Pisasawaan​—Nipuhawang Do Kinorohingan

1, 2. (a) Nunu lansanon di wagu po’d misasawo? (b) Nunu poguhatan dit pogibara-barasan toko id kotob diti?

SOROHO pogi i misasawo id tadau pisasawaan diyolo. Ounsikou tomod iyolo om alansan dot poingompus o pisasawaan diyolo.

² Nga kogumuan do pisasawaan a i poingompus do olumaag. Moi’d otilombus do olumaag, oporlu i misasawo’d ponontudukan mantad do Kinorohingan. Kaino pogibara-barasai toko sisimbar do Baibol kokomoi poguhatan diti: Nunu kasanangan do pisasawaan? Poingkuro ko’d momili koruhang dit osonong? Poingkuro ko’d sumiliu sawo toi sinawo dit osonong? Om Nunu it kouhup do potimporon dot pisasawaan nu?​—Basao Boros dot Aralom 3:5, 6.

APATUT OKU NANGKU’D MANANSAWO?

3. Oporlu nangku o sosongulun do manansawo moi’d olumaag? Pointalango.

³ Piipiro tulun otumbayaan dot sosongulun oporlu’d manansawo moi’d olumaag o koposion. Nga pomusarahan diti a i otopot. Nokoboros i Yesus, koposion dit poimbujang nogi nga iso ot nipuhawang. (Matius 19:11, 12) Om minoboros nogi i Paulus piipiro kasanangan dot koposion dit poimbujang. (1 Korintus 7:32-38) I pogi, iya sondiri ot momonsoi kootuson ondung momili ko’d manansawo toi amu. Kada pologoso tambalut, sampaganakan, toi koubasanan dot mongunsub diya’d manansawo.

4. Nunu piipiro kasanangan do pisasawaan dit osonong?

⁴ Nokoboros o Baibol dot pisasawaan nopo nga nipuhawang do Kinorohingan, om haro nogi kasanangan nung manansawo o sosongulun. Minoboros i Yohuwah kumaa di Adam kusai dit timpuuni: “A i osonong do songulun-ngulun iti tulun. Momonsoi Oku po do koruhang dau di kosudong kopio dau do monguhup dau.” (Kinawansayan 2:18) Winonsoi di Yohuwah i Hawa do sumiliu’d sinawo di Adam, om iyolo no it nosiliu sampaganakan di timpuuni. Nung kitanak iyolo, mositi ogirot o pisasawaan diyolo moi’d kaanu papagayo do tangaanak diyolo id kowoyoon dit osonong. Nga okon ko maganak noo o koudsuur do manansawo.​—Sinding 127:3; Iposus 6:1-4.

5, 6. Poingkuro pisasawaan milo piagalon do ‘tali tolu santabid’?

⁵ Ka’d Suliman: ‘Osonong nogi do duwo o tulun ko mantad do songulun-ngulun. Tu kumaraja nopo i duwo o tulun om osonong-sonong no iyolo’d kumaraja. Tu ondung aratu i tiso, nga uhupan i iyau di tiso dau. Nga aratu nopo it iso-iso, om obungou no, tu aiso no o milo’d monguhup dau. Tali nopod tolu santabid om alanut i om apagon dot oputut.’​—Gomponuduk 4:9-12.

⁶ Pisasawaan dit osonong koposiliu’d piombolutan togirot di misasawo, it monguhup, mongudsuur, om mongintirung tiso om tiso. Tupus kopogirot do pisasawaan, nga lobi ogirot ondung sumamba di Yohuwah i misasawo. Nung popogulu iyolo di Yohuwah, pisasawaan diyolo osiliu’d miagal ‘tali tolu santabid.’ Otopot, tali dit pinogikokogos do tolu santabid, lobi ogirot mantad ko duo o tali santabid. Miagal nogi dii o pisasawaan, lobi’d ogirot nung poinghompit i Yohuwah.

7, 8. Nunu pononsunudan dit pinatahak di Paulus kokomoi’d pisasawaan?

