Mositi’d Opulang Om Olidang O Tulun Di Yohuwah

1-3. (a) Nokuro tu songulun tina manu’d opulang o tanak dau? (b) Nokuro tu manu i Yohuwah dot opulang om olidang o tulun Dau?

SOROHO pogi songulun tina dit obingupus do monguhup tanak dau sumodia do moi sikul. Podsuon om rosukan dau dit opulang om oulud i tanak dau, moi dot olidas om kopokito tulun suai dot ogompi kopio i molohing kumaa dau.

² I Yohuwah Tapa toko, manu’d opulang om olidang toko. (Oturan 11:44, 45) Koilo Yau dot soira’d opulang toko, iti kapasanang dati om kopogowit pamarayahan kumaa Dau.​—Yohoskiol 36:22; basao 1 Pitrus 2:12.

³ Nunu komoyon dot opulang om olidang? Nunu koinsanangan nung opulang om olidang toko? Kaino ihumo sisimbar do poguhatan diti moi’d oilaan toko nunu it apatut do simbanan.

NOKURO TU MANU TOKO DOT OPULANG OM OLIDANG?

4, 5. (a) Nokuro tu manu toko’d opulang? (b) Poingkuro it winonsoi di Yohuwah monuduk dati pomusarahan Dau kokomoi’d kopulango?

⁴ Tinudukan toko di Yohuwah dot sumiliu’d opulang om olidang mantad poomitanan Dau. (Oturan 19:2) I pogi mositi’d opulang om olidang toko tu “momit do kowoyo-woyoon do Kinorohingan.”​—Iposus 5:1.

⁵ Koinsanai dit winonsoi di Yohuwah, monuduk dati dot oponting o kopulango montok Dau. Winonsoi di Yohuwah o kitar semula jadi moi dot opulang o tongus om waig toko. (Yoromia 10:12) Sobaagi’d suntu, winonsoi di Yohuwah o Mikrob. Ilo nopo nga benda hidup dit okoro om okito maya no’d mikroskop. Mikrob kaanu monimban kakamot dit iyadaan it koligogon dot osiliu’d a koligogon. Surupu do sains momoguno mikrob do mamalangga ririnomos dit winonsoi’d tongoulun.​—Rum 1:20.

6, 7. Poingkuro Toturan di Musa dot popokito’d manu i Yohuwah do opulang om olidang o susumamba Dau?

⁶ Koilo toko’d oponting o kopulango mantad Toturan dit pinatahak di Yohuwah kumaa’d tulun Israil maya di Musa. Sobaagi’d suntu, tontok id Tadau Pongompunan do Dusa, induo i boyoon do tugama do modsu. (Oturan 16:4, 23, 24) Tongoboyoon do suai nga mongoug do longon om gakod pogului’d papatahak do porsombahan. (Kinosoliwanan 30:17-21; 2 Susui 4:6) Id piipiro kaantakan, tulun dit a tumanud do toturan diti hukumon do kapataion.​—Oturan 15:31; Pongintaban 19:17-20.

⁷ Poingkuro do baino? Kopinsingilo toko’d pomusarahan di Yohuwah kokomoi’d kolidango maya’d Toturan di Musa. (Maliaki 3:6) Pinopokito o toturan diri dot manu i Yohuwah do susumamba Dau dot opulang om olidang. A i Yohuwah insan do nokosimban. Baino manu Yau dati dot otimporon do opulang om olidang.​—Yakub 1:27.

KOMOYON DOT OPULANG OM OLIDANG

8. Id karalano do nunu mositi’d opulang toko?

⁸ Id pomusarahan di Yohuwah, opulang okon ko id tinan toko, pananrasuk, om walai toko noo, nga kohompit nogi id sambaan, kowoyo-woyoon, om pomusarahan toko. Ondung manu toko opulang id mato di Yohuwah, gompion toko o kopulango id koinsanai karalano id koposion toko.

9, 10. Nunu komoyon dot sambaan dit olidang?

