An ka piyɔniye hakili yira
1 Ni see b’u ye ka kɛ piyɔniye ye sisan, wala hali ni see t’u ye, weleweledalaw bɛɛ be se ka piyɔniye hakili yira. Cikan min dira u ma ka waajuli kɛ ani ka mɔgɔw kɛ kalandenw ye, o lo ye u ɲɛnako fɔlɔ ye (Mat. 28:19, 20; Kew. 18:5). U b’u janto mɔgɔw la ani u be jijalibaw kɛ walisa k’u ka cidenyabaara dafa (Mat. 9:36; Kew. 20:24). Jehova sagokɛlaw sɔnnen be ka koo bɛɛ kɛ walisa ka mɔgɔw dɛmɛ u ka tiɲɛn lɔn (1 Kɔr. 9:19-23). An ka Filipe ka ɲɛyirali filɛ, o min ye piyɔniye hakili yira.
2 Ka waajuli kɛ ani ka mɔgɔw kalan: Saan kɛmɛ fɔlɔ kafo kɔnɔ, Filipe tun be kunkanbaarabaw dafa (Kew. 6:1-6). O bɛɛ n’a ta, ka tɛmɛ koo bɛɛ kan, a tun ye kibaro duman waajulikɛla kisɛman ye (Kew. 8:40). O cogo kelen na bi, diinan mɔgɔkɔrɔw ni kɔrɔsigi cidenw kɛtɔ k’u ka kunkanbaaraw dafa, u be se ka piyɔniye hakili yira u kɛtɔ ka bila ɲɛ waajulibaara la ni dusudiya ye. O cogo la u be dusu don kafo la kosɔbɛ!—Rom. 12:11.
3 Etiɛni salen kɔ, kɔrɔbɔliw wilila ka caya kalandenw kama k’u ka ɲɛnamaya ɲagamin. Nka Filipe tora ka waajuli kɛ, ani a kɛra sababuba ye waajuli baara daminɛna Samarikaw cɛ (Kew. 8:1, 4-6, 12, 14-17). An be se k’a ka ɲɛyirali ladegi an kɛtɔ ka timinandiya kibaro duman fɔli la n’an be kɔrɔbɔliw kunbɛn, ani an kɛtɔ ka mɔgɔw bɛɛ waaju an be minw kunbɛn, n’an tɛ mɔgɔ bɔ mɔgɔ la.—Yuh. 4:9.
4 Etiopika kuntigi tuubili lakalita b’a yira ko Filipe tun ye karamɔgɔ ye, min be se Ala ka Kuma kalan na kosɔbɛ (Kew. 8:26-38). N’an be baara kɛ ni Bibulu ye koɲuman, ani n’an be tɛmɛ vɛrisew fɛ ka mɔgɔw hakili jagabɔ, o fana ye piyɔniye hakili yiracogo dɔ ye (Kew. 17:2, 3). I n’a fɔ Filipe, an mana mɔgɔw sɔrɔ yɔrɔ o yɔrɔ, an b’a ɲini ka kibaro duman fɔ u ye tuma bɛɛ ni koow cogoya bɛnnen be.
5 Denbaya ni kafo: Filipe ka miirili n’a ka ɲɛyirali ye nɔɔ ɲuman to a denmusow kan (Kew. 21:9). O cogo kelen na, kerecɛn bangebagaw minw be Masayakow kɛ u ka ɲɛnako fɔlɔ ye, u b’u deenw jagwɛlɛya o cogo la u k’olu ladegi. Hali n’a sɛgɛnnen be lɔgɔkun laban na a ka baara kosɔn, bangebaga min be waajuli kɛ ni kisɛya ye, a be se ka nɔɔ bɔbali to a deen dusukun kan.—Ntal. 22:6.
6 Filipe ye jatigiya di Pol ni Luka ma, kerecɛn kisɛmanw, minw ɲɛɛ gwannen tun be Jehova ka baara la (Kew. 21:8, 10). Bi, cogo juman na an be se k’an ka waleɲumanlɔn yira an balima kisɛmanw la ani k’u dɛmɛ? N’a sɔrɔ an be se k’a ɲini ka piyɔniye dɔ bila sira waajuli la loon dɔ sɔgɔma wala wula fɛ n’o y’a sɔrɔ mɔgɔ caaman tɛ bɔra waajuli kama o loon na (Filip. 2:4). An fana be se k’u weele ka na wagati duman dɔ kɛ n’an ye an ka soo. An ka koow cogoya mana kɛ min o min ye, an bɛɛ k’an jija ka piyɔniye hakili yira.
[Study Questions]
1. Aw be se ka piyɔniye hakili lakali cogo di?
2. Filipe ye kisɛya min kɛ waajuli baara la, cogo juman na diinan mɔgɔkɔrɔw ni kɔrɔsigi cidenw be se k’o ladegi?
3. Cogo juman na an be se ka piyɔniye hakili yira n’an be kɔrɔbɔliw kunbɛnna?
4. Filipe ye ɲɛyirali juman to mɔgɔw kalanni ta fan fɛ?
5. Mun lo be se ka bangebagaw dɛmɛ ka piyɔniye hakili don u deenw kuun na?
6. Cogo juman na an be se k’an ka waleɲumanlɔn yira piyɔniyew la an ka kafo kɔnɔ?