‘Insodu No Mantad Do Tampahu!’

1, 2. Nunu it winonsoi di Biliam kumaa’d tulun di Yohuwah?

SONGULUN i monginginsada, momili tupan dit kosudong om alanut o ginawo dau do magandad. Soira’d haro sada mongokot do tupan diri, om gayaton nondo dau i tapon.

² Miagal nogi dii, tongoulun nga milo’d oponon. Sobaagi’d suntu, tontok dot osomok no o tulun Israil id Tana dit Pinabatos, sinuhu di raja do Muab i Biliam dot mongupan tulun do Israil. Kootuson, sinuhu di Biliam i tongoondu do Muab dot sumuang id kiim do Israil moi’d kaanu mongimbayat di tongokusai do Israil.​—Pongintaban 22:1-7; 31:15, 16; Pinointalang 2:14.

3. Poingkuro tulun Israil do noimbayatan do tupan di Biliam?

³ Nokoontok toi tupan di Biliam? Rinibuan tongokusai do Israil “minongoi pagampahu di tongoondu do Muab.” Tuminuku nogi iyolo di tingolig, kohompit nogi Baal do Pior i ponokokinorohingan do tulun Muab. Kinootuson, 24,000 o tulun Israil napatai id piolitan Tana dit Pinabatos.​—Pongintaban 25:1-9.

4. Nokuro tu rinibuan o tulun Israil do minagampahu?

⁴ Nokuro tu ogumu o tongokusai do Israil dot noudutan do tupan di Biliam? Momusorou iyolo’d korohian diyolo sondiri noo, om nolihuan diyolo nunu nopo i winonsoi di Yohuwah montok diyolo. Ogumu ot sabap dot apatut o tulun Israil do mumboyo di Yohuwah. Pinagabas iyolo sobaagi’d susuhuon id Masir, pinosodia takaanon tontok iyolo id tana do kowotuan, om mongintirung diyolo solinaid id pamanahan do rumikot id Tana dit Pinabatos. (Ibrani 3:12) Nga kakal i diyolo do momonsoi dit sosomu. Ka’d rasul Paulus, “A toko i koino-ino do magampahu do miagal di winonsoi do wookon diyolo.”​—1 Korintus 10:8.

5, 6. Nunu nopinsingilaan toko mantad kinaantakan dit nosiliu id Rantai do Muab?

⁵ Miagal tulun Israil dit oruhai no’d kosuang id Tana dit Pinabatos, iyati nga osomok no id pomogunan do wagu. (1 Korintus 10:11) Nga baino poimpasi toko id pomogunan dit noponu’d tulun dit lobi’d orohian do seks mantad ko tulun do Muab di gulu po. I pogi mositi no’d antan-taan toko sabap seks dit sosomu iso tupan di Rogon dit koontok kopio do mongimbayat dati.​—Pongintaban 25:6, 14; 2 Korintus 2:11; Yudas 4.

⁶ Uhot pogi, “Manu oku toi’d momili do momurimon dot kasanangan dit oruhai? Toi, momili momurimon koposion dit poingompus id pomogunan do wagu? Nung momili ko’d koposion dit poingompus, pinggisom no’d mumboyo ponuhuan di Yohuwah diti, “insodu kou no do mantad id tampahu”?​—1 Korintus 6:18.

NUNU SEKS DIT SOSOMU TOI TAMPAHU

7, 8. Nunu ot seks dit sosomu? Nokuro tu minsodu toko mantad dilo?

⁷ Kogumuan tulun do baino a tumanud toturan do Kinorohingan om a otingayaman dot momonsoi seks dit sosomu. Id Baibol, seks dit sosomu nopo nga piromutan seks miampai tulun dit a po nokopisawo id tundang-undang. Kohompit nogi piromutan seks miampai oiyo ko tondu, oiyo ko kusai, om piromutan seks miampai tulun om tayam-tayam, seks oral, seks dubur, toi ko merangsang alat kelamin do tulun suai.​—Intangai Sinuratan id Tohuri 23.

