An ɲagalilen kanbɛnna Jehova n’a dencɛ ye
Koo min ye kɔrɔtalenba ye saan kɔnɔ, o seli bena kɛ marisikalo tile 28nan
1 An kɛtɔ ka Matigi ka surafana seli kɛ saan 2002, marisikalo tile 28nan tileben kɔ, an b’a yira ko an kanbɛnnen be ni Jehova Ala ni Yesu Kirista ye. O dan na seli kɛtɔ, kerecɛn mɔlenw tɔɔ bena u ka “Jɛn” diya bɔ: jɛn min be olu ni Masaya cɛntala wɛrɛw ani Faa n’a dencɛ cɛ (1 Yuh. 1:3; Efes. 1:11, 12). “Saga wɛrɛw” miliyɔn caaman bena miiri u ka nɛɛma kan: nɛɛma cɛɲumanba min dira u ma k’u kanbɛn ni Jehova n’a Dencɛ ye, ani ka kɛ dusukun ni miiriya kelen ye n’u be Ala ka baara la. —Yuh. 10:16.
2 An ka jɛn ka baara kɛ kelenya la: Jehova ni Yesu ɲagalilen kanbɛnna tuma bɛɛ. Kabini galen, u ye jɛnɲɔgɔnya teriman kɛ sanni ka mɔgɔ dan (Mise 5:2). O la, teriya sɔbɛ sigira u fila cɛ. I ko hakilitigiya mɔgɔlaman, sanni a ka kɛ hadamaden ye, o Dencɛ fɔlɔ bangelen sera k’a fɔ ko: “Ne tun bɛ a diyanyeko kɛ don o don, ka ɲagali a ɲɛɛ kɔrɔ tuma bɛɛ.” (Ntal. 8:30, A.B.U.). Ala Dencɛ ye jɛnɲɔgɔnya teriman min kɛ kanuya Poyi yɔrɔ gɛrɛfɛ saan caaman lɔnbali, o ye nɔɔba to a kan! —1 Yuh. 4:8.
3 Hadamadenw mako tun be kunmabɔsara la. Jehova y’a Dencɛ kelenpe bangelen ɲɛnatɔmɔ, min masirilen tun be hadamadenw na bɛrɛbɛrɛ. A y’ale kɛ kunmabɔ saraka ye. O cogo kelenpe la, jigiya dira an ma (Ntal. 8:31). Jehova n’a Dencɛ kanbɛnnen be sagonata kelen kɛli la. O cogo kelen na, kanuya barikaman sababu fɛ, an fana be kanbɛn n’u ye, ani an b’an kanbɛn ka Ala sago kɛ ni ɲagali ye.
4 An k’an ka waleɲumanlɔn dunba yira: An be se k’a yira ko an be Jehova ka kanuya n’a Dencɛ ka saraka waleɲuman lɔn kosɔbɛ n’an be na Hakilijigi seli la, ani n’an be lamɛnni kɛ ni jantoli ni bonya ye. Kalan bena sinsin nin kan: Yesu ka kanuyaba ɲɛyirali, a ye kantigiya min kɛ fɔɔ ka sa walisa ka kunmabɔsara di, a ka kuntigiya i ko Ala ka Masaya Masa, ani a ka Masaya bena duga minw lase hadamadenw ma. Kalan bena an hakili jigi fana ko an mako b’a la ka timinandiya lanaya la, ka baara kɛ ni kisɛya ye ka kɛɲɛ ni Jehova sagoya ye i ko “jɛɲɔgɔnw . . . tiɲɛ baara la.” —3 Yuh. 8; Yaku. 2:17.
5 An ka mɔgɔ wɛrɛw dɛmɛ u ka jɛn n’an ye: Seere sumalen minw be kiin kɔnɔ, diinan mɔgɔkɔrɔw jɛkulu ka kan ka jijali sɔbɛ kɛ walisa k’u bɛɛ jagwɛlɛya u ka na Kirista saya Hakilijigi seli la (Mat. 18:12, 13). Balima minw ka kan ka dɛmɛ sɔrɔ, u bɛɛ tɔgɔ ka kan ka sɛbɛ janko welekan ka lase u kelen kelen bɛɛ ma.
6 Yala i be mɔgɔ wɛrɛw lɔn, minw be se ka na Hakilijigi seli la wa? A bɔ i yɛrɛ la k’u jija k’o seli waleɲuman lɔn. Welekan lase u ma ni dusu diya ye, ani a to u k’a ye ko u nako ka di i ye. An k’an seko bɛɛ kɛ ka mɔgɔw weele ka na o seli la, min ye koo kɔrɔtalenba ye saan kuru bɛɛ kɔnɔ: an ka Bibulu kalandenw bɛɛ, makodon mɔgɔw, ani an ka somɔgɔw n’an lɔnbagaw. Mɔgɔ o mɔgɔ be “Yesu Kirista lɔnniya nafaba” sɔrɔ, kunmabɔsara nafa labilanen be o tigi ye (Filip. 3:8, NW). Minw be lanaya la Kirista ka saraka kan, u be se ka ɲɛnamaya banbali jigiya sɔbɛ sɔrɔ. —Yuh. 3:16.
7 I kana a mafiɲɛya abada ko Hakilijigi seli be se ka nɔɔ to mɔgɔ kɔnɔgwɛw kan. A saan fila ye nin ye, Papouasie-Nouvelle-Guinée mara la, makodon mɔgɔ 11 ye tagama kɛ lɛri 17 bato fitinin dɔ kɔnɔ baji faratimanw kan. U tun b’a fɛ ka kɛ Hakilijigi seli la. Mun na? U ko: “An tun b’a fɛ ka jɛn ni Jehova batobagaw ye ka Kirista Hakilijigi seli kɛ. Kuun tun b’a la k’o tagama kɛ.” I ka miiri o makodon mɔgɔw ka kisɛya kan, ani u y’a yira cogo min na k’u b’a waleɲuman lɔn k’u kanbɛn ni Jehova n’a Dencɛ ye, ani kerecɛnw ka balimaya ye ɲagali la!
8 Bibulukalan kofɔ makodon mɔgɔw bɛɛ ye. U jagwɛlɛya u ka na kafo ka lajɛnw na tuma o tuma. U be tiɲɛnko minw kalanna, u jagwɛlɛya u ka dɔ fɔ mɔgɔ wɛrɛw ye. U dɛmɛ u ka ‘tagama kɛnɛ la’, ani u ka ‘kɛ tiɲɛn kan’, u kɛtɔ ka Bibulu ka sariyakolow sira tagama u ka ɲɛnamaya kɔnɔ (1 Yuh. 1:6, 7). U dɛmɛ u ka jɛnɲɔgɔnya terimanw sigi olu ni Jehova cɛ. Ani, nɛɛma min dira u ma ka baara kɛ Ala ye kelenya la, u ka to ka dɔ fara o nɛɛma waleɲumanlɔn kan.
9 An ɲagalilen kanbɛnnen ka kɛ ‘miirili kelen na, ani an ka ɲɔgɔn dɛmɛ kɛlɛ la Kibaru Duman dannaya kosɔn ni dusu kelen ye’, o ye nɛɛma cɛɲumanba ye dɛ! (Filip. 1:27, 28). An bena kerecɛnya jɛnɲɔgɔnya duman diya bɔ Hakilijigi seli la marisikalo tile 28nan. An ka to k’o makɔnɔ n’an be Jehova n’a Dencɛ waleɲuman lɔn tuma o tuma! —Luka 22:19.