Hnei Iehova Hna Amanathithi Ni Me Ini Ni

Hnene la kemeng me thineng hna fek qa Estonie a tro Allemagne ngöne lo Hnaaluene Isi Ka Tru. Nge hna hnaho ni e cili. E thupen, hnei eahun hna fek a tro Canada. Ame la pane uma i eahun e Ottawa (Canada), ke ketre poulailler hna aporopën. Pëkö ca manie i eahun, ngo hetre wakuja palahi koi iji tri e hmakany.

Ame lo ketre ijin, hnene la lue Temoë Iehova hna e koi nenë la Hna Amaman 21:3, 4. Ame hna ketri eahlo, matre treije ju hi eahlo e cili. Hnei nenë me kaka hna catre ini Tusi Hmitrötr utihë la nyidroti a xomi bapataiso.

Ngacama thatreine hnyawa kö kaka me nenë qene Papale, ngo ka tru koi nyidro la huliwa i Iehova. Kaka a huliwa i nickel e Sudbury (Ontario) e nöjei jidr. E nöjei mecixen thupene la nyidrëti a huliwa, nyidrëti palahi a ce tro me ni me Silvia neköi jining troa cainöj. Nge ame pena e nöjei wiik, eahuni a ce hnëkëne la Ita Ne Thup me fami. Hnei kaka me nenë hna aciane la ihnimi Akötresie e kuhu hning. Celë hi matre ame lo 1956, lo kola 10 lao macatreng, hnenge hna nue la melenge koi Iehova. Hnene la ihnimi nyidroti koi Iehova hna uku ni troa nyihlue i Nyidrë ngöne la meleng.

Ame la eni a ase ini, hnenge hna pane amë la huliwa i Iehova. Ame koi ni, e tro ni a pionie, ke troa pë manieng, nge tha tro pë hë ni a ti avio me ngenune la fen. Matre, hnenge hna huliwa kowe la ketre radio. Eni a animatör. Pi tro catre ni a kuca la huliwa cili. Ame pe, eni palahi a triane la itre icasikeu, me ce tro memine la itre atr ka tha hnimi Iehova kö. Eloine pe, hnene la mekuthetheung hna inine hnei Tusi Hmitrötr hna uku ni troa saze.

Hneng e thupen hna fek a tro Oshawa, e Ontario. Ame e cili, hnenge hna iöhnyi me Ray Norman, me Lesli xai angeic, memine la itre xaa pionie. Hnei angatr hna kepe ni hnyawa. Ame la eni a öhne la aqane madrine i angatr, ke celë hi ka uku ni troa wange hmaca la nyine tro ni a kuca. Hnei angatr hna ithuecatre koi ni troa hane pionie. Nge celë hi hnenge hna kuca lo Semitrepa 1966. Madrine catre ni, nge lolo catre la meleng. Ngo ame pe, hetre ewekë ka troa saze la meleng.

AME LA IEHOVA A UPI EPUN TROA KUCA LA KETRE EWEKË, KE KUCA JË

Ame lo eni palakö a ini, hnenge hna nyialiene la pepa ne sipo troa hane huliwa ngöne la Bethela e Toronto (Canada). Ame hë lo eni a pionie, ke kolo ha hë ni troa huliwa ngöne la Bethela koi 4 lao macatre. Ngo hnimi Lesli catre ni, matre xele kö ni ma kapa la sipo i Bethela, wanga tha iöhny pi nyio. Thupene la hnenge hna anyimua thithi iel koi Iehova, hnenge hna kapa la sipo i Bethela, me iahni pë hë me Lesli.

Hnenge hna pane huliwa ngöne hnë wasi maano, nge ame hë e thupen, ke hna ami ni troa sekreter. Ame ngöne la ijine cili, pionie huti hë Leslie e Gatineau (Québec). Eni palahi a meku angeic, nge ame koi ni, tha tro kö ni ekö a kapa la sipo i Bethela. Ngo hetre ewekë ka traqa koi ni. Hna hane fe hë Ray, lo xa i Leslie, troa huliwa ngöne la Bethela. Nge casi pena la hnahage i nyio! Celë hi ka aijijë ni troa ithanata hmaca me Lesli. Thupene la 4 lao macatre ne huliwa ni ngöne la Bethela, hnenge hna faipoipo me Lesli, lo 27 Febuare 1971. Kolo drai tixenuë i eni ngöne la Bethela.

