I bena mun lo kɛ i ka ɲɛnamaya kɔnɔ?
1 Tuma dɔw la u be denmisɛnw ɲininga ko: “I b’a fɛ ka mun lo kɛ n’i kɔrɔbayara?” Tuma min na i tun ye kamalennin ye, yala i y’a fɔ ko i b’a fɛ ka kɛ lakɔli mɛtri, ɛnfɔrmatisɛn wala kafokulu kɔrɔsibaga ye wa? Wala tuma min na i tun ye sungurunin ye, yala i y’a fɔ ko i b’a fɛ ka kɛ sekeretɛri, dɔgɔtɔrɔmuso wala piyɔniye ye wa? Sisan, komi i kɔrɔbayara, i ka kan ka nin ɲiningali nin kɛ i yɛrɛ ye ko: ‘Ne bena mun lo kɛ n’ ka ɲɛnamaya kɔnɔ?’ Yala i labɛnnen be k’o latigɛ wa?
2 Walisa k’i dɛmɛ ka latigɛli fisaman kɛ, Jehova ka ɔrigani-sasiyɔn ye DVD nin bɔ: “Les jeunes s’interrogent... Que vais-je faire de ma vie ?” (Denmisɛnw be ɲiningali kɛ ko: Ne bena mun lo kɛ n’ ka ɲɛnamaya kɔnɔ?). I k’a filɛ ani i ka miiri kosɔbɛ a kɔnɔnakow bɛɛ kan, hali dramu, fɛtaw lakalili, ani DVD kɔnɔnako wɛrɛw fana. A kɔnɔnakow yirala koorilen nin kɔnɔ: “Menu Principal”.
3 Dramu min b’a kɔnɔ: I kɛtɔ ka dramu filɛ, i ka miiri ɲiningali ninw kan: (1) Timote min kofɔra gɛrɛkikan Sɛbɛninw kɔnɔ, ale ni Andre bɔnen be ɲɔgɔnw fɛ koo jumanw na (Kɛw. 16:1; 1 Tim. 4:8; 2 Tim. 1:5). (2) Cogo juman na u tun be digira Andre kan k’a lasun a ka kɛ farikoloɲanagɛla ŋana ye? Jɔn lo tun b’o kɛ? (3) Jɔn lo sɔrɔla ka nɔɔ ɲuman to Timote ni Andre kan? Ani o tigi y’o kɛ cogo di? (2 Tim. 1:1-4; 3:14, 15). (4) Ladili min dira Matiyu 6:24 la ani Filipekaw 3:8 la, o ye nɔɔ juman to Andre kan, ani e fana kan?
4 DVD tilanyɔrɔw: Dramu bɛɛ filɛli kɔ, i ka segi a yɔrɔ ninw kan ani i ka ɲiningaliw ninw jaabi. “Pol ni Timote”: Pol ye ladili laban juman di Timote ma? (2 Tim. 4:5). “I k’i seko fisaman kɛ Jehova batoli la”: I ka laɲinitaw ye jumanw ye Alako ta fan fɛ? “Ka tugu Jehova kɔ”: Mun lo be hɛɛrɛ sɔbɛ di mɔgɔ ma? “Mamamuso ka ladiliw”: Basi juman b’a la ka kɛ waanɛ ye Sitanɛ ka duniɲa nin kɔnɔ (Mat. 4:9)? “Nimisa foyi t’a la”: I bɔra mun lo kala ma, min be se k’i dɛmɛ ka wasa i ka ɲɛnamaya kɔnɔ?—Ntal. 10:22.
5 Dɔw ka fɛtaw lakalili: DVD yɔrɔ kelen-kelen ninw filɛtɔ, i ye mun lo ye i be se ka min ɲɔgɔn kɛ walisa k’i seko fisaman kɛ Jehova batoli la? (1) “K’i yɛrɛ bila laɲinita fufafuw ɲinini na waa, k’i yɛrɛ labila Ala ye?” (1 Yuh. 2:17). (2) “I k’a degi ka cidenyabaara koo diya i yɛrɛ ye.” (Zab. 27:14). (3) “Daa dɔ yɛlɛla cidenyabaara kama.”—Mat. 6:33.
6 Koo tɛmɛnenw: I bena ɲiningali ninw jaabi cogo di? (1) Balimacɛ ni balimamuso tun be baloɲini baara juman lo la? Mun na do? (2) U ye sanga juman sɔrɔ o la? (3) Yɛlɛmaniba juman donna u kelen-kelen ka ɲɛnamaya kɔnɔ? (2 Kɔr. 5:15). (4) Alako baara jumanw nana u ka baloɲini baara nɔɔ ta? Ani mun na u y’a jati ko u tɛ se ka timinandiya u fila bɛɛ la? (5) U kɛtɔ k’u ɲɛnakow yɛlɛma, yala u be nimisa o la hali dɔɔni wa? (6) U ye mun lo fɔ min kɔni ye ile lasun ka miiri i ka kan ka min kɛ i ka ɲɛnamaya kɔnɔ?
7 Mɔgɔ wɛrɛw ka lakalitaw: I ye kalan juman sɔrɔ o lakalitaw la i be se ka tugu minw kɔ walisa k’i timinandiya bɛrɛbɛrɛ Jehova ka baara la? (1) “Kelenna kalan nafa”, (2) “Seereya kɛcogo wɛrɛw”, (3) “Betɛli baara”, (4) “Cidenyabaara degeli Lakɔli.”—I ka Index lajɛ ka kunnafoniw sɔrɔ o koow kan gafew kɔnɔ, ani i k’i ɲɛnata kalan.
8 O cogo la, yala i y’a latigɛ i bena min kɛ i ka ɲɛnamaya kɔnɔ wa? Pol ye Timote jija ko: “I jija o kow la ka i sɛbɛ don u la walisa mɔgɔw bɛɛ k’a ye ko i bɛ taa ɲɛ.” (1 Tim. 4:15). An fana be i jija i k’o ɲɔgɔn kɛ: i ye min ye ka min mɛn DVD nin kɔnɔ, i ka miiri o kan k’i sɔbɛ don u la. I k’a ɲini Jehova fɛ a k’i dɛmɛ ka koow latigɛ ni hakilitigiya ye. O lo bena i dɛmɛ ka ɲagali ani ka wasa i ka ɲɛnamaya kɔnɔ sisan, ani ka baraji ni hɛɛrɛ sɔrɔ sini.
[Box on page 6]
MENU PRINCIPAL (DVD kɔnɔnakow)
Dramu
A tilanyɔrɔw (Yɔrɔ 11)
Fɛtaw lakalili
A daminɛ
Tilanyɔrɔbaw (3)
Hakilijigikow
DVD kɔnɔnako wɛrɛw
Mɔgɔ wɛrɛw ka lakalitaw
kunnafoniw sɔrɔyɔrɔ Index kɔnɔ o koow kan
A cɛtigɛw
Tulogwerenw
O si tɛ yen
Ka se ka DVD kɔnɔnakow sɔrɔ k’u filɛ, a’ ye tɛmɛ butɔn ninw fɛ: Suite▶, ◀ Retour, ani Menu Principal.