Cikanw ka ɲɛsin waajuliko lajɛnw kɛcogo ma

K’a ta An ka Masaya Cidenyabaara nin ma, cikan minw ɲɛsinna waajuliko lajɛnw kɛcogo ma u bena fɔ cogo nɔgɔman na. Barokun nin tun be sɔrɔ saan 2009, mɛkalo ka An ka Masaya Cidenyabaara kɔnɔ: “Waajuliko lajɛn labɛncogo.” Sisan, an bena o cikanw lakuraya ani k’u ɲɛfɔ ka gwɛ:

◼ Kalan: O be kɛ forobakalan kɛcogo la ka basigi gafe dɔw kan. Kuma tɛ di jama ma. Hakilinata minw bena kafo nafa bɛrɛbɛrɛ, kalankɛla ka kan ka sinsin olu lo kan.

◼ Ɲiningaliw ni jaabiliw: O bena kɛ La Tour de Garde kalan kɛcogo la. Kalankɛla man kan ka kuma caaman fɔ ka barokun dadon wala k’a kuncɛ. A be dakunw bɛɛ ka ɲiningaliw kɛ. Dakunw lajɛtɔ, a man kan ka kuma caya. Vɛrise jɔnjɔnw be se ka kalan wagati latigɛnen na. Dakunw man kan ka kalan fɔɔ n’a fɔra k’u ka kalan.

◼ Baro: O ye kalan ye lamɛnnikɛlaw be u dadon min na. A tɛ kɛ i ko forobakalan dɔrɔn, a bɛɛ fana tɛ kɛ ɲiningaliw ni jaabiliw cogo la.

◼ Ɲɛyiraliw ani fɛtaw ɲiningali: O cii dira balimacɛ min ma, ale lo ka kan ka ɲɛyirali koo labɛn nka ale yɛrɛ t’o ɲɛyirali kɛ. A be mɔgɔ minw sugandi k’o kɛ, u ka kan ka kɛ balima setigiw ye ani u ka kan ka kɛ ni tagamacogo ɲuman ye. N’a be se ka kɛ, a ka kan ka sara u la joona. A man fisa ka weleweledala kuraw sugandi wala minw tɛ koo caaman lɔn u ka baara kɛcogo ɲɛyira wala ka sababu di u ma u ka yɛlɛ tintin kan dɔrɔn. Nka u dɔw be se ka kɛ barokɛɲɔgɔnw ye. Minw be ɲɛyirali kɛ, u ka kan k’u janto k’u ɲɛɛ sin jama ma. U be minw ɲininga u ka fɛtaw la, olu ka kan ka yɛlɛ tintin kan ka kuma sanni ka to u sigiyɔrɔ la. Ɲɛyiraliw ni fɛtaw ɲiningali ka kan ka kɛ ka filɛ fɔlɔ. Ni wagati be ɲini ka kalankɛla minɛ, ani a ka kan ka pan kalan yɔrɔ dɔw kan, a bɛnnen tɛ a ka ɲɛyiraliw wala fɛtaw ɲiningali lasa. Kɔrɔsigi cidenw ka kan ka diinan mɔgɔkɔrɔw jɛnkulu ka koow labɛnbaga wala diinan mɔgɔkɔrɔ wɛrɛ sɛgɛrɛ ka sɔrɔ ka mɔgɔw sugandi ɲɛyiraliw ni fɛtaw ɲiningali kama.

Ni cikan tigitigi dɔw dira waajuliko lajɛn yɔrɔ dɔ koo la, kalankɛla ka kan k’a janto k’o cikanw labato. Ni balimacɛw b’u ka kalanw di ka kɛɲɛ ni cikan nunu ye, o bena kɛ sababu ye waajuliko lajɛnw ka kɛ “cogo bɛnnen na, a ko ɲɛnabɔlen koɲuman.”—1 Kɔr. 14:40.