⁷ I misasawo, kaanu’d momurimon kosioonuan piromutan do seks. (Boros dot Aralom 5:18) Nga nung manansawo o sosongulun dot manu no’d kasantaban do seks, a kanto yau abaal do momili’d koruhang. Minoboros o Baibol dot apatut do manansawo o sosongulun soira ‘kopusus yau do korohian do tinan dau.’ (1 Korintus 7:36) I pogi, kaanu yau’d momusorou lobi aralom om abaal dot momili koruhang.​—1 Korintus 7:9; Yakub 1:15.

⁸ Nung momusorou ko’d manansawo, soroho no dot koinsanai pisasawaan kotoguang do pogumbalaan. Ka’d Paulus, ‘ogumu-gumu nondo o kosusaan do timbabaon di nakasawo.’ (1 Korintus 7:28) Pisasawaan dit osonong piya nga kotoguang do kosusaan. I pogi nung manu ko’d manansawo, pilio no koruhang nu miampai’d kabaalon.

KARALANO MOMILI’D KORUHANG DIT OSONONG

9, 10. Nunu kanto ot osiliu ondung manansawo toko’d tulun dit a sumamba di Yohuwah?

⁹ Soira momili ko’d sawo toi sinawo, soroho no ponontudukan do Baibol diti: “Kada kou sokodung do tulun dit okon ko sopikotumbayaan.” (2 Korintus 6:14, NW) Songulun gompongumo a momoguno’d duo tayam dit a miagal o ginayo om ginoris id iso bokku do mamaragus, moi’d a oinggorit o tayam-tayam diri. Miagal nogi dii, nung manansawo o susumamba di Yohuwah miampai’d tulun dit a sumamba di Yohuwah, iti kapanahak ogumu o kobolingkangan. I pogi manu o Kinorohingan do manansawo toko miampai tulun dit sopikotumbayaan.​—1 Korintus 7:39.

¹⁰ Somoonu, piipiro tulun Kristian momusorou dot lobi osonong manansawo do tulun dit okon ko sopikotumbayaan mantad ko osongulunan. Tantu’d monosol toko nung a toko tumanud ponontudukan do Baibol. Sobaagi’d susumamba di Yohuwah, sambaan toko nopo nga hal dit oponting kopio id koposion toko. Nung manansawo toko miampai tulun dit okon ko sopikotumbayaan, kaanu toko toi’d popoilang hal dit oponting kopio kumaa’d koruhang toko? I pogi, kogumuan tulun Kristian momili’d poimbujang mantad ko manansawo tulun dit a mupus om a sumamba di Yohuwah.​—Basao Sinding 32:8.

11. Poingkuro ko’d momili koruhang dit kosudong?

¹¹ Okon ko komoyon do koinsanai tulun di sumamba di Yohuwah kosiliu sawo om sinawo dit osonong montok diya. Nung kosorou ko manansawo, pogihum no’d sosongulun dit kouhangan nu om it kosudong montok diya. Pogihum no’d sosongulun it kidimpoton miagal diya id koposion om i popogulu’d Yohuwah. Panganu no’d timpu dot mambasa om mongimuri ponontudukan dit pinatahak do susuhuon dit otorodok om it oilo.​—Basao Sinding 119:105.

12. Nunu it nopinsingilaan toko mantad suntu di Abraham?

¹² Id piipiro pogun, koubasan do tongomolohing o momili’d koruhang do tanak diyolo. Tadat diti gunoon nogi id maso do Baibol. Nung tumanud o sampaganakan nu do tadat miagal diti, kouhup o Baibol do molohing nu’d abaal do momili. Sobaagi’d suntu, soira minomili i Abraham do sinawo di Isak i tanak dau, minogihum yau sumandak dit mupus di Yohuwah om okon ko sumandak dit kaya toi ongkipangkat​—Kinawansayan 24:3, 67; intangai Sinuratan id Tohuri 25.

KARALANO’D MOMONSOI POSODIAAN DOT MANANSAWO

13-15. (a) Poingkuro songulun kusai kaanu sumodia dot sumiliu sawo dit osonong? (b) Poingkuro songulun tondu kaanu sumodia dot sumiliu sinawo dit osonong?