⁹ Sambaan dit olidang. Minsodu toko do sambaan dit a otopot. Tontok natanggayan o tulun Israil id Babil, nosorilian iyolo’d tulun dit sumamba do ponokokinorohingan. Minonubuat i Yosaya dot koguli kaagu iyolo id Israil om kotonduli kaagu sambaan dit otopot. Ka’d Yohuwah: “Tongkiad kou no kopio’d Babil, koinsanai dokoyu i mananaan do pakakas do Walai’d Sasambayangan dot Agayo! Om kada kou ongoi igit di konunu-nunuan do sosomu; lidangai no dokoyu o tinan dokoyu.” Sambaan diyolo kumaa di Yohuwah a milo’d aralatan dot ponudukan, tadat, toi koubasanan do tugama dit a otopot id Babil.​—Yosaya 52:11.

¹⁰ Minsodu o tulun Kristian mantad tugama dit a otopot. (Basao 1 Korintus 10:21.) Id pointongkop do pomogunan, ogumu koubasanan, tadat, om kotumbayaan mantad ponudukan tugama dit a otopot. Sobaagi’d suntu, otumbayaan o tulun dot haro i poimpasi kasai mulong piya’d napatai toko no. (Gomponuduk 9:5, 6, 10) Mononsog kanto dati o sampaganakan toko dot tumanud tadat dit kohompit o ponudukan dit a otopot. Nga kada toko ponokiala tu manu toko’d otimporon do olidang id mato di Yohuwah.​—Winonsoi 5:29.

11. Nunu komoyon do kowoyo-woyoon dit olidang?

¹¹ Kowoyoon dit olidang. Moi’d olidang id mato di Yohuwah, mositi minsodu toko do seks dit sosomu. (Basao Iposus 5:5.) Id Baibol, ka’d Yohuwah, “insodu kou no do mantad id tampahu.” Pinointalang Dau dot tulun dit momonsoi dit sosomu om a rumologo, ‘a kasanganu do Pomorintaan do Kinorohingan.’​—1 Korintus 6:9, 10, 18; intangai Sinuratan id Tohuri 22.

12, 13. Nokuro tu mositi kipomusarahan toko dit olidang?

¹² Pomusarahan dit olidang. Koimbayat o pomusarahan toko id wonsoion toko. (Matius 5:28; 15:18, 19) Nung kipomusarahan toko dit olidang, ounsub toko’d momonsoi dit olidang nogi. Nga iyati kibohiton, om soomonu koimbulai o pomusarahan dit sosomu. Ondung a toko pataamon o pomusarahan dit sosomu diti, tantu’d ososomu nondo o pomumusorou toko om oimbayatan do momonsoi dit sosomu. I pogi, suangan toko pomusarahan toko do pomumusorou dit olidang. (Basao Pilipi 4:8.) Apatut toko nogi’d minsodu’d pomomoinan dit sosomu toi i kororongit. Oporlu toko’d antaan-taan o babasaon, nunu it intangan, om i poboroson toko.—Sinding 19:9, 10.

¹³ Moi’d otimporon id tupus do Kinorohingan, mositi olidang toko id sambaan, kowoyo-woyoon, om pomusarahan. Suai ko iri, opulang nogi o tinan toko.

OPULANG O KOTINAN-TINANO

14. Nokuro tu oponting o kopulango id kotinan-tinano toko?

¹⁴ Nung opulang o kotinano toko, iti kopogowit do kasanangan montok dati om tulun id posorili toko. Kopuriman toko’d osimbayan o ginawo om tulun suai nga orohian do minsomok dati. Nunu it oponting, kapamarayou toko di Yohuwah. Sobaagi’d suntu, nung kokito toko songulun tanak it asaru’d ayamut, okon toi ko kipomusarahan toko dit a osonong kokomoi molohing dau? Miagal nogi dii, nung a toko opulang, iti mongindaraat do ngaran di Yohuwah. Ka’d Paulus: ‘A iyahai asanangan do pasalaon iti karaja dahai. Om tumotos kopio iyahai dot a momonsoi di sumiliu do paantakan do tulun do papasala diti karaja dahai. Suwai ko nunu nopo o wonsoion dahai om iri no o maan dahai do popokito do susuhuon iyahai’d Kinorohingan.’​—2 Korintus 6:3, 4.

