An k’an yɛrɛ labɛn kosɔbɛ ka sɔrɔ ka taga mɔgɔw kalan
1. N’an be bibulukalan kɛra mun na an ka kan k’an jija ka kalanden dɛmɛ a ka kɛ ni waleɲumanlɔn ye?
1 Sanni ka taga bibulukalan kɛ ni mɔgɔw ye, an ka kan k’an yɛrɛ labɛn kosɔbɛ n’an b’a fɛ ka kalanden lasun a ka baara kɛ Jehova ye. An ka jijali bena sanga sɔrɔ n’an be kalanden dɛmɛ a ka kɛ ni waleɲumanlɔn ye Bibulu ka tiɲɛn kalan kosɔn. O fana bena dusu don a la (Dut. 6:5; Ntal. 4:23; 1 Kɔr. 9:26). An be se k’o kɛ cogo di?
2. Delili be se k’an dɛmɛ k’an yɛrɛ labɛn bibulukalan kama cogo di?
2 N’an b’an yɛrɛ labɛnna, an ka dɛmɛ deli Ala fɛ: Komi Jehova lo be tiɲɛnko bonya kalanden kɔnɔ, a ka ɲi an ka kalan labɛnko daminɛ ni delili ye. An ka delili kɛ kalanden n’a ka makoya tigitigiw koo la (1 Kɔr. 3:6; Yak. 1:5). O delili ɲɔgɔn be se k’an dɛmɛ fana k’a lɔn cogo min na an be se k’a dɛmɛ tugun a k’a dusukun fa ni Jehova sago lɔnniya tigitigi ye.—Kol. 1:9, 10.
3. N’an b’an yɛrɛ labɛnna, an be se ka miiri kalanden koo la cogo di?
3 An ka miiri kalanden koo la: Yesu tun y’a lɔn ko walisa kalan ka sanga sɔrɔ fɔɔ an ka miiri lamɛnnikɛlaw koo la. Siɲɛ fila ɲɔgɔn, u ye Yesu ɲininga koo kelen na: “Ne ka mun kɛ walisa ne ka ɲɛnamaya banbali sɔrɔ?” Yesu m’u jaabi cogo kelen na (Luka 10:25-28; 18:18-20). An ka kan ka miiri kalanden koo la n’an b’an yɛrɛ labɛnna. Vɛrise minw kofɔra, an bena u la jumanw kalan n’a ye? An bena a ɲini ka dakun hakɛ juman lo lajɛ n’a ye? Kalan faan juman faamuyali bena gwɛlɛya a ma wala a tɛna sɔn a yɔrɔ juaman lo la joona? N’an be kɔn ka miiri ɲiningali dɔw la kalanden be se ka minw lawuli, an bena an labɛn ka ɲɛ k’u jaabi cogo fisaman na.
4. Ka labɛn koɲuman o be kɛ cogo?
4 An ka kɔn ka kalan lajɛ: Hali n’an ye kalansen dɔw kalan siɲɛ caaman ka tɛmɛ, a siɲɛ fɔlɔ lo an bena u lajɛ ni kalanden ye. N’an b’a fɛ k’a dusukun sɔrɔ, a kɔrɔtalen lo kosɔbɛ an k’an yɛrɛ labɛn koɲuman. O kɔrɔ ko an be kalanden jija a ka min kɛ an fana ka kan k’o lo kɛ. An kɛtɔ ka barokun ni vɛrisew lajɛ, an ka miiri kalanden koo la. An be se ka miiriya jɔnjɔnw kɔrɔ ci fana.—Rom. 2:21, 22.
5. An be se ka Jehova ladegi cogo di?
5 Jehova b’a janto kosɔbɛ kalandenw bɛɛ kelen-kelen ka ɲɛtaga la (2 Piɛrɛ 3:9). An kɛtɔ ka wagati ta k’an yɛrɛ labɛn bibulukalan kelen-kelen bɛɛ kama, an fana b’an ka kanuya yira o cogo la.