A mara

An ka bibulukalanw kɛ minw be ɲɛtaga sɔrɔ

Barokun dɔw bɔra An ka Masaya Cidenyabaara kɔnɔ walisa k’an dɛmɛ ka bibulukalanw kɛ minw be ɲɛtaga sɔrɔ. O barokunw ka hakilinata kunbabaw kafora ɲɔgɔnw kan ka kɛ sɛbɛ nin kɔnɔ. An be bɛɛ jagwɛlɛya u k’a mara, ani u k’a lajɛ n’u be bibulukalanw kɛra. An be se k’a lajɛ fana waajulibaara lajɛnw kɛtɔ. Waajulibaara kɔrɔsibagaw be kalan minw di kitabukalan jɛnkuluw kɔnɔ, u be se k’u basigi a kan.

Yɔrɔ fɔlɔ: Bibulukalan ye mun ye?

N’i be tɛmɛ an ka gafew fɛ wala Bibulu dɔrɔn fɛ ka sin ka baro kɛ ni mɔgɔ dɔ ye tuma o tuma, hali wagati kunkurunin kɔnɔ, i be bibulukalan lo kɛra n’a tigi ye. N’an y’o kalan kɛ siɲɛ fila ka fara ɲɛyirali fɔlɔ ta kan, ani n’a be komi o kalan bena taga ɲɛ, an be se k’a jate an ka rapɔɔri kɔnɔ.—km 7/04 ɲɛɛ 1

Gafe minw bɛnnen be kalan kama

◼ Ala be mun ɲini an fɛ?

◼ Dɔnniya min bɛ na ni ɲɛnamaya banbali ye

◼ Adorez le seul vrai Dieu

◼ Mɔgɔ minw ma kalan kɛ ka taga yɔrɔ jan, an be se ka tɛmɛ kitabunin I be se ka kɛ Ala teri ye! fɛ ka kalan kɛ n’u ye.

Yɔrɔ 2nan: An k’an yɛrɛ labɛn ka taga kalan kɛ

An ka kan k’o kalan di cogo dɔ la walisa ka kalanden dusu sɔrɔ. O la, fɔɔ an k’an yɛrɛ labɛn koɲuman an kɛtɔ k’an janto kalanden na.—km 8/04 ɲɛɛ 1

Labɛn be kɛ cogo di?

◼ An ka sapitiri tɔgɔ lajɛ, ka barokunw ni jaaw ni tagamasiɲɛw fana lajɛ.

◼ Ɲiningali minw bilara gafe kɔnɔ, i k’u jaabiliw ɲini k’u lɔn, i kɛtɔ ka tagamasiɲɛ kɛ daɲɛw ni kumasen kunbabaw dɔrɔn na.

◼ Vɛrise minw dira, i k’a filɛ i bena u jumanw kalan Bibulu kɔnɔ kalan kɛtɔ. I ka miiriya dɔw sɛbɛ ka surunya dakunw dakɛnɛw kɔnɔ.

◼ I ka segikanni fitinin dɔ labɛn ka hakilinata jɔnjɔnw lajɛ.

Kalan makɛɲɛ n’a tigi makow ye

◼ I ka Jehova deli kalanden koo la an’a makow koo la.

◼ I ka kɔn k’a filɛ yɔrɔ minw faamuyali bena gwɛlɛya kalanden ma, wala a tɛna sɔn yɔrɔ minw na joona.

◼ I k’i yɛrɛ ɲininga ko: A mako b’a la ka mun lo faamuya wala ka baara kɛ yɔrɔ juman kan walisa ka ɲɛtaga sɔrɔ Alako ta fan fɛ? Ne be se k’a dusukun sɔrɔ cogo juman na?

◼ A dɔ la, i ka ɲɛyirali, ɲɛfɔli wala ɲiningali dɔw labɛn ka kalanden dɛmɛ a ka hakilinata wala vɛrise dɔ faamu.