15, 16. Nunu wonsoion toko moi’d opulang kasai o tinan toko?

¹⁵ Tinan om pakayan toko. Oponting do momogompi toko’d kopulango tinan do monikid timpu. Sobaagi’d suntu, modsu toko’d monikid tadau. Mongoug toko nogi’d longon miampai sabun om waig, lobi po’d pogului dati mogonsok toi makan om katalib do momoguno pagawasan toi kopongigit dit sosomu. Koubasan mongoug do longon kopoinsodu dati mantad toruol dit rumoliu. Iti kointirung do koposion. Ondung aiso o pagawasan toko, nga kakal i do kiralan toko’d suai. Tulun do Israil di pogulu nga aiso o pagawasan, i pogi tontok do moi iyolo taii mongukad iyolo’d luang om olitan diyolo’d tana om nogi mositi osodu mantad do kinoiyonon om torobong diyolo.​—Ponugutan 23:12, 13.

¹⁶ Pakayan toko a tagal do apagon toi tumanud do pananrasuk dit koubasan do dinondo. Nga pakayan toko mositi’d opulang om odoropi. (Basao 1 Timotius 2:9, 10.) Manu toko do pakayan dit kopomolidang do ngaran di Yohuwah.​—Titus 2:10.

17. Nokuro tu oponting do momogompi’d kopulango walai om id posorili dati?

¹⁷ Walai om id posorili’d toko. Hinonggo toko nopo’d poingiyon, oporlu dot momogompi toko’d kopulango. Momogompi toko nogi kopulango do korita, motosikol toi bosikol toko, om lobi po’d nung gunoon toko moi pitimungan toi popinhabar. Id popinhabaran, monuduk toko’d tulun kokomoi kopulango do tana paradais. (Lukas 23:43; Pinointalang 11:18) I pogi, soira’d momogompi toko’d kopulango walai om id posorili dati, iti kopokito do sumodia toko no’d moi id pomogunan do wagu dit opulang.

18. Nokuro tu oponting do momogompi’d kopulango do Walai Pitimungan toko?

¹⁸ Id walai pitimungan toko. Momogompi toko’d kopulango do Walai Pitimungan om kinoiyonon do suai it gunoon toko mogititimung toi konvensyen. Iti kopokito dot oponting o kopulango montok dati. Om soira haro tulun dit insan nogi rumikot id Walai Pitimungan om kokito’d kopulango’d Walai Pitimungan toko, iti kopomolidang do ngaran di Yohuwah. Koinsanai toko nga kaanu mogisosokodung dot momogompi kopulango om popoinsonong do Walai Pitimungan.​—2 Susui 34:10.

IYAADAI O KOUBASAN DIT ARAAT

19. Nunu it mositi’d ilagon toko?

¹⁹ A pinoposurat o Baibol do koinsanai’d koubasan dit araat it mositi’d ilagon toko, nga Baibol kiponontudukan dot monuduk dati’d kokomoi pomusarahan di Yohuwah. A Yau manu’d monigup toko, kasala momoguno’d dadah toi tinumon dit kaawuk. Tu iti koponiba do koposion toko, om kaparaag do kolidasan toko om tulun id posorili dati. Ogumu tulun tuminingkod di koubasan dit araat diti tu momogompi iyolo’d kolidasan. Nung tambalut toko’d Kinorohingan, mositi’d minsodu toko mantad diti. Nokuro? Tu mupus toko di Yohuwah it minanahak do koposion. Songulun tondu minoboros dot, kaanu iyau’d pataam dot koubasan dit araat miampai’d ponguhupan di Yohuwah. Kainou pogibara-barasai toko limo ponontudukan do Baibol it kouhup dati’d pataam koubasan dit araat.

20, 21. Nunu koubasan dit manu i Yohuwah dati do minsodu?