⁸ Pinointalang do Baibol dot tulun dit monilombus do momonsoi seks dit sosomu, uyungon mantad do sidang. (1 Korintus 6:9; Pinointalang 22:15) Suai ko iri, atagakan yau’d pamantangan do tinan sondiri om kotumbayaan mantad tulun suai. Kotoguang nogi yau’d kobolingkangan id pisasawaan, sigog do monontian, topurimanan dot kisala dit awagat kopio, kaanu toruol, om kopogowit do kapataion. (Basao Galatia 6:7, 8.) Nung tumingkod kopio o sosongulun do momonsoi di sosomu om momusorou kootuson dit araat do osiliu, tantu no’d a yau momonsoi dit sosomu. Nga tulun di mimpuun do momonsoi seks dit sosomu, momusorou nopo do diyolo’d koinsanangan. Kaino pogibara-barasai toko nunu o kotimpuunon pogului’d kowonsoi seks dit sosomu.

KOTIMPUUNON—PORNOGRAFI

9. Nokuro tu koligogon o pornografi?

⁹ Pornografi toi kakamot dit sosomu, kihontolon do popoingkawas korohian do seks. Baino, pornografi aanu mantad do majala, buuk, sinding, ababayan id TV, om Intonet. Kogumuan tulun momusorou dot a koligogon o pornografi, nga a i otopot. Pornografi kounsub do tulun dot rumohian do seks, poposuni koubasan do melancap, om kikosioonuan dit kasala. Pornografi nogi kapanahak do koligaganan id pisasawaan, om piadaan.​—Rum 1:24-27; Iposus 4:19; intangai Sinuratan id Tohuri 24.

10. Poingkuro ponontudukan id Yakub 1:14, 15 kouhup dati do minsodu mantad kowoyo-woyoon dit sosomu?

¹⁰ Oponting kopio’d koilo toko poingkuro seks dit sosomu koimbayat dati. Ka’d Yakub 1:14, 15: “Nga abayayat no o tulun dot id pogumbalan ondung agayat iyau om katanud iyau di korohian dau’d araat. Om ondung atanud dau i korohian dau dit araat diri, om kowonsoi no iyau do dusa; om ondung koinggayo i dusa’ddi om kootuson nopo nga kapatayon.” Tumanud boros diti, nung koimbulai o pomusarahan dit kasala, tonuso no pomusarahan dilo do osisikap. Nung okon ko tinomod nu do kokito’d gambar dit sosomu, poundoliho no o mato nu do osisikap! Tutupai o kompiuto, toi poundoliho o ababayan TV. Kada pologoso pomusarahan dit sosomu do koimbulai. Tu kosioonuan miagal dilo kikuasa kopio om osusa dot momusus.​—Basao Matius 5:29, 30.

11. Poingkuro Yohuwah monguhup dati tontok do kipomusarahan toko dit sosomu?

¹¹ Kotutun i Yohuwah dati lobi ko kotutun toko’d tinan toko sondiri. Koilo Yau’d kibohiton toko nga koilo nogi Yau kaanu toko’d monoibau di kasala. Ka’d Yohuwah: ‘Tonuson no dokoyu i kouhangan do don pomogunan, i mominsuhu dot id suang do ginawo dokoyu: i magampahu, om i kowoyo-woyoon dit a osonong, i korohian di don tinan, i korohian dit araat om i tamaha, tu tamaha nopo om miagal do tumuku dot tingolig.’ (Kolosi 3:5) Mulong piya’d a asanang dot powonsoi nga alanut o ginawo di Yohuwah dot monguhup dati. (Sinding 68:20) Songulun komulakan it haro koubasan do mintong dot pornografi om melancap minoboros dot a i kasala o koubasan diti, ka’d piipiro tambalut dau. Nga ka dau: “Iti mamaraag do kogiiginowoo ku, om nokowonsoi oku’d kowoyo-woyoon di sosomu.” Kopuriman yau do oponting dot momusus kosioonuan dau dit araat om miampai ponguhupan di Yohuwah, kaanu yau tumingkod mantad koubasan dau dit a osonong. Nung kipomusarahan ko dit sosomu, pokianu no’d “kogoyoo do kuasa” mantad di Yohuwah do popoinsodu’d pomusarahan dilo.​—2 Korintus 4:7; 1 Korintus 9:27.

