I ka nɔɔrɔ la Jehova kan kɛwale ɲumanw fɛ

¹ Sanfɔɲɔba dɔ mana i sɔrɔ, o ye koo ɲuman ye ka dogo yɔrɔ dɔ sɔrɔ dɛ! A bena diya i ye ka sigi yen ni tasuma be yen o dogo yɔrɔ kɔnɔ, ni farati tɛ yen, ani n’a somɔgɔw ye jatigiya di i ma. Masaya waajulibaara b’a yira mɔgɔw la cogo min na u be se k’o yɔrɔ ɲɔgɔnna sɔrɔ ka dogo Sitanɛ ka koow sigicogoya ɲɛ. Yala an ka loon o loon tagamacogo be se ka mɔgɔ wɛrɛw sama ka na o yɔrɔ lafiyanen na wa? Ɔnhɔn, sabu Yesu tun ko mɔgɔw bena ‘an ka kɛwale ɲumanw ye ka nɔɔrɔ la an sankolola Fa kan.’—Mat. 5:16, NW.

² Cogo juman na an be se ka tagama walisa an ka kɛwalew ka mɔgɔw sama ka na Jehova n’a ka ɔriganisasiyɔn ma? O ye k’a to Yesu ka kumaw k’an ka ɲɛnamaya kolo loon o loon. O kumaw fɔra Luka 6:31 ni 10:27 la. O bena an lasu ka kanuya yira an mɔgɔ ɲɔgɔnw na ani k’a yira ko an be dan na ni duniɲa mɔgɔw ye, o minw tɛ kanuya sira tagama.

³ Kurun dɔ kɔnɔ baji kan, balimamuso dɔ y’a kɔrɔsi ko muso dɔ tɔɔrɔlen lo ani a tɛ se k’a ka deen ladon. Balimamuso y’a yɛrɛ di k’o deen yɔrɔ filɛ. O muso y’a ɲininga ko cogo juman na ale be se k’a ka waleɲumanlɔnniya yira a la? Balimamuso y’a jaabi ko: ‘Jehova Seerew mana se i ka soo siɲɛ wɛrɛ, i k’o lamɛn.’ Muso y’o le kɛ, ani bi, ale n’a cɛɛ ye Seerew ye. Kɛwale ɲumanw y’a to u ye Masaya kibaro kunbɛn cogo wɛrɛ la.

⁴ A ɲɛsinnen be an ka ɲɛnamaya bɛɛ ma: Mɔgɔw be min miiri an koo la ani an ka diinan koo la, o be bɔ an ka tagamacogo la an sigida la, baarakɛyɔrɔ la, lakɔli la, ani lafiya wagatiw la. O kama, an ka kan k’an yɛrɛ ɲininga ko: ‘Mɔgɔw be ne ni n’ ka denbaya filɛ cogo di ? Yala sigiɲɔgɔnw b’a ye ko an ka soo saniyalen lo ani an ka lukɛnɛ ladonnen lo koɲuman wa? Yala an ka baarakɛɲɔgɔnw n’an ka lakɔli filankuruw b’an jate i ko mɔgɔ min be koow kɛ lɛri la ani a timinandiyalen lo wa? Mɔgɔ wɛrɛw ɲɛ na, yala an yecogo ka ɲi ani a be bonya la an kan wa?’ N’an be se k’a jaabi ko ɔnhɔn, o tuma, an ka kɛwale ɲumanw b’a to Jehova ka batoli ka mɔgɔw sama ka na koɲuman.

⁵ Piɛre ye lasɔmini kɛ ko mɔgɔw tun bena kerecɛnw tɔgɔ tiɲɛ (1 Piɛre 4:4). An ka kan ka la a la ko an tagamacogo tɛ kuma jugu sababu dɔ ye (1 Piɛre 2:12). An bena kɛ i ko lanpanw, minw sigilen be fɛɛn dɔ kan ani u be yeelen ɲuman bɔ, ni an ka kɛwale ɲumanw be nɔɔrɔ la an ka Ala kan. O la, Jehova be dogo yɔrɔ min di, an bena mɔgɔw ɲɛsin o ma.—Mat. 5:14-16.