Waajuliko lajɛn labɛncogo

1. Waajuliko lajɛn kuun ye mun lo ye, ani an be se ka nafa bɛrɛbɛrɛ sɔrɔ a la cogo di?

¹ Waajuliko lajɛn kuun ye k’an dɛmɛ an ka cidenyabaara ka den. O lajɛn be sinsin a kan ko an ka Masaya kibaro duman waaju, ka mɔgɔw kɛ kalandenw ye ani k’a fɔ ko Ala ka kiti loon surunyana (Mat. 28:20; Marka 13:10; 2 Piɛrɛ 3:7). An be nafa bɛrɛbɛrɛ sɔrɔ o lajɛn kɔrɔtalen na n’an b’an yɛrɛ labɛn koɲuman ani n’an labɛnnen lo k’an daa don a la.

2. An be se k’an yɛrɛ labɛn cogo di ka kalan lamɛn?

² Kalan: Tuma caaman na, u be kalan bɔyɔrɔ yira kalankɛla la cikanw kɔnɔ. Kalan basiginen be yɔrɔ min kan, i be se k’o yɔrɔ n’a vɛrisew lajɛ ani ka miiri cogo min na i be se k’o kunnafoniw sira tagama i ka cidenyabaara la.

3. An be se ka mun lo kɛ n’an b’an yɛrɛ labɛnna ɲiningaliw ni jaabiliw baro kama?

³ Ɲiningaliw ni jaabiliw baro: O bena kɛ i n’a fɔ La Tour de Garde kalan be kɛ cogo min na. Kalankɛla be se ka baro daa don ani k’a daa cɛ ka surunya. I ka miiriya jɔnjɔnw kɔrɔ ci dakun kelen-kelen bɛɛ kɔnɔ, ani i ka lakalita surun dɔw labɛn ka kɛɲɛ n’o ye.

4. An be se k’an yɛrɛ labɛn cogo di baro kama?

⁴ Baro: O bena kɛ i n’a fɔ forobakalan, nka kalankɛla bena a ɲini lamɛnnikɛla fɛ u k’u daa don baro la. N’i ye miiriya jɔnjɔnw kɔrɔ ci ani ka vɛrisew kalan, i bena se ka ɲiningaliw jaabi. Balimacɛ min b’o kalan kɛra, a bena jijali sɔbɛ kɛ k’a to lamɛnnikɛlaw ka miiriya jɔnjɔnw bɛɛ bɔ kɛnɛ kan.

5. Mun lo bena an dɛmɛ ka nafa bɛrɛbɛrɛ sɔrɔ ɲɛyiraliw la?

⁵ Ɲɛyiraliw: Ɲɛyirali bɛnnenw bena kɛ kalan dɔw la k’a yira cogo min na baara be se ka kɛ ni kunnafoniw ye kafo ka kiinw kɔnɔ. A bena ɲini diinan mɔgɔkɔrɔw, weleweledala kolɔnbagaw wala piyɔniyew fɛ u k’o ɲɛyiraliw kɛ. N’i b’i yɛrɛ labɛnna nin yɔrɔ nin kama, i be se ka kɔn ka miiri cogo min na o kalan bena kɛ. Yiracogo minw be An ka Masaya cidenyabaara kɔnɔ, n’u b’o dɔ ɲɛyirala, i ka miiri cogo min na i be se k’a fɔ i yɛrɛ kumacogo la ani k’a bɛn lamɛnnikɛla sifaw bɛɛ ma. Ɲɛyirali bena kɛ gafe wala zurunali minw kan, i ka la a la ko u b’i bolo. Aw ka gwa kɔnɔ batoli tuma na suu fɛ, n’a sɔrɔ aw bena a ye ko nafa b’a la k’o ɲɛyirali dɔw kɛ.

6. Kuun jumanw lo kosɔn an b’an yɛrɛ labɛn waajuliko lajɛn kama?

⁶ Kalan ɲuman min bena di, n’an b’an yɛrɛ labɛn ani ka kɔn ka miiri o dicogo kan, o bena dɔ fara waajuliko lajɛn diya kan. N’an be tugu nin ladili kɔ, o bena kɛ ɲɔgɔn jijaliba sababu ye (Rom. 1:11, 12). N’an be wagati ta k’an yɛrɛ labɛn waajuliko lajɛn kama, o bena an dɛmɛ koɲuman k’an ka cii dafa.—2 Tim. 3:17.