12. Nokuro tu intirungan toko o ginawo toko?

¹² Minonurat i Suliman do: “Mantad ko nunu nopo, intirungai no ginawo nu, tu ginawo nu nopo nga monontu do koposion om kapataion nu.” (Boros dot Aralom 4:23, NW) “Ginawo” nopo nga tinan toko di otopot it okito di Yohuwah. Oimbayatan toko mantad nunu it okito toko. I pogi miagal di Ayub, pususon toko nunu it intangan om sorohon toko. Ka dau: ‘Nakabatos oku do mikuwo’d sumpa, dot a rumohian do kokito’d sumandak.’ (Ayub 31:1) Om miagal di susuminding, sumambayang toko dot, ‘Kada oku pologoso do mogihum dit aiso o kotutuk-tutukon.’​—Sinding 119:37.

A ABAAL I DINA DOT MOMILI

13. Isai o tambalut dit pinili di Dina?

¹³ Agayo kopio pongimbayatan do tambalut kumaa dati. Ondung momili ko’d tambalut dit tumanud dot toturan do Kinorohingan, kouhup iyolo diya momonsoi dit osonong. (Boros dot Aralom 13:20; basao 1 Korintus 15:33.) Intangai nunu nosiliu kumaa di Dina. I Dina nopo nga tanak di Yakub, om pinagayo iyau id sampaganakan dit sumamba di Yohuwah. Okon ko songulun iyau dit aiso o moral, nga monokiambalut iyau’d kosumandakan do Kanaan it a sumamba di Yohuwah. Tulun nopo’d Kanaan nga ointutunan do kikowoyo-woyoon dit aiso o moral, om pomusarahan diyolo kokomoi seks nga poinsuai kopio mantad pomusarahan di susumamba di Yohuwah. (Oturan 18:6-25) Id tontok i Dina miampai di tongotambalut dau, nokoruba iyau’d Sikim, om muhang tomod i Sikim di Dina. I Sikim nopo nga kusai dit “pantangon kopio” id sampaganakan dau, nga a iyau sumamba di Yohuwah.​—Kinawansayan 34:18, 19.

14. Nunu nosiliu kumaa di Dina?

¹⁴ Minomonsoi i Sikim dit koubasanan do kogumuan tulun do Kanaan. Tu muhang kopio iyau’d Dina, “om ngoyo no dau tanggayai i Dina, om kosoho no dau.” (Basao Kinawansayan 34:1-4.) Nunu it winonsoi di Sikim nokopogowit do koligaganan kumaa’d Dina om sampaganakan dau.​—Kinawansayan 34:7, 25-31; Galatia 6:7, 8.

15, 16. Poingkuro toko’d osiliu do kitoilaan?

¹⁵ A toko oporlu’d momonsoi kasalaan miagal di Dina moi’d kopuriman dot kikasanangan o ponontudukan moral di Yohuwah montok dati. Ka’d Boros dot Aralom, “ambalut nod tulun dit ongkitoilaan, om osiliu ko i do tulun di kitoilaan; nga ondung monokiambalut ko’d tulun do basug, om obungou ko no.” (Boros dot Aralom 13:20) Nung tumotos ko’d “mongilo nunu it otopot,” koinsodu ko indo mantad koligagaanan om koinggoritan.​—Boros dot Aralom 2:6-9; Sinding 1:1-3.

¹⁶ Osiliu toko’d tulun dit kitoilaan nung minsingilo toko’d Baibol, sumambayang pogului’d momonsoi kootuson, om tumanud ponontudukan di pinatahak do susuhuon dit otorodok om it oilo. (Matius 24:45; Yakub 1:5) Sorohon toko nogi dot kibohiton om oluhoi toko. (Yoromia 17:9) Nga nunu topurimanan toko soira’d haro sosongulun do manahak dati’d pononsunudan? Osiriba nangku ginawo nu’d mamaramit toi ko kopuriman ko dot osindualan?​—2 Raja 22:18, 19.