¹³ Ondung kosorou ko’d manansawo, sorohon po nung otopot do nokosodia ko no. Nga kaino pogibara-barasai toko nunu komoyon do nokosodia do manansawo.

¹⁴ Nung kusai ko dit manu’d manansawo, apatut do sorohon nu ondung nokosodia ko no sumiliu tulu do sampaganakan. Manu i Yohuwah do songulun sawo dit kaanu momogompi kosusukupan don tinan, topurimanan do sinawo om nogi tangaanak dau. Lobi oponting, sawo mositi’d momoyo’d sampaganakan dau id hal-hal di don rusod. Ondung a momogompi o songulun kusai do sampaganakan dau, ka’d Baibol lobi “araat po iyau ko i tulun dit a notumbayaan.” (1 Timotius 5:8) I pogi, songulun kusai dit manu’d manansawo mositi’d momusorou kopio ponontudukan do Baibol diti: “Kada po panansawo dot a nu po kosodia o tumo nu, om aiso po o pogihuman nu do kaakan-akanan.” Komoyon nopo diti nga, pogului’d manansawo, sorohon po kopio ondung kaanu ko’d mananggung tonggungan dit pinatahak di Yohuwah.​—Boros dot Aralom 24:27.

¹⁵ Songulun tondu dit kosorou’d manansawo, mositi’d momusorou ondung nokosodia do mananggung tonggungan sobaagi’d sinawo om tina. Noroitan do Baibol, songulun sinawo oponting do kikowoyo-woyoon om kikabaalon. (Boros dot Aralom 31:10-31) Baino, kogumuan kusai om tondu momusorou no’d kokomoi kosioonuan sondiri mantad ko koruhang diyolo. Nga manu i Yohuwah do momusorou toko kokomoi nunu it milo dati’d patahakon kumaa’d koruhang toko.

16, 17. Ondung kosorou ko’d manansawo nunu it imurianan nu?

¹⁶ Pogului’d manansawo imurianai no nunu it pinoboros di Yohuwah kokomoi sawo om sinawo. Mulong piya’d sawo nopo nga tulu do sampaganakan, nga a yau milo’d momonsoi nunu nopo tumanud no’d korohian dau. Tulu sampaganakan dit osonong nopo nga momit di Yesus it mupus om momogompi sidang dot tosonong-sonong. (Iposus 5:23) Miagal nogi dii o sinawo tu mositi’d monokodung do kootuson dot sawo dau om misokodung do kumaraja. (Rum 7:2) Oporlu iyau’d muhot dot, “Kaanu oku toi’d tumuku montok kokuasaan songulun kusai dit kibohiton?” Nung amu, osonong nogi’d a manansawo.

¹⁷ I misasawo oporlu’d popogulu’d kolumaagan do koruhang diyolo. (Basao Pilipi 2:4.) Ka’d Paulus: ‘Mositi no’d oupus o pointikid-tikid do kusai di sinawo dau do miagal dot oupus do dau’d tinan. Om pointikid-tikid do tondu mositi no’d tumotos do momusou di sawo dau.’ (Iposus 5:21-33) Tantu no’d koinsanai tulun manu upuson om pusohon. Nga moi’d kipisasawaan dit olumaag, oporlu o kusai kopuriman dot opusou i sinawo kumaa dau om sinawo nga oporlu nogi kopuriman dot mupus i sawo kumaa dau.

18. Id timpu’d midating, nokuro tu mositi’d antaan-taan di kusai om tondu?

¹⁸ Id timpu do midating nopo nga maso’d songulun kusai om tondu dot mintutun lobi’d aralom kumaa tiso om tiso. Mositi kikowoyo-woyoon iyolo’d otulid om antangan kopio ondung apatut iyolo’d misasawo toi amu. Oporlu nogi iyolo minsingilo karalano do monongkiboros om mamarati suang do ginawo kumaa tiso om tiso. Solinaid piromutan diyolo lobi ogirot, kopuriman iyolo’d agayat om rumohian do tinan tiso om tiso. I pogi oporlu iyolo’d momusus do dau’d tinan moi’d a kowonsoi nunu it aiso o moral. Tupus dit otopot mangantob diyolo momonsoi nunu nopo it karaag do piromutan diyolo om i don rusod diyolo.​—1 Tosolunika 4:6.