Yɔrɔ 3nan: An ka baara kɛ bɛrɛbɛrɛ ni Bibulu ye

Bibulukalanw kɛtɔ ni mɔgɔw ye, an ka laɲinita ye k’u dɛmɛ ka Ala ka Kuma kalansiraw faamu, ka sɔn u la, k’u sira tagama u ka ɲɛnamaya kɔnɔ ani ka kɛ Kirista ka kalandenw ye (Mat. 28: 19, 20; 1 Tes. 2: 13). O kama, kalan ka kan ka basigi Bibulu kan.—km 11/04 ɲɛɛ 4.

I k’i ka kalan basigi Ala ka Kuma kan

◼ I ka bibulusenw sɔrɔcogo yira kalanden na a ka Bibulu kɔnɔ.

◼ Vɛrise minw b’a yira k’an ka lannakow basiginen be Bibulu kan, i k’olu lajɛ, ani i ka ɲɛfɔli kɛ u kan.

◼ I ka baara kɛ ni ɲiningaliw ye. Sanni an ka bibulusenw ɲɛfɔ kalanden ye, an k’a ɲini ale yɛrɛ fɛ a k’u ɲɛfɔ an ye.

◼ An ka kalan kɛ cogo nɔgɔman na. I kana a ɲini ka vɛrise kelen kelen faan bɛɛ ɲɛfɔ kalan kɛtɔ. I mako be kunnafoni minw na walisa ka sinsin kalan kan, i k’olu dɔrɔn lajɛ.

◼ An ka kalan sira tagamacogo nafaman yira. I ka kalanden dɛmɛ a k’a faamu cogo min na bibulusenw ɲɛsinna ale yɛrɛ ma.

Yɔrɔ 4nan: An ka kalanden degi kalan labɛncogo la

Kalanden min be kɔn ka kalan labɛn, n’a be jaabiliw jukɔrɔla ci, ani a b’a ɲini ka jaabiliw di a yɛrɛ ka kumacogo la, o kalanden be ɲɛtaga kɛ joona Alakow ta fan fɛ. O kama, kalan juu mana sigi ka ban, an ka kalansen kelen labɛn ɲɔgɔn fɛ ni kalanden ye walisa a ka kalan labɛncogo kɔrɔsi. Kalanden caamanba mako bena kɛ a la an ka sapitiri wala kalansen kuturu kelen bɛɛ labɛn n’u ye.—km 12/04 ɲɛɛ 1

Ka jaabiliw jukɔrɔlaw ci ani ka sɛbɛriw kɛ dakunw dafɛlaw la

◼ A ɲɛfɔ kalanden ye cogo min na a be se ka jaabiliw sɔrɔ minw tilenna ka sin gafe ka ɲiningaliw ma.

◼ Ile yɛrɛ be baara kɛ ni gafe min ye, o yira a la walisa a k’a ye cogo min na i ye daɲɛw ni kumasen jɔnjɔnw jukɔrɔlaw ci.

◼ A dɛmɛ a k’a faamu k’o vɛrise kelen kelen be dakun ka hakilinata dɔ kɔrɔta. A yira a la cogo min na a be se ka miiriya surunw sɛbɛ dakunw dafɛlaw la.

Hakilinata kunbabaw lajɛli, ani segikanni

◼ A yira kalanden na cogo min na a ka ɲi ka sapitiri tɔgɔ, dantigɛliw, jaaw ni tagamasiɲɛw lajɛ fɔlɔ ka sɔrɔ k’a daminɛ ka kalan labɛn ka dunya.

◼ I ka kalanden jagwɛlɛya a ka segi kalan hakilinata kunbabaw kan n’a tilara kalan labɛnni na.

Yɔrɔ 5nan: An k’a filɛ an be se ka dakun hakɛ min lajɛ ni kalanden ye

Dakun hakɛ juman ka ɲi ka lajɛ? O be bɔ karamɔgɔ ni kalanden fila bɛɛ ka setigiya n’u ka koow cogoya la.—km 1/05 p. 1

An k’a dɛmɛ ka lanaya barikaman sɔrɔ

◼ I kana kalanden bali a ka faamuyali kɛ, ka sababu kɛ i b’a fɛ ka kalan teliya.