17. Panahak dot suntu, poingkuro tongotobpinai’d kouhup dati.

¹⁷ Sobaagi’d suntu, Songulun tobpinai tondu nangatan do songulun kusai id kinoiyonon dau’d kumaraja do moi akan. Osonong kopio o kusai diri om muhang di tobpinai toko, nga okon ko susumamba di Yohuwah. Songulun tobpinai suai do nokokito diyolo om mumbal dot mononsunud diti tobpinai. Nga romiton toi amu dau o pononsunudan diti om popotopot do tinan sondiri? Tobpinai toko diti mupus di Yohuwah om manu’d momonsoi di otopot. Nga ondung a yau sumimban, ‘minsodu nangku iyau mantad seks dit aiso moral’ toi ‘otumbayaan nangku iyau’d ginawo dau sondiri’?​—Boros dot Aralom 22:3; 28:26; Matius 6:13; 26:41.

MINSINGILO MANTAD SUNTU DI YUSUP

18, 19. Nunu kouhup di Yusup do minsodu toi magada seks dit aiso moral?

¹⁸ Pinadagang i Yusup id Masir sobaagi’d susuhuon. Om monikid tadau dit sinawo’d bos dau dot mongimbayat dau, nga mupus kopio iyau di Yohuwah om manu’d momonsoi dit otopot. I pogi, monikid tadau i tondu do mangangat di Yusup do dumudun dau nga mada i iyau. Nga sobaagi’d susuhuon, a iyau milo’d monongkiad di walai di bos dau. Insan tadau, soira’d minumbal kaagu i tondu diri do mangangat dau’d monokidudun om “poggidu no iyau do hiri’d soliwan.”​—Basao Kinawansayan 39:7-12.

¹⁹ Ondung momusorou nopo i Yusup dot seks toi tondu diri, kaanu nangku iyau’d mangada toi minsodu mantad seks dit aiso moral? Tantu’d amu kon. Nga tu mongunsikou kopio i Yusup do piromutan dau miampai di Yohuwah, sinunudan dau i tondu diri dot ‘Antangai pogi, nunu nopo nga aiso no ot a dau pinatahak dot id suang do palad ku, suwai ko iya poo. Om poingkuro oku daa’ndo do momonsoi do miagal dino karaat, om kowonsoi pod dusa dot id toguang do Kinorohingan?’​—Kinawansayan 39:8, 9.

20. Poingkuro toko’d koilo dot orohian kopio i Yohuwah di Yusup?

²⁰ Mulong piya’d poinsodu i Yusup mantad sampaganakan dau, nga otorodok kasai iyau kumaa di Yohuwah. Om binarakatan dii iyau di Yohuwah. (Kinawansayan 41:39-49; Boros dot Aralom 27:11) Osusa kopio dot mangada wowonsoion dit aiso moral nga soroho no boros diti: ‘Osianan i Yohuwah do koinsanai di tulun dit araatan do karaaton, om intirungan Dau o koinsanai’d tulun Dau, om poiduwon Dau iyolo’d mantad id kuasa do tulun dit araat.’​—Sinding 97:10.

21. Poingkuro songulun komulakan minomit do suntu di Yusup?

²¹ Monikid tadau, popokito o tulun di Yohuwah dot ‘araatan iyolo dit araat’ om ‘orohian dit osonong.’ (Amos 5:15) Molohing toi omulok, nga kaanu ko’d mumboyo di Yohuwah. Nopogumbalan ot kotumbayaan do tobpinai kusai toko id sikul. Songulun tondu id sikul dau mongimbayat dau do monokidudun nung monguhup yau dau id poporiksaan do matematik. Nga tobpinai diri minomit do suntu di Yusup. Ka dau: “Osikap oku’d magada dit pogimbayatan dau. Miampai potimporon do kotorodoko kumaa di Yohuwah, om a popotingayam do dau’d tinan.” Koinsanai “kosimbayanan dit oruhai dot id suang do koposi-posion” miagal ko wowonsoion dit aiso moral, kopogowit no’d kootuson dit araat. (Ibrani 11:25) Kobintumboyoon kumaa di Yohuwah kopogowit kasai do kataadan dit poingompus.​—Boros dot Aralom 10:22.