PISASAWAAN DIT POINGOMPUS

19, 20. Nunu pomusarahan do tulun Kristian kokomoi’d pisasawaan?

¹⁹ Pisasawaan id kogumuan buuk om wayang kikolimpupuson dit osonong. Id koposion dit ototopot, tadau do pisasawaan nopo nga kotimpunon nogi. A i Yohuwah manu’d kopitongkiad i misasawo.​—Kinawansayan 2:24.

²⁰ Baino, kogumuan do tulun momusorou pisasawaan miagal ko piromutan dit toruhai. Opurimanan diyolo dot nung koimbulai nopo kobolingkangan, iri no maso diyolo’d mitongkiad. Nga soroho no, piagalon do Baibol o pisasawaan miampai tali tolu santabid. Tali miagal dilo a osinang do oputut. Nung sumondiu toko ponontudukan di Yohuwah, tantu’d poingompus o pisasawaan toko. Ka’d Yesus: “Nunu nopo i nopiiso do Kinorohingan om a no koino-ino do pitongkiadon do tulun.”​—Matius 19:6.

21. Nunu it kouhup di misasawo do potilombus dot tupus diyolo?

²¹ Koinsanai dati nga haro kokorisan om koluhayan. I pogi, nung montong toko no’d koluhayan do koruhang toko, a toko i olumaag. Nga, nung montong toko’d kowoyo-woyoon dau dit osonong, kopuriman toko indo’d pisasawaan dit olumaag. Kowonsoi toko nangku miagal dilo? Oo! Koilo i Yohuwah do koinsanai koluhayan toko, nga intaan nopo Dau nga kosonongo dati. Ka’d sinding, “Ondung sorohon kasai Nu i dusa dahai, om isai poddi o kopoggidu do mantad id hukuman?” (Sinding 130:3) Sawo om sinawo mositi’d momit do poomitanan di Yohuwah miampai’d montong no’d kosonongo do koruhang diyolo om mangampun tiso om tiso.​—Basao Kolosi 3:13.

22, 23. Poingkuro i Abraham om i Sara popokito poomitanan dit osonong montok dit misasawo?

²² Solinaid do timpu, lobi kogirot o pisasawaan. I Abraham om i Sara kipisasawaan dit olumaag. Kiumur kanto i sara lobi’d 60 o toun soira sinuhu di Yohuwah i Abraham dot mundaliu mantad kuta do Ur. Soroho pogi songkuro sinusa di Sara dot mundaliu mantad do walai dau dit osonong om miyon id kiim. Nga iyau songulun tambalut om sinawo dit osonong, om nogi mamantang di sawo dau. I pogi monokodung iyau’d kootuson di Abraham miampai poimponu o ginawo.​—Kinawansayan 18:12; 1 Pitrus 3:6.

²³ Pisasawaan dit osonong okon ko komoyon dot miagal kasai o pomusarahan diyolo id nunu nopo. Id iso kinaantakan, soira’d a misokodung i Abraham om i Sara, sinunudan di Yohuwah i Abraham dot, ‘Pohubayaan nopo i Sara.’ Winonsoi di Abraham miagal diri, om hal diti kikootuson dit osonong. (Kinawansayan 21:9-13) Somoonu, misuai kanto pomusarahan nu miampai’d koruhang nu. Nga kada kapaasai. Potilombuso no pinggisaman nu’d popokito’d tupus om mamantang tiso om tiso.

24. Poingkuro pisasawaan toko’d kapamarayou di Yohuwah?

²⁴ Id sidang Kristian, rinibuan ot misasawo dit olumaag. Nung manansawo ko, soroho no’d momili koruhang nopo nga kootuson dit oponting. Isai o pilion nu koimbayat do koposion nu. I pogi, pokianu no’d ponontudukan di Yohuwah, moi’d abaal ko’d momili, kosodia kopio’d manansawo, om popogirot do piupusan dit kapamarayou di Yohuwah.