Hna upi nyio troa ixatua ngöne la ketre ekalesia ka qene Wiwi e Québec. Thupene la itre macatre, hna asesëkötrë ni la kola upi ni troa xome la hnëqa ne atre thupë sirkoskripsio, nge 28 hi lao macatreng. Ame koi ni, eni petre hi a hane öhne la jö, matre tha ijijinge kö troa xome la hnëqa cili. Ngo hna xatua ni hnene la hna qaja ngöne Ieremia 1:7, 8. Nge ame pena Lesli, tha meköle hnyawa kö angeic e hej, ke anyimua aksida angeic ekö me loto. Hapeu, tro jë kö nyio a eatrëne hnyawan la hnëqa ne atre thupë sirkoskripsio? Ngo önine la föeng: “Tro nyiso a thipën fë nemen nge Iehova pe la ka upi nyiso?” Matre hnei nyio hna kapa lai hnëqa, nge tru la madrine i nyio la nyio a vizitëne la itre ekalesia ngöne la 17 lao macatre.

Tha huliwa ka co kö la troa atre thupë sirkoskripsio, matre pëhë ijinenge koi Lesli. Ngo hane hi la ketre ewekë ka traqa. Ame lo ketre sine hmakanyi ne lundi, ke ca ka fenifeni qëhnelö. Ame la eni a fe, ke pëkö atr. Ngo ca neköi watrenge ne pique-nique, me nappe, me itre wene sinöe, me fromage, me falawa, ca butei waina, me ca sine pepa hna makëne ka hape: “Tro fë jë la föi eö troa pique-nique.” Nge ka loi drai pena la ijine cili. Ngo öning koi Lesli, hetre cainöj hnenge hna troa hnëkën, nge tru hnei joleng. Trotrohni ni hi hnei angeic, ngo nango akötre pi hë angeic. Matre ame la eni a lapa ngöne la bierong, ke tha nyipi loi kö ni. Eni hmaca mekune lo hna qaja hnei Efeso 5:25, 28. Kösë Iehova e cili a upi ni troa mekune la föeng. Ame la eni a ase thith, öning koi Lesli: “Nyiso a tro!” Madrine catre angeic. Matre hnei nyio hna tro kowe la ketre götrane ka mingöming, me seluthe la nappe ezine la ketre tim. Thatreine kö nyio troa thëthëhmine la drai cili. Ketre, hnenge ju kö hna hnëkëne la itre cainöjeng.

Madrine catre nyio troa wange la itre ekalesia e Colombie-Britannique utihë e Terre-Neuve. Eatre hë lo ajange ekö, ene la troa voyage lapa. Hnenge hna mekune troa hane sine la ini Gileada, ngo tha ajange kö troa mesinare me fek kowe la ketre nöje hnenge hna thatre. Ame koi ni, tha ijijinge kö troa hane mesinare. Ketre, xouenge fe troa upi nyio a tro Afrik, ke ka tru catr hnei mec me isi. Ka loi fe hi la melenge e celë.

KOLA UPI NYIO A TRO ESTONIE, LETTONIE ME LITHUANIE

Ame lo 1992, lo kola nue hmaca la huliwa ne cainöj ngöne la itre xaa nöj ne ex-Union Soviètique, ke hna sipo nyio troa mesinare e Estonie. Hna asesëkötrë nyio, matre hnei nyio hna canga thithi koi Iehova. Nge tune mina, öni nyio: ‘Tro nyiso a thipën fë nemen nge Iehova pe la ka upi nyiso?’ Matre hnei nyio hna kapa la ihë, nge öning: ‘Maca ka loi, tha nyiso kö a tro Afrik.’

Ame hnei nyio hna canga inine la qene Estonie. Itre treu thupen la nyio a traqa e cili, hna upi nyio troa wange la itre ekalesia. Matre 46 lao ekalesia me gurup hnei nyio hna wang ngöne la nöj e Estonie, me e Lettonie, me e Lithuanie, me e Kaliningrad, ketre traon e Russie. Hnei nyio hna canga inine la qene Letton, qene Lithuanie, me qene Russe. Tha ka hmaloi kö! Ngo madrine catre la itre trejin ke, nyio a inine la qene hlapa i angatr, matre hnei angatr hna xatua nyio. Ame hë lo 1999, hna fe la ketre Bethela e Estonie, nge hna upi ni troa hane sine la komite ne filial, ce me Toomas Edur, Lembit Reile, me Tommi Kauko.