ROMITO NO PONGUHUPAN DI YOHUWAH

22, 23. Poingkuro i Yohuwah kouhup dati ondung kowonsoi toko’d dusa dit awagat?

²² Orohian i Rogon do momoguno seks dit aiso moral dot mongimbayat dati, om iyati nga kibohiton. Somoonu koimbulai kanto pomusarahan toko dit aiso moral. (Rum 7:21-25) Koilo i Yohuwah do hal diti om osorou i Dau dot “tana toko i toomod.” (Sinding 103:14) I pogi, nung kowonsoi songulun Kristian dit aiso moral, kikalansanan po nangku yau? Oo. Nung otopot yau’d rumologo, monguhup om “mangampun” kasai i Yohuwah dau.​—Sinding 86:5; Yakub 5:16; basao Boros dot Aralom 28:13.

²³ Minanahak i Yohuwah dati’d “nipuhawang dot id tulun,” ilo nopo nga ponotua dit obingupus. (Iposus 4:8, 12; Yakub 5:14, 15) Pinosodia di Yohuwah o ponotua dot monguhup dati’d poposonong kaagu piromutan toko miampai Dau.​—Boros dot Aralom 15:32.

MOMOGUNO ‘POMUSARAHAN DOT TOSONONG-SONONG’

24, 25. Poingkuro momoguno ‘pomusarahan dot tosonong-sonong’ kouhup dati minsodu mantad wowonsoion dit aiso moral?

²⁴ Moi’d kowonsoi kootuson dit osonong, oporlu do koilo toko dot kikasanangan o toturan di Yohuwah montok dati. A toko manu’d sumiliu kusai dit basug it pinointalang id Boros dot Aralom 7:6-23. Tu a iyau minomoguno do pomusarahan do tosonong-sonong, i pogi osinang iyau oimbayatan dot momonsoi seks dit aiso moral. Tulun di kipomusarahan dot tosonong-sonong karati pomusarahan do Kinorohingan om masi’d tumanud do toturan diri. Soroho pogi boros diti: “Ondung osianan ko’d tinan nu om tumotos ko i do minsingilo; om ondung osorou nu i nopinsingilaan nu’ddi om osonong no o kotutukon nu.”​—Boros dot Aralom 19:8.

²⁵ Otumbayaan ko toi’d otopot kasai o toturan di Yohuwah om kapanahak diya do kolumaagan nung tonudon nu o toturan diti? (Sinding 19:8-11; Yosaya 48:17, 18) Nung a ko otumbayaan, soroho no hal dit osonong i winonsoi di Yohuwah montok diya. “Pimpori-pori nopo pogi do mongilo ondung songkuro o kosonongo’d Yohuwah.” (Sinding 34:8) Nung tumotos ko do mumboyo’d toturan do Kinorohingan, tupus nu kumaa Dau lobi aralom. Upuso no nunu it upuson Dau, om karatai no’d nunu it karaatan Dau. Suangai no pomusarahan nu miampai hal dit otopot, it olidang, it apatut do upuson, i tosonong, om i korohian do Kinorohingan. (Pilipi 4:8, 9) Koomit toko indo di Yusup, om kaanu koinsanangan mantad toturan di Yohuwah.​—Yosaya 64:8.

26. Nunu it pogibara-barasan toko id kotob sumusuhut?

²⁶ Poimbujang toi nakasawo ko no, manu i Yohuwah do olumaag ko. I pogi, id duo kotob sumusuhut pogibara-barasan toko karalano’d popoingkakat pisasawaan dit olumaag.