◼ I kana kɔrɔtɔ, nka i ka wagati ta ka kalanden dɛmɛ a ka kalan faamu an’a ka sɔn a la.

◼ Kalan basiginen be vɛrise jɔnjɔn minw kan, i ka wagati ta k’u lajɛ.

An kana an mabɔ kalankun na

◼ Ni kalanden dɔ b’a fɛ ka baro kɛ ka janya a tɔgɔla koo dɔw kan, i be se ka labɛn kɛ walisa ka segi o koow kan kalan banni kɔ.

◼ Kalan kɛtɔ, i kana kuma kojugu. I kana kunnafoni misɛnw ni walew lakali ka caya fɔɔ u be kalanden bali ka lɔnniya tigitigi sɔrɔ Bibulu ka kalansira jɔnjɔnw koo la.

Yɔrɔ 6nan: Kalanden mana ɲiningali dɔ lawili

Tuma caaman na, bibulukalan juu mana sigi ka ɲɛ, a ka fisa an ka Bibulu kalansiraw lajɛ ni kalanden ye i n’a fɔ u be tugu ɲɔgɔnw na gafe kɔnɔ, sanni an ka to ka panpan kalansenw kan. O be kalanden dɛmɛ a ka lɔnniya tigitigi juu sigi, ani a ka ɲɛtaga sɔrɔ Alako ta fan fɛ.—km 2/05 p. 6.

I ka hakili sɔrɔ

◼ Tuma caaman na, ni ɲiningaliw ɲɛsinna kalansen kɔnɔnakow ma, i be se k’u jaabi o yɔrɔ bɛɛ.

◼ Ni ɲiningali dɔ ma ɲɛsin kalan kɔnɔnakow ma, wala n’a b’i waajibiya ka sɛgɛsɛgɛri dɔw kɛ, i be se k’a lajɛ wagati wɛrɛ la. A ka ɲi i k’o ɲiningali ɲɔgɔnw sɛbɛ ka bila.

◼ N’a ka gwɛlɛ kalanden fɛ ka sɔn kalansira dɔ la, i k’o lajɛ ka dunya n’a ye gafe wɛrɛ kɔnɔ.

◼ Ni kalanden ma la a la bele, an k’o sɔsɔli bila gɛrɛ fɛ ani an ka taga ɲɛ ni kalan ye.

I k’i daan lɔn

◼ Ni ɲiningali dɔ bilara i ye ani i ma la a jaabili la, i kana i yɛrɛ ka fɛta fɔ a kan.

◼ Dɔɔni dɔɔni, i ka kalanden degi sɛgɛsɛgɛri kɛcogo la.

Yɔrɔ 7nan: Ka delili kɛ bibulukalan na

Ni Jehova ma kalandenw duga, u tɛ se ka ɲɛtaga sɔrɔ Alako ta fan fɛ. O kama, kalan juu mana sigi ka ɲɛ, a ka ɲi i k’a daminɛ ani i k’a kuncɛ ni delili ye.—km 3/05 ɲɛɛ 4.

Delili koo be daminɛ cogo min na

◼ Tuma caaman na, an be se ka sin ka kalan fɔlɔ daminɛ ni delili ye n’o y’a sɔrɔ kalanden lara Ala la.

◼ Nka tuma dɔw la, an ka ɲi ka hakili sɔrɔ ka wagati bɛnnen ɲini ka kalan daminɛ ni delili ye.

◼ An be se ka tɛmɛ Zaburu 25:4, 5 ani 1 Yuhana 5:14 fɛ k’a ɲɛfɔ kalanden ye fɛɛn min kama an ka ɲi ka delili kɛ n’a ye.

◼ An fana be se ka tɛmɛ Yuhana 15:16 fɛ k’a yira ko an ka kan ka tɛmɛ Yesu Kirista fɛ ka Jehova lo deli.

An be se ka mun lo fɔ delili kɔnɔ?

