Thangane La Itre Isi
Tru catr la hna akötrëne la itre atr hnene la itre isi me ihumuth. Celë hi hna qaja hnene la itre atr ka melëne lai, me itre sooc.
ITRE SOOC
“E nöjei drai, eahuni a öhne la kola eatr la itre atr maine thupa la ketre götrane ngönetrei angatr, maine kolo pena a humuthi angatr. Eahuni pala hi a mel ngöne la xou.”—Gary, Grande-Bretagne.
“Hna kuqane la jung memine la iqëmekeng, nge hnenge hna öhne la kola humuth la itre nekönatr me itre qatr. Kösë ame koi ni, ka pë pengön la itre atr a akötr me itre xan a mec.”—Wilmar, Colombie.
“Ame la kola humuth la ketre atr qëmekei epun, ke thatreine kö epuni lai thëthëhmine la drai cili. Tro pala pëhë epuni lai a dreng la angeic a sue me treij hnei akötr. Thatreine jë kö epuni lai thëthëhmine la atre cili.”—Zafirah, Etazini.
ITRE ATR KA MELËNE LAI
“Ame koi ni, tha tro hmaca kö ni lai a hane madrin. Xou easë troa mec, nge easë fe a xou göne la itre sinee së me fami së.”—Oleksandra, Ukraine.
“Ketre hace ka tru la troa itreqe qaane 2h e hnaipajö utihë 11h e jidr göne troa itö xen, nge ketre ijije fe hi troa kuqanyi së.”—Daler, Tajikistan.
“Hna humuth la kem me thineng ngöne la isi. Matre eni casi pe hi, nge pëhë ka troa hane hnimi ni me akeukawanyi ni.”—Marie, Rwanda.
Ngacama tru catr la hna akötrëne la itre atre cili hnene la itre isi, ngo tingetinge hë angatr enehila. Ketre, xecie koi angatr laka, easenyi hë troa apëne la itre isi me ihumuth. Tro la zonal celë a amamane jëne la Tusi Hmitrötr, la aqane troa apatren elany la itre ewekë cili.