kola qaqa së maine qanangazo së, easa madrin, ke atre hi së laka, tro kö Iehova a ce me easë me amanathithi së.—Iako. 1:12; 1 Pet. 4:14.

KETRE TULU KOI SË

14. Nemene la ka traqa kowe la ketre trejin qa Tadjikistan, nge pine nemen?

¹⁴ Kola jelenyipicine hnene la itre trejin laka, ame lo köni ewekë hne së hna ce wang ke, kola xatua së troa hetrenyi la nyipi madrin. Hane hi la hna melëne hnei trejin Jovidon Bobojonov ka 19 lao macatre, nge ka mel e Tadjikistan. Xele kö angeic ma hane sooc. Matre ame lo 4 Okotropa 2019, hna xomi angeic qa ngöne la hnalapa i angeic troa akalabusine me qanangazo angeic koi itre treu. Hna amamane ngöne la fen asë la ka traqa koi angeic. Hna lepi angeic matre tro angeic a hane sooc, me heetrëne la iheetre ne sooc. Thupene lai, hna upi angeic kowe la hnë ifolosa utihë la kola amekötin hnene la perezida troa nue angeic qa kalabus. Hnei Jovidon hna mele nyipici koi Iehova me madrin ngöne la itupath cili. Hnei angeic hna tune kaa? Hnei angeice palahi hna thel troa atre me easenyi Iehova.

15. Nemene la aqane kuca i Jovidon matre troa e me inine la Tusi Hmitrötr ngöne la kalabus?

¹⁵ Ame lo Jovidon ngöne la kalabus, hnei angeic hna e me inine la Tusi Hmitrötr, ngacama pëkö Tusi Hmitrötre i angeic, nge pëkö itus. Hnei angeic hna tune kaa? Hnene la itre trejin hna traqa fë ai angeic, nge angatr a cinyanyine la topik ne la drai ngöne la itre watrenge ne komisio. Celë hi ka aijijë angeic troa e me lapa mekune la Tusi Hmitrötr e nöjei drai. Ame la kola nu angeic qa ngöne la kalabus, öni angeic kowe la itre trejin ka tha melëne palakö la itre jole ka tru, ka hape: “Ka nyipiewekë tro epuni a atrepengöi Iehova jëne la Tusi Hmitrötr me itre itusi së, e ijine loi.”

16. Nemene la hna kuca hnei Jovidon e nöjei drai?

¹⁶ Hnei Jovidon hna trongëne la itre trepene meköti Iehova. Tha hnei angeice kö hna mekune la itre ewekë ka sis me kei kowe la ngazo, ngo hnei angeice pe hna meku Iehova memine la itre ewekë hnei Nyidrëti hna ajan. Hnei Jovidon palahi hna goeëne la emingömingöne la itre ewekë hnei Iehova hna xup. E nöjei hmakany, angeic a dreng la aqane ho la itre waco. Nge ame e hej, angeic a goeëne la treu me itre wëtresij. Öni angeic: “Hnene la itre ahnahna celë qaathei Iehova hna hamë madrin me trengecatr koi ni.” Ame la easa olene koi Iehova la nöjei lolo qaathei Nyidrë ke, kola amadrinë së, me xatua së troa cile catr ngöne la itre jol.

17. Nemene la aqane tro la tusi 1 Peteru 1:6, 7 a xatuane la atr ka cil kowe la jol hna melëne hnei Jovidon?

¹⁷ Hnei Jovidon hna amë panëne la hmi Iehova ngöne la mele i angeic. Atre hi angeic laka, nyipiewekë troa mele nyipici koi Iehova. Öni Iesu: “Iehova Akötresi eö la nyine tro eö a thili kow, nge nyidrëti hmekuje hi la nyine troa nyihluen.” (Luka 4:8) Aja ne la itre hene ka tru me itre sooc tro Jovidon a nuetrij la hmi angeic. Ngo hnei angeice pe hna catre thith e lai me jidr, me sipo Iehova troa xatua angeic matre tha tro kö a nuetrij la lapaune i angeic. Ngacama hna qanangazo Jovidon, ngo hnei angeic palahi hna mele nyipici koi Iehova. Ame enehila, angeic a madrin ke, catrecatre hë la lapaune i angeic hun ekö.—E jë la 1 Peteru 1:6, 7.

18. Nemene la nyine tro sa kuca matre tro palahi sa madrin?

¹⁸ Atre hnyawa hi Iehova la ka loi koi së. Maine tro epuni a trongëne la köni ewekë hne së hna ce wang, tro epuni lai a madrin, ngacama epuni a cil kowe la itre jol ka tru. Haawe, tro hë epuni lai a hane qaja ka hape: “Manathithi la nöj’ e Iehova la Akötesi angat.”—Sal. 144:15.