Hnei nyio hna iatre memine la itre trejine hna xome ekö troa umëne e Sibérie. Ngacama catrehnine ekö la iangazo e hnine la itre kalabus, nge angatr a iananyi me fami, ngo ka madrine me catre cainöje palahi angatr. Celë hi lai ka xatua nyio troa xomihnine la nöjei pengöne jol.

Itre macatre hnei nyio hna huliwa catr nge tha ase kö nyio xomi ijine troa pane mano, matre kucakuca catre Lesli. Thatre kö nyio ka hape, angeic a kucakuca ke, hna tithi angeic hnei fibromyalgie. Ame e cili, ke nyio a mekun troa bëek hmaca a tro Canada. Matre ame la kola hë nyio troa sine la Ini Thatraqane La Itre Komite Ne Filial e Patterson (New York), ke ame koi ni, tha ijiji nyio kö. Ngo thupene la itre wenge thith, hnei nyio hna kapa. Nge hnei Iehova hna amanathithine la mekun hnei nyio hna xom. Ke e cili hi e Patterson, la kola öhne me nyinyine la meci Lesli. Matre hnei nyio hmaca hna catre huliwa i Iehova tune ekö.

KOLO PENA UPI NYIO KOWE LA KETRE NÖJ

Ame lo ketre heji ne 2008, lo nyio e Estonie, ke hna hë ni qa ngöne la hnalapa ne xomi meköt. Kola sipo nyio troa tro Congo. Eni a pane goe catr e cili. Ketre, loi e troa canga sa koi angatre lai hmakany. Tha hnenge kö hna canga qaja koi Lesli, wanga tha meköle hnyawa pi angeic ngöne la jidr. Ngo eni la ka tha meköle hnyawa, ke eni a catre thith me qaja koi Iehova la itre hnenge hna xouen e Afrik.

Ame hë lo hmakany, hnenge hna qaja koi Lesli, nge öni nyio: “Iehova a upi nyiso a tro Afrik. Tro nyiso lai a atre tune kaa la mele e koilo, nge tha qai nyiso pe?” Matre thupene la 16 lao macatre ne mele nyio e Estonie, nyio pena a fek a tro Kinshasa (Congo). Ka mingöminge catre la filial e cili, ke tru hnei sinöe nge pëkö stress. Ame la ketre pane ewekë hnei Lesli hna afedren e hnine la hnahage i nyio, ke ketre carte qa Canada ekö. Hna makëne ngöne lai carte ka hape: “Madrine jë e cili hnei epuni hna lapa.” Thupene la hnei nyio hna iöhnyi memine la itre trejin, me kuca la itre ini Tus, me xome la huliwa ne mesinare e cili, ke madrine catre nyio. Ame hë lo thupen, hnei nyio hna vizitëne la itre filial ngöne la 13 lao nöj e Afrik. Ngacama ka isa pengöne catre la itre atr ka mele cili, ngo ka lolo la thiina i angatr! Matre lapakötre trootro hë lo xoung ekö! Hnei nyio hna olene koi Iehova, la hna upi nyio a tro Afrik.

Ame e Congo, hnene la itre trejin hna hnëkëne la itre xeni ne la nöj, tune lo itre neköi öni, laka, tha ase kö nyio hane mekune troa xen. Ngo ame hë la nyio a öhne la itre trejine a öni, ke nyio pa hane jë tupath, nge lolo catr.

Ame ngöne la götrane kolojë ne la nöj, hnene la itre sooc hna lepe la itre tribu me qanangazone la itre föe me itre nekönatr e cili. Matre hnei nyio hna hane ixatua, göi troa hamë xen me xatuane la itre trejin tro palahi a catre nyihlue i Iehova. Alanyim thei angatr la ka mel ngöne la pë. Ame pe, hna ketri nyio hnene la mejiune i angatr kowe la mele hmaca, me ihnimi angatr koi Iehova, memine la aqane mele nyipici angatr kowe la organizasio. Hnene la tulu i angatr hna acatrene fe la lapaune i nyio. Ame la itre xaa trejin, ke pë hnyawa ca uma me hlapa i angatr. Eni a öhne e cili laka, canga tro hi a patre la itre mo, ngo ame kö la ka sisitria, ke ene la imelekeu së me Iehova. Ngacama catrehnine ju hë la itre jol, ngo tha hane fe kö angatr eetr. Hnene la tulu i angatr hna xatua nyio troa cile kowe la itre jol, tune la itre sine mec.

