Ijije Kö Tro Sa Apëne La Itre Isi Me Ihumuth?

ITRE MUS A THEL TROA HULIWANE HNYAWAN LA MANI

Kepin: Aja i angatr troa amadrinëne la mele ne la itre atr. Tro lai a apatren la itre xaa jëne iwesitrë, ka xulu qa ngöne laka, tru hnei itre ka trenamo, nge ketre tru fe la itre ka pë mo.

Itre ejolen: Loi e tro la itre mus a saze la aqane huliwan angatr la mani. Kola mekun laka, ame lo 2022, traqa koi 34.1 miliar ne dollars américain hna huliwane matre troa acil hmaca la tingeting ngöne la fen asë. Ngo co hi la etrune la manie cili, hune la manie hna huliwan kowe la itre isi.

“Tru catre kö la manie me mo hnei eahun hna huliwan troa isi, hune la mani hna huliwan troa thele tingeting.”—António Guterres, secrétaire général des Nations unies.

Mekuna i Tusi Hmitrötr: Ijije hi tro la itre musi ne la fen a xatuane la itre ka pë ewekë, ngo thatreine kö angatr apatrene paluan la pë ewekë ngöne la fen.—Dreuteronomi 15:11; Mataio 26:11.

ITRE MUS A THELE LA TINGETING JËNE LA ITHANATA

Kepin: Kola ce ithanata matre thele troa traqa kowe la mekun ka cas ene laka, tha tro hmaca kö a isi.

Itre ejolen: Maine jë tro la ketre nöj a xele ma ithanata, maine xele pena ma kapa la hna axeciën, maine tro pena a iloi. Ketre, tha ka cile hut kö la itre mekun hna axeciën matre tingeting.

“Tha eatrëne ju kö la mus la itre mekun hna axeciën. Nge ame la itre mekune ka ngazo hna axeciën hnene la itre nöj, ke kola axulune la itre xaa jol e thupen.”—Raymond Smith, American Diplomacy.

Mekuna i Tusi Hmitrötr: Loi e tro la itre atr a “thele la tingeting.” (Salamo 34:14) Ngazo pe, ala nyimu la itre atr enehila ka “tha mele nyipici, . . . me xele ma ca mekun, . . . me mele hnihni.” (2 Timoteo 3:1-4) Kola haöth la fen hnene la itre thiina cili, matre thatreine kö la itre he ne politik nyinyine la itre jol, ngacama aja i angatr.

ITRE MUS A THEL TROA APATREN LA ITRE JIA NE ISI

Kepin: Aja i angatr troa apatren la itre jia ne isi tune la itre bombes atomiques, me chimique me biologique.

Itre ejolen: Tha ajane kö la itre nöj troa apatren la itre jia ne isi, ke xou i angatr troa patr la mus qaathei angatr, nge troa lepi angatr hnene la itre xaa nöj. Ketre tha tro jë kö lai a apatrene la itre kepin ka up la itre atr troa isi.

“Ame la itre mekun hna ce axeciëne ngöne la pune la guerre froide, ke tha eatrëne ju kö. Tune la troa thele ewekë matre apujëne la itre ihmönyinyin, me tro xomi së kowe la fen ka loi.”—“Assurer notre avenir commun : un programme de désarmement.”

Mekuna i Tusi Hmitrötr: Loi e tro la itre atr a nuetrij la itre jia ne isi, me “lepelepe la itre taua i angatr nyine uja dro.” (Isaia 2:4) Ngo hetre itre xaa ewekë nyine tro la itre atr a kuca matre apatrene la isi, ke ase hë lapane la itre hni angatr hnene la ihumuth.—Mataio 15:19.

ITRE MUS A CAS MATRE THA TRO HMACA KÖ A HETRE ISI

Kepin: Itre mus a ce xöl matre itö ixatua qëmekene la itre ithupëjia. Tha tro kö la ketre mus a thel troa isi memine la ketre nöj, ke atre hi angeic ka hape, tro angeice lai a isi memine la itre nöj ka nyimutre.

Itre ejolen: Ame la troa isi memine la itre nöj ka nyimutre, ke tha kolo kö lai a axulune la tingeting. Tha itre nöj kö a metrötrën la itre hnei angatr hna ce axeciën, nge tha itrotrohni kö angatr göne la aqane me ijin troa cil kowe la itre ithupëjia.

“Ngacama kola isine hnene la Société des Nations ekö me Nations Unis enehila, matre xatuane la itre mus troa ce huliwa, ngo tha ijiji angatr kö troa apëne la isi.”—“Encyclopedia Britannica.”

Mekuna i Tusi Hmitrötr: Troa tro loi la itre ewekë, e hna ce huliwa. (Atre Cainöj 4:12) Ngo tha ijije kö tro la itre musi atr a hamë së la tingeting ka cile hut. “The mejiune kö kowe la itre he ne nöj me kowe la nekö i atr ka thatreine iamele. Ame la kola patre la hnamano ne la atr, angeice hmaca a bëeke kowe la xaxau; ngöne la drai cili, meci hë la itre mekuna i angeic.”—Salamo 146:3, 4.