Lo̱ndo̱ la ndutu jasumwe̱ Babilon po̱ o Israel di ta langame̱n no̱ngo̱ lambo ka myo̱di mine̱i, nde Yehova a ta a kakane̱ o sumwa mambo me̱se̱ ma wusa jeke̱ betimbedi ba tumba lao. Bonayuda ba jemea ba ta ba bia ná nje ba wusano̱ tombwane̱ o timba labu e ta e petane̱ nate̱n’o ’yidi mambo me̱se̱ ba dīno̱ ombusa. Bonam bo buki me̱se̱ bo ta nde jowe̱ labu. Tempe̱l a Yehova e si ta o mundi ma Babilon. Diyo̱ to̱ diwo̱ di si ta owe̱ni Bonaisrael ba wusano̱ bola mabea kaponda mbend’a Mose, to̱ mo̱me̱ne̱ prisi i te̱se̱be̱ o bola ma mabea. Mbata na nika, muso̱ngi ma baboledi ba Yehova mu ta bosadi jita kobisan na ma basibi, bena ba si ta ba bola Yehova to̱ bete̱sedi bao edube. Lokoli la Bonayuda bena ba ta ba to̱ndo̱ Yehova ba ta so̱ musunga o timba o ekombo abu, owe̱ni ba wusano̱ te̱se̱ jowe̱ la bosangi peńa. w23.05 14-15 § 3-4

Di be̱n ńo̱ng’a jongwane̱ la mudī musangi ma Loba ná di benge die̱le̱ biso̱me̱ne̱ “ka bana ba mwe̱ne̱n.” Ońola nje e? Ońolana ye ndutu jita o benga be̱ ko̱nji o nin wase ni titi ko̱nji. (1 Tes. 4:3-5, 7, 8) Mudī musangi mwe ná mongwane̱ biso̱ o janane̱ mo̱nge̱le̱ ma nin wase na mabie̱ ma mate̱nge̱ne̱ jo̱nge̱le̱ la Loba. Mudī musangi mwe pe̱ ná mongwane̱ biso̱ o ya ńai a bepuma ba “bwam ye̱se̱ na te̱me̱ la sim.” (Efe. 5:9) Mbadi po̱ ńa kusa mudī musangi ńe nde ná di baise̱ mo̱ Yehova o muka. Yesu a kwali ná Yehova a me̱nde̱ “bola ba ba mapulane̱ mo̱ mudī musangi.” (Lukas 11:13) Di makusa pe̱ mudī musangi ke̱ di masesa Yehova mwemba na bonasango asu o ndongame̱n. (Efe. 5:19, 20) Ngiń’a mudī musangi ma Loba e me̱nde̱ jongwane̱ biso̱ o die̱le̱ longe̱ lasu o mbadi ni do̱lisan Loba. w24.03 23-24 § 13-15

Mo̱, o mapula bata be̱ we̱lisane̱ e? Yete̱na e, kane̱ ońola nika. We̱lisane̱ le nde epuma ewo̱ ya mudī ma Loba. (Gal. 5:22, 23) Je so̱ ná di kane̱ Yehova ná a bole biso̱ mudī mao musangi, ongwane̱ pe̱ biso̱ o sa bepuma ba mu mudī. Je te̱ o bete̱medi yeno̱ biso̱ ndutu o be̱ we̱lisane̱, di benge ‘jue̱le̱’ mudī musangi, ná mongwane̱ biso̱ o be̱ we̱lisane̱. (Lukas 11:13) Je pe̱ ná di baise̱ Yehova ná ongwane̱ biso̱ o je̱ne̱ mambo kapo̱ ka mo̱. Ombusa biso̱ kane̱, jangame̱n bola me̱se̱ ná di be̱ we̱lisane̱ buńa te̱. Di bengi te̱ kane̱ o be̱ we̱lisane̱ na lee̱le̱ y’ede̱mo, Yehova a me̱nde̱ jongwane̱ biso̱ o be̱ moto ńe we̱lisane̱. Ye pe̱ mweńa jita ná di duteye ońola byembilan be o Bibe̱l. Bibe̱l e be̱n byembilan jita ba bato ba ta we̱lisane̱. Di dutedi te̱ ońola be byembilan, je ná di bia ne̱ni lee̱le̱ we̱lisane̱. w23.08 22-23 § 10-11