Itre Hnyinge Ne La Itre Ka e

Hnauëne laka, tha bëeke hmaca ju kö Iosefa me Maria a tro Nazareta, thupene la kola hnaho Iesu e Bethelema?

Tha hna qaja kö hnei Tusi Hmitrötr. Ngo eje pe a hamëne la itre ithuemacanyi ka amamane la kepin matre tha bëeke hmaca ju kö angatr a tro Nazareta ngöne la ijine cili.

Hnene la angela hna thuemacanyi Maria ka hape, tro angeic a hnahone la ketre nekönatr. Ame lo angela a tro fë la maca cili, ke Maria me Iosefa ngöne la ketre traon ne Galilaia, ene Nazareta. (Luka 1:26-31; 2:4) Thupene la hnei angatr hna lapa e Aigupito, hnei angatr hna bëeke hmaca a tro Nazareta. Hnei Iesu hna tru e cili matre hna hë nyidrë ka hape, atre Nazareta. (Mat. 2:19-23) Celë hi matre ame la kola qeje Nazareta, ke canga mama hi koi easë la mele i Iesu, Iosefa, me Maria.

Hetre sinee i Maria ka mele Iudra, Elizabeth la ëje i eahlo. Eahlo la föi Zakaria atre huuj, me thine i Ioane Bapataiso. (Luka 1:5, 9, 13, 36) Hnei Maria hna tro Iudra troa wai Elizabeth, me ce lapa me eahlo koi 3 treu. E thupen, hnei angeic hna bëeke hmaca a tro Nazareta. (Luka 1:39, 40, 56) Celë hi matre atre hnyawa hi Maria la itre götran e Iudra.

Thenge la hna amekötin, qa i Iosefa hna ‘cinyihane la ëje i angeic ngöne la traone i angeic.’ Matre hnei Iosefa hna fek qa Nazareta a tro Bethelema, “traone i Dravita.” Nge e cili hi la hnë troa hnahone la Mesia. (Luka 2:3, 4; 1 Sam. 17:15; 20:6; Mika 5:2) Thupene la kola hnaho Iesu, xele Iosefa troa bëeke hmaca a tro Nazareta memine la medreng. Matre hnei angatr hna lapa e Bethelema, nge 9 lao kilomet qa cili a tro Ierusalema. Eje hi, hmaloi hi koi nyidro troa tro fë la medreng kowe la uma ne hmi, me tro fë huuj.—Lev. 12:2, 6-8; Luka 2:22-24.

Hnene lo angela hna qaja koi Maria ka hape, tro la nekö i eahlo a lapane la “therone i Dravita,” nge “tro nyën a mus me Joxu.” Hapeu, hnei nyidroti kö hna hnyingë kepin la kola hnaho Iesu ngöne la traone i Dravita? (Luka 1:32, 33; 2:11, 17) Ma hnei nyidroti jë hna mekune ka hape, ka loi troa pane lapa e cili me treqene la itre xaa ithuemacanyi qaathei Akötresie.

Thatre kö së ka hape, ije macatre i angatr e Bethelema, lo kola traqa hnene lo itre magoi. Ame ngöne la ijine cili, angatr a lapa hnine la ketre uma, nge “nekönatre” hë Iesu, tha medrenge hmaca kö. (Mat. 2:11) Easa trotrohnine e celë laka, tha hnei angatre kö hna canga bëek a tro Nazareta, ngo hnei angatre pe hna pane lapa e Bethelema.

Hnei Herodra hna “iup troa humuthe la itre nekönatre trahmanyi asë e Bethelema . . . qaane ju hi la itre nekönatre ka lue macatre a uti ipië.” (Mat. 2:16) Hnene la ketre angela hna canga thuemacanyi Iosefa. Ame hnei angeic hna kötresai Maria, me Iesu a tro Aigupito me lapa e cili utihë la kola mec hnei Heroda. E thupen, hnei Iosefa pë hë me fami angeic hna tro Nazareta. Hnauëne laka, tha bëeke hmaca kö angatr a tro Bethelema? Pine laka, ame ngöne la ijine cili, Arekelao nekö i Herodra la Joxu ne Iudra, nge ka ngazo catr la thiina i angeic. Nge hnene la angela hna canga thuemacanyi Iosefa. Matre hnei angatr hna tro Nazareta, me hetru Iesu e cili, me xatua nyën troa nyihlue i Akötresie.—Mat. 2:19-22; 13:55; Luka 2:39, 52.

Pai Iosefa kö mec hui Iesu, matre tha tro pë hë nyidrëti a hane mel e hnengödrai. Tro pë hë nyidrëti a mel e celë fen. Celë hi matre ame elanyi la easa iöhnyi me nyidrë, tro sa hnyingë nyidrë la itre kepine matre hnei nyidrë me Maria hna lapa e Bethelema thupene la kola hnaho Iesu.