Nunu o Pomorintaan do Kinorohingan?

1. Nunu sambayang dit nointutunan do pogibaras-baras toko’d baino?

RINIANGAN o tulun koilo iso sambayang dit nointutunan i roitan dot Sambayang Tapa Dahai. Minomoguno i Yesus do sambayang diti do monuduk do tumatanud dau poingkuro do sumambayang. Nunu o sambayangon dau? Om nokuro tu oponting o sambayang diti montok dati do baino?

2. Nunu o tolu hal sambayangon dit toponting do pinotuduk di Yesus dati?

² Ka’d Yesus: “Sumambayang kou no do poingkaa: ‘Oi Tapa dahai i hilo’d surga, lidangan no daa o ngaran nu. Korikot no daa o Pomorintaan nu. Osiliu no daa korohian nu do hiti’d pomogunan miagal id surga.’” (Matius 6:9, 10, NW) (Basao Matius 6:9-13.) Nokuro tu minonuduk i Yesus dati do sumambayang montok tolu o hal dilo?​—Intangai Sinuratan id Tohuri 20.

3. Nunu pokiilaan toko’d kokomoi do Pomorintaan do Kinorohingan?

³ Nokopinsingilo toko no dot ngaran nopo’d Kinorohingan nga i Yohuwah. Om nopogibara-barasan toko no nunu o hontolon do Kinorohingan montok koinsanai tulun om tana. Nga nunu komoyon di Yesus soira minomoros iyau: “Pokionuon dahai dot iya o momorinta do hiti’d pomogunan?” Kopinsingilo toko nunu i Pomorintaan do Kinorohingan, nunu maan do pomorintaan diti, om poingkuro iti’d momolidang do ngaran do Kinorohingan.

NUNU O POMORINTAAN DO KINOROHINGAN?

4. Nunu o Pomorintaan do Kinorohingan, om isai o Raja dau?

⁴ Popoingkakat i Yohuwah do iso pomorintaan hilo’d surga om momili di Yesus sobaagi’d Raja. Roitan do Baibol iti’d Pomorintaan do Kinorohingan. Yesus nopo nga ‘Raja do koinsanai’d raja om Tuan do koinsanai’d tuan.’ (1 Timotius 6:15) Kaanu i Yesus do momonsoi lobi’d osonong ko mantad do pomorinta’d tulun, om kikuasa ko mantad do koinsanai pomorinta do tulun.

5. Mantad hombo o pomorintaan do Kinorohingan do momorinta? Momorinta nondo do nunu?

⁵ Apat nohopod tadau mantad kinotungagan dau, mininsawat i Yesus hilo’d surga. Id tohuri tadau, pinosiliu di Yohuwah yau sobaagi’d Raja do Pomorintaan. (Winonsoi 2:33) Pomorintaan do Kinorohingan momorinta nondo hiti’d pomogunan mantad surga. (Pinointalang 11:15) Iri no sabap roitan do Baibol o Pomorintaan diti dot “pomorintaan dau do hilo’d surga.”​—2 Timotius 4:18.

6, 7. Poingkuro i Yesus lobi’d osonong ko mantad suai raja do tulun?

⁶ Minoboros o Baibol dot Yesus nopo nga kikuasa ko mantad koinsanai raja do tulun tu “iyau noo it a aala do kuasa do kapatayon.” (1 Timotius 6:16) Koinsanai pomorinta’d tulun apatai ngai, nga i Yesus a insan do apatai. Koinsanai dit osonong do wonsoiyon di Yesus montok dati aiso o kolimpupuson.

⁷ Minoboros o nubuat do Baibol dot i Yesus nopo nga Raja dit aadang om obinsianan: “Om woyoon iyau di rusod do TUHAN. Om kitoilaan indo iyau om atarom o pomusarahan, om koilo do momusorou dit apatut dau’d wonsoyon, om wonsoyon dau iri, om kotutun iyau do korohian do Kinorohingan om oronok iyau dau. Iri no i mumboyo’d TUHAN o sumiliu’d kataadan kopio dau. Okon i ko tumanud dit okito dau o poimpahan dau do mamatos om a iyau paparatu do hukuman do tumanud do boros do tulun. Nga butusan ngai i dau i tulun do mosikin do tumanud dit otulid.” (Yosaya 11:2-4) Manu ko nangku raja miagal dilo?

