Aw Ka Ɲiningaliw Jaabiliw

◼ Cogo juman na an be se k’a to kafo ka lajɛnw ka ban wagati latigɛnen na?

Wagati be tɛmɛ joona n’an be baro duman kɛra n’an teriw ye. O kama, a be se ka gwɛlɛya ka lajɛnw ka kalanw kuncɛ wagati latigɛnen na. Mun lo be se k’an dɛmɛ o fan fɛ?

An ka lajɛnw daminɛ lɛri la. Kafo bɛɛ mana lajɛn, nafa b’a la k’a ɲini kafodenw fɛ u ka sigiyɔrɔ ta miniti kelen wala fila sanni kalan ka daminɛ. O la, lajɛn be se ka daminɛ wagati latigɛnen na ani cogo tilennen na (Waaj. 3:1). Ni jɛkulu fitinin dɔ lo be lajɛnna, i n’a fɔ waajuli baara kama, lajɛn man kan ka daminɛ lɛri kɔfɛ walisa ka kɔfɛ mɔgɔw kɔnɔ.

An k’an yɛrɛw labɛn koɲuman. Wagati jaticogo ɲuman dɔ ye ka kɔn k’an yɛrɛw labɛn. Cii min kalifara i ma, i k’o kuun to i hakili la ka gwɛ. I ka hakilinata jɔnjɔnw woloma ka lɔn, ani i ka sinsin u kan. I kan’a to kunnafoni misɛnmanw k’i hakili bɔ kalan na. I kan’a to kalan ka gwɛlɛya. Ni ɲɛyiraliw wala fɛtaw ɲiningali dɔw b’i ka kalan na, talikɛlaw ka kɔn k’u kɛ k’a filɛ i ɲɛ na. Ni cogo b’i bolo, i ka wagati jate minɛ tuma min na i b’i ka kalan kalanna ka kaan bɔ.

I ka kalan kɔnɔnakow tilantilan. I ka kalan mana kɛ forobakalan cogo la, wala baro cogo la, nafa b’a la n’i ye hakilinataw tilantilan. Tilancɛ kelen kelen bena wagati hakɛ min ta, i k’o latigɛ, ani i k’o sɛbɛ gɛrɛfɛ. O kɔ, kalan kɛtɔ, i ka to k’o wagati kɔrɔsi. N’i be baro kɛra ni kafo ye kalan dɔ kɔnɔ, kana kuma caya kalan datigɛtɔ. N’o tɛ, kɔfɛ i bena hakilinata jɔnjɔnw lajɛ kɔrɔtɔ la. La Tour de Garde kalan ɲɛminɛbagaw ka kan ka wagati caaman labila walisa ka se ka segikanni ka ɲiningaliw lajɛ kalan laban na. Wagati min labilara dɔnkili ni kuncɛli delili kama, u fana ka kan k’u janto u kana o wagati ta.

Kalan kuncɛ lɛri la. Ni kalan caaman be tugura ɲɔgɔn kɔ lajɛn dɔ la, i n’a fɔ waajuliko lajɛn na, kalankɛla bɛɛ ka kan k’a janto k’a ka kalan daminɛwagati n’a banwagati lɔn. Mun lo be se ka kɛ ni lajɛn be ɲini ka wagati tɛmɛ? Kalankɛla kelen wala fila be se ka wagati makɛɲɛ, a kɛtɔ k’a ɲɛsin hakilinata jɔnjɔnw ma, ani ka hakilinata misɛnmanw dabila. Minw be se k’o kɛ, u b’a yira k’u ye kalankɛla setigiw ye.

An minw ye lamɛnnikɛlaw ye, an be se ka kalan ɲɛminɛbaga dɛmɛ n’an b’an ka lakalitaw surunya, ani n’an be tilen ka sin jaabili ma. O cogo la, an bɛɛ be se k’an seko kɛ walisa lajɛnw ka kɛ “cogo bɛnnen na, a ko ɲɛnabɔlen koɲuman.”—1 Kɔr. 14:40.