²⁰ ‘Om lidangai toko no o tinan toko do mantad id koinsanai di kososomu do tinan om ginawo toko. Om koronok toko no do Kinorohingan, om milo toko’d momonsoi di kohubayaan do Kinorohingan dot id suang do koposi-posion toko.’ (2 Korintus 7:1) Manu i Yohuwah dot minsodu toko’d mantad koubasan dit araat it kapamaraag do pomusarahan om tinan toko.

²¹ Iso o sabap nokuro tu “olidang toko mantad koinsanai dit sosomu” haro poinsurat id 2 Korintus 6:17, 18. Ka’d Yohuwah: “Kada no ongoi ponongkuro-kuro di sosomu.” Om minamatos nogi Iyau dot: “Om romiton Ku indo iyokoyu. Sumiliu Oku nondo do Tapa dokoyu om sumiliu kou do tangaanak Ku.” Otopot, mupus kopio i Yohuwah dati miagal ko songulun tapa dit mupus do tangaanak dau nung minsodu toko mantad koubasan dit angaraat.

22-25. Nunu piipiro ponontudukan it kouhup dati’d tumingkod mantad koubasan dit araat?

²² ‘Upuso no i Yohuwah, i Kinorohingan nu do mikuwo’d aayi-ayi o ginawo nu, om aayi-ayi’ o koposi-posion nu, om aayi-ayi o pomusarahan nu.’ (Matius 22:37) Iti no ponuhuan dit oponting kopio. (Matius 22:38) A toko kaanu‘d momonsoi miagal dilo nung kakal toko i’d momonsoi nunu nopo it kopoligogon dot koposion toi kaparaag dot pomusarahan toko. I pogi apatut do mongunsikou toko’d koposion dit pinatahak kumaa dati.

²³ ‘Minanahak i Yohuwah do koposion, pinuhobo, om koinsanai’d nunu nopo dot id tulun.’ (Winonsoi 17:24, 25) Nung onuan ko’d tambalut nu titahak dit poinlolobi, pataamon nu toi raagon nu nangku? Amu kon. Miagal nogi dii, koposion titahak dit poinlolobi mantad di Yohuwah. Nung mongunsikou toko koposion toko, tantu no’d masi toko id karalano dit kopomolidang Dau.​—Sinding 36:10.

²⁴ ‘Upuso no o sompi ko iyau ngai do miagal dot oupus ko do diya’d tinan.’ (Matius 22:39) Koubasan dit araat karaag do tinan toko om tulun id posorili toko, lobi-lobi po sampaganakan toko. Sobaagi’d suntu, songulun it a monigup kotoguang kanto’d toruol tu haro id sampaganakan dau dit monigup. I pogi, nung mupus toko’d tulun suai, tumingkod toko momonsoi koubasan dit araat.​—1 Yohanis 4:20, 21.

²⁵ “Posorohon no i tulun dit id suang do koinsanai di sidang nu do mositi’ no do minsiriba iyolo dot id boyoon om id pomorinta do pomogunan.” (Titus 3:1) Kogumuan do pomorinta mogodu’d rayat dau dot kiharo toi ko momoguno’d dadah. Mositi’d mumboyo toko’d tundang-undang diti tu sinuhu toko di Yohuwah dot mamantang do pomorinta.​—Rum 13:1.

26. (a) Nunu ot wonsoion toko moi’d osiliu tambalut di Yohuwah? (b) Nokuro tu tumanud toko’d ponudukan di Yohuwah?

²⁶ Nung manu toko’d sumiliu tambalut di Yohuwah, oporlu doti dot kiponimbanan toko. Okon ko osinang dot tumingkod do koubasan dit araat nga kodimpot toko kasai tu minamatos i Yohuwah do monguhup dati. Ka Dau, ‘Iyoho no i Yohuwah, i Kinorohingan nu. Orohian Oku do monuduk diya di popoinsonong diya om potunud Oku diya id ralan dit apatut nu’d susuyon.’ (Yosaya 48:17) Soira’d minggisom toko do opulang om olidang, iti kopomolidang do Kinorohingan.