AME ENEHILA, KE NYIO PENA HA E ASIE!

Tha ase palakö, hna hë nyio pena troa huliwa ngöne la Bethela e Hong Kong. Drei fe la ka mekune ka hape, tro nyio a hane mele e cili! Ngo hnene laka, hnei nyio palahi hna öhne la iwanakoime i Iehova ngöne la itre götrane hna upi nyio, matre hnei nyio hna kapa. Ame lo 2013, akötre catre nyio troa nue la itre sinee i nyio e Afrik. Nge thatre kö nyio la ka treqe nyio e Hong Kong.

Ame e Hong Kong, ke ketre aqane mele kö e cili. Matre hana lai kola saze la mele i nyio. Tha ka hmaloi kö troa inine la qene chinois cantonais. Ame pe, hnene la itre trejine hna kepe nyio hnyawa, nge lolo catre fe la xen e cili. Kolo palahi a kökötre la huliwa ngöne la Bethela, ngo kolo fe a elë la itre thupene uma. Matre hnene la Lapa Ne Xomi Meköt hna salemëne la itre xaa batima i organizasio. Ame hë lo 2015, hna upi nyio pena a tro Corée du Sud. Nge nyio palahi la e Corée du Sud. Ketre tha ka hmaloi kö troa inine la qene Corée. Ngo ame la ka ithuecatre koi nyio ke, ene laka itre trejin a olene kowe la itre trengecatr hnei nyio hna kuca matre inine la qene hlapa i angatr.

ITRE INI HNENGE HNA XOM

Tha ka hmaloi kö troa nyisineene la itre xan. Ngo nyio a öhne laka, ame la nyio a tro kowe la itre trejin, me porotrik me angatr, ke canga imajemikeu hi eahun. Ketre, hnei nyio fe hna öhne laka, ceitune asë hi la itre trejin ngacama isa nöje i angatre kö. Hnei Iehova hna xupi së memine la aja troa ikep, me hnime la nöjei atr.—2 Kor. 6:11.

Öhne catre nyio la eloine troa goeëne la itre atr tui Iehova, me thel la aqane hnimi së me xatua së hnei Nyidrë. Nge ame la nyio mina a kucakuca me mekune ka hape, itre trejin a xele ma wai nyio, ke nyio a e la itre cartes, me itre itus qaathene la itre sinee i nyio. Hnei nyio hna öhne la aqane sa Iehova la itre thithi nyio, me hamë nyio la trengecatre i Nyidrë.

Kola tro la itre macatre, ngo eni me Lesli a öhne hnyawa la enyipiewekëne troa xomi ijine koi nyio, ngacama tru la itre jole i nyio. Nge nyio a öhne laka, hetre eloine la troa ihnyima ngöne la kola inine la ketre qene hlapa. Nge ame e nöjei hej, nyio a thele la ketre ewekë ka amadrinë nyio ngöne la drai matre olene koi Iehova.

Tha ase kö ni hane mekune ka hape, tro ni a mesinare, me hane mele ngöne la ketre nöj. Ngo eni ha öhne enehila ka hape, pëkö sai Iehova. Eni hmaca mekune lo hna qaja hnei Ieremia, hna hape: “Iehova fe, hnei [nyipë] hna iele ni.” (Iere. 20:7) Nyimutre catre la itre huliwa hnei Iehova hna hnëkëne koi nyio me itre manathith. Goi aijiji ni fe troa hane ti avio me kanothe la fen. Qai nyio hë ngöne la itre götrane laka, tha ase kö ni a hane mekune troa tro e cili, lo eni a co. Nge ase tro hë nyio vizitëne la itre filial ngöne la 5 lao continents. Eni a madrine me olene catrëne la ixatua i Lesli ngöne la itre nöj hnei nyio hna tro kow.

Tha tro kö sa thëthëhmin laka, ihnimi easë koi Iehova la ka uku së troa catre huliwa. Ka pë pengöne la itre manathith hne së hna kapa enehila, hune la mele së elanyi ngöne la fen ka hnyipixe. Tro Iehova e cili a “shathe la iwanakoime i [nyidrë] me amejine la ite ewekë ka mele asëjëihë.”—Sal. 145:16.