◼ A bɛnnen be an ka Jehova tando, ale min ye kalan nin Tigi ye.

◼ An ka delili kɔnɔ, an k’a yira ko an b’an janto kalanden na sɔbɛ la.

◼ An k’a yira ko an be Jehova ka ɔriganisasiyɔn waleɲuman lɔn.

◼ An ka Jehova deli a ka kalanden duga a ka jijali kɛli kosɔn ka kalan sira tagama.

Yɔrɔ 8nan: An ka kalandenw ɲɛsin Jehova ka ɔriganisasiyɔn ma

Kalan kɛtɔ ni mɔgɔw ye, an ka laɲinita tɛ k’u kalan Bibulu kalansiraw la dɔrɔn. Nka an b’a fɛ k’u dɛmɛ u ka kɛ kafodenw ye fana. An ka miniti damanin ta lɔgɔkun o lɔgɔkun ka hakilinata dɔw lajɛ ni kalanden ye Jehova ka ɔriganisasiyɔn kan.—km 4/05 ɲɛɛ 8.

Kafo ka lajɛnw

◼ An ka kafo ka lajɛn kelen kelen lakali kalandenw ye. An mana kalan fɔlɔ daminɛ n’u ye, an k’u weele ka na lajɛnw na kelen.

◼ Kalan min kɛra lajɛnw na, an k’u hakilinata kunbabaw tilan n’u ye.

◼ An ka Kirista saya Hakilijigi, lajɛnbaw ani kafokulu kɔrɔsibaga nali kofɔ u ye k’a nege don u la.

◼ An ka tɛmɛ foto dɔw fɛ gafew kɔnɔ k’a yira u la min be kɛ lajɛnw na.

◼ An k’u jija u ka kitabunin nin kalan: Les Témoins de Jéhovah : Qui sont- ils ? Quelles sont leurs croyances ?

An ka tɛmɛ videwow fɛ ka waleɲumanlɔn don u la

◼ Les Témoins de Jéhovah : un nom, une organisation

◼ Toute la communauté des frères

◼ Unis grâce à l’enseignement divin

◼ Jusqu’aux extrémités de la terre

Yɔrɔ 9nan: An ka kalandenw degi senfɛ waajuli kɛli la

Kalandenw be koo minw kalanna, u mana a daminɛ ka lanaya kɛ o la, o b’u lasun ka kuma o koow kan.—km 5/05 ɲɛɛ 1

An k’u jagwɛlɛya u ka seereya kɛ

◼ Yala u be se k’u teriw n’u somɔgɔ dɔw weele u ka jɛn n’u ye ka kalan kɛ wa?

◼ Yala u baarakɛɲɔgɔnw, lakɔli filankuruw wala u lɔnbaga dɔ b’a mako don kibaro duman koo la wa?

An k’u degi u ka kuma u ka lannakow koo la

◼ Kalan kɛtɔ n’u ye, an ka yɔrɔ dɔw ɲɛnatɔmɔ, ani an k’u ɲininga ko: “Cogo juman na i be se ka tɛmɛ Bibulu fɛ ka tiɲɛn kalan nin ɲɛfɔ i somɔgɔw ye?”

◼ An k’u dɛmɛ u k’a faamu ko n’u be kumana Jehova Ala n’a sagonata koo la, u ka kan ka mɔgɔw bonya ani ka ninsɔndiya kɛ n’u ye.

◼ Kalandenw be se ka tɛmɛ kitabunin nin fɛ k’u teriw n’u somɔgɔw dɛmɛ k’an ka lannakow n’an ka baara cogoya faamu: Les Témoins de Jéhovah : Qui sont-ils ? Quelles sont leurs croyances ?

Yɔrɔ 10nan: An ka kalandenw degi waajuli kɛli la soo ni soo

Diinan mɔgɔkɔrɔw mana a latigɛ ko kalanden ka koow dafara ka kɛ weleweledala ye, min ma batise fɔlɔ, o kalanden be se ka jɛn ni kafo ye ka waajuli daminɛ bɛɛ ɲɛɛ na.—km 6/05