8. Poingkuro toko’d koilo dot a sosongulun i Yesus do momorinta?

⁸ Minomili o Kinorohingan piipiro tulun do momorinta miampai’d Yesus id pomorintaan do surga. Sobaagi’d suntu, minomisunud i Paulus di Timotius: “Ondung alanut o ginawo toko, om kopomorinta toko i do kowoyo dau.” (2 Timotius 2:12) Piro ginumu tulun do momorinta sobaagi’d raja miampai’d Yesus?

9. Piro ginumu do momorinta miampai’d Yesus? Soira tuminimpuun o Kinorohingan do minomili diyolo?

⁹ Miagal dit nopinsingilaan toko id Kotob 7, nonuan do pongitanan i Yohanis dot nokokito di Yesus sobaagi’d Raja hilo’d surga miampai 144,000 raja do suai. Isai o 144,000 tulun diti? Pinointalang di Yohanis dot “notulisan do ngaran dau [Yesus] om i ngaran do Tapa dau ot id turos diyolo.” Om nogi: “Moyo-woyo nopo iyolo di Tanak do Dumba’ddi [Yesus] do honggo nopo o ngoyon dau. Om id pogialatan nopo do toinsanan o tulun.” (Basao Pinointalang 14:1, 4.) I nopo 144,000 nga tulun do Kristian dit obintumboyo i nopili do Kinorohingan do “kopomorinta do hiti’d pomogunan” miampai’d Yesus. Soira’d apatai yolo, potungagon nondo kawagu kumaa hilo’d surga. (Pinointalang 5:10) Tontok di maso po’d tumatanud di Yesus, nokopomili no i Yohuwah do tulun Kristian dit obintumboyo’d sumiliu soboogian dit 144,000 tinimungan do raja.

10. Nokuro tu iso koupusan di Yohuwah do minomili’d Yesus om 144,000 tulun do momorinta tongoulun?

¹⁰ Opusou kopio i Yohuwah dati tu minomili Yau’d tongoulun do momorinta miampai’d Yesus. Kosiliu i Yesus do pomorinta dit tosonong tu karati yau dati. Koilo yau nunu topurimanan sobaagi’d tulun om oinggorit. Nokoboros i Paulus dot i Yesus nopo nga “kopuriman do koinsanai di koluhayan toko,” om “nopogumbalan no dot id suang do nunu nopo, do miagal dati.” (Ibrani 4:15; 5:8) Koilo nogi 144,000 o tulun do nunu topurimanan sobaagi’d tulun om nokotoguang miampai kibohiton om toruol. I pogi, otumbayaan toko dot karati i Yesus om 144,000 tulun okon nopo ko poingkuro o topurimanan toko, nga nogi kobolingkangan dit otoguangan toko.

NUNU WONSOIYON DO POMORINTAAN DO KINOROHINGAN?

11. Nokuro tu minonuduk i Yesus do tumatanud dau do sumambayang dot osiliu no daa hontolon do Kinorohingan hilo’d surga?

¹¹ Tinudukan di Yesus i tumatanud dau do sumambayang dot osiliu no daa o hontolon do Kinorohingan hilo’d surga. Nokuro? Nopinsingilaan toko id Kotob 3 dot suminaap i Rogon di Yohuwah. Soira suminaap i Rogon, pinologos di Yohuwah yau om moloikat dit a obintumboyo toi rusod dit araat do miyon hilo’d surga dot toruhai. I pogi’d, okon ko oinsanan id surga momonsoi korohian do Kinorohingan. Id Kotob 10, kopinsingilo toko’d ogumu po pasal do Rogon om moloikat dit a obintumboyo toi rusod dit araat.

12. Nunu duo kinaantakan toponting dit nokointalang id Pinointalang 12:10?

¹² Pinointalang do Baibol dot a no alaid soira nosiliu i Yesus do Raja do Pomorintaan do Kinorohingan, nongoi dau songodo i Rogon. (Basao Pinointalang 12:7-10.) Pinointalang id boros 10 ot duo kinaantakan toponting. Nokotimpuun o Pomorintaan do Kinorohingan do momorinta miampai’d Yesus Kristus sobaagi’d Raja om pinataam i Rogon mantad surga kumaa hiti’d pomogunan. Miagal dit opinsingilaan toko, kinaantakan diti nosiliu no.

13. Nunu naantakan id surga soira’d nakataam i Rogon?

¹³ Pinointalang do Baibol o kounsikahan do moloikat dit obintumboyo soira pinataam i Rogon om rusod dit araat mantad surga. Basao toko: “Mositi no dot otood o hilo’d surga om koinsanai di poingiyon do hilo!” (Pinointalang 12:12) Haro nodi kosimbayanan om pogiuuludan id surga tu koinsanai hilo momonsoi korohian do Kinorohingan.

14. Nunu naantakan id pomogunan soira’d nakataam i Rogon mantad surga?

¹⁴ Nga, poinsuai kopio o koposion id pomogunan. Naantakan karaaton o tulun tu “nokolintuhun no i Rogon” om “mikuwo’d a oginagina o kototogod, tu oilaan no dau dot a no alaid o maso dau.” (Pinointalang 12:12) Otogod kopio i Rogon. Pinataam yau mantad surga, om noilaan dau dot a no alaid om punsoon nondo yau. Monotos yau’d momonsoi nunu nopo it kaanu’d manahak do kobolingkangan, korualan, om koinggoritan id pointongkop do pomogunan.

15. Nunu hontolon do Kinorohingan montok pomogunan?

¹⁵ Nga, a i nokosimban o hontolon do Kinorohingan montok pomogunan diti. Manu kasai Yau’d tulun dit aiso bohiton do masi sogigisom id pomogunan do paradais. (Sinding 37:29) Nga, poingkuro Pomorintaan do Kinorohingan do papaharo diti?

16, 17. Nunu pinosunud dati id Daniol 2:44 kokomoi do Pomorintaan do Kinorohingan?

¹⁶ Boros ka’d nubuat id Daniol 2:44: “Om tontok nondo do maso di piro-piro o raja’ddi do momorinta do popoingkakat i Kinorohingan do hilo’d surga do pomorintaan dit a milo dot opupusan do gisom dot alaid, om a insan dot aala dot isai nopo o bansa. Om magayi-ayi nopondo o pomorintaan diri do mamaraag do koinsanai’d pomorintaan di suwai.” Nunu ponudukan do nubuat diti montok dati kokomoi do Pomorintaan do Kinorohingan?

¹⁷ Koiso, poposunud dati dot tumimpuun do momorinta o Pomorintaan do Kinorohingan di tontok do “maso di piro-piro o raja’ddi.” Komoyon diti dot kiharo po pomorintaan do suai id pomogunan soira tumimpuun do momorinta o Pomorintaan do Kinorohingan. Koduo, poposunud dati dot poingkakat kasai o Pomorintaan do Kinorohingan do sogigisom om a osolianan do pomorintaan do suai. Om kotolu, kiharo pisangadan do Pomorintaan do Kinorohingan om pomorintaan do pomogunan. Kamanang nondo o Pomorintaan do Kinorohingan om osoliu nondo do iso-iso o pomorinta do momorinta id pomogunan diti. Om, kaanu nondo o tulun dot pomorintaan dit tosonong.

18. Nunu ngaran do pisangadan dit tohuri no id piolitan do Pomorintaan do Kinorohingan om pomorintaan do pomogunan diti?

¹⁸ Poingkuro Pomorintaan do Kinorohingan sumowoli do pomorintaan do pomogunan? Pogulu id pisangadan dit tohuri no, roitan do Harmagidon, mamalid po o rusod dit araat dot “koinsanai di raja do pointongkop do pomogunan do minonimung diyolo do mongoi sangod do tontok di Tadau dot agayo, iri no i Tadau do Kinorohingan, it Agayo Kopio o Kuasa.” Oo, sumangod nondo o pomorintaan do tulun di Pomorintaan do Kinorohingan.​—Pinointalang 16:14, 16; intangai Sinuratan id Tohuri 10.

19, 20. Nokuro tu manu toko’d Pomorintaan do Kinorohingan do momorinta id pointongkop do pomogunan?

¹⁹ Nokuro tu manu toko’d Pomorintaan do Kinorohingan? Haro o tolu sabap. Koiso, kidusa, sumakit, om matai toko. Nga, minoboros o Baibol dot id suang do Pomorintaan do Kinorohingan, apasi toko’d sogigisom. Om, ka’d Yohanis 3:16: “Nosianan no kopio o Kinorohingan do tulun do hiti’d pomogunan, gisom do pinatahak dau i Tanak dau dit iso-iso, om pointikid-tikid do tulun di monongkuyaan dau om amu no apatai, suwai ko kaanu do koposion dit otopot kopio om i poingompus.”

²⁰ Sabap koduo nopo nga nosorilian toko’d tulun do taraat. Ogumu o mongudut om momonsoi dit araat. A toko kaanu’d mongidu diyolo, nga kaanu i o Kinorohingan. Tulun dit tumilombus do momonsoi dit taraat maan nondo tonuso id maso’d Harmagidon. (Basao Sinding 37:10.) Sabap kotolu nopo nga oluhoi, araat, om obinsuap o pomorintaan do tulun. A iyolo orohian do monguhup tulun do mumboyo’d Kinorohingan. Ka’d Baibol: “Haro i do pakayon do tulun o kuasa dau do ponginggorit do sompi ko iyau ngai.”​—Gomponuduk 8:9.

21. Poingkuro Pomorintaan do Kinorohingan do popootus dot hontolon do Kinorohingan id pomogunan?

²¹ Soira katalib o Harmagidon, pootuson nondo dot Pomorintaan do Kinorohingan o hontolon di Yohuwah do hiti’d pomogunan. Sobaagi’d suntu, popoidu Yau di Rogon om rusod dit araat. (Pinointalang 20:1-3) Id kolimpupuson, aiso nondo o sumakit toi apatai. Sabap do tobusan, koinsanai tulun dit obintumboyo kaanu’d koposion sogigisom id Paradais. (Pinointalang 22:1-3) Lidangan nondo’d Kinorohingan o ngaran di Yohuwah. Nunu rati’d ti? Rati nopodti nga soira momorinta o Pomorintaan do Kinorohingan do pomogunan, mamarayou nondo koinsanai tulun do ngaran di Yohuwah.​—Intangai Sinuratan id Tohuri 21.

SOIRA’D KOSILIU I YESUS DO RAJA?

22. Poingkuro’d oilaan toko dot a po nosiliu i Yesus do Raja soira di hiti po yau’d tana toi di katalib do kinotungagan dau?

²² Tinudukan di Yesus i tumatanud dau do sumambayang: “Pokionuon dahai dot iya o momorinta do hiti’d pomogunan.” Atalang kopio dot rumikot o Pomorintaan do Kinorohingan id maso’d abantalan. Pogulu po popoingkakat i Yohuwah do pomorintaan Dau om posiliu di Yesus sobaagi’d Raja. Notilombus nangku’d nosiliu i Yesus do Raja soira’d guminuli kawagu yau hilo’d surga? Amu, mandad po yau. Di katatalib do kinotungagan di Yesus, pinopointalang i Pitrus om i Paulus dot soira minomoguno iyolo’d nubuat id Sinding 110:1 kumaa di Yesus. Ka’d Yohuwah id nubuat diti: “Irikau no dot id dawananan ku, gisom do poinsiribaon ngai ku dot id diya i pisangod nu.” (Winonsoi 2:32-35; Ibrani 10:12, 13) Piro linaid di Yesus do magandad pogulu i posilihon di Yohuwah yau’d Raja?

23. (a) Soira’d nokotimpuun i Yesus do momorinta sobaagi’d Raja do Pomorintaan do Kinorohingan? (b) Nunu opinsingilaan toko id kotob do sumusuhut?

²³ Piipiro toun pogulu i 1914, iso tinimungan Kristian dit otulid ginawo nakarati dot toun dilo oponting kopio id nubuat do Baibol. Mantad di toun 1914 koinsanai naantakan hiti’d pomogunan popokito dot otopot kopio iyolo. Id toun dilo nokotimpuun no i Yesus do momorinta sobaagi’d Raja. (Sinding 110:2) A no alaid mantad dilo, pinataam i Rogon hiti’d tana, om baino “oilaan no dau dot a no alaid o maso dau.” (Pinointalang 12:12) Id kotob sumusuhut, intangan toko kointalangan dit lobi’d ogumu dot poimpasi toko id maso dilo. Kopinsingilo toko nogi dot a no alaid pootuson do Pomorintaan do Kinorohingan o hontolon di Yohuwah hiti’d tana.​—Intangai Sinuratan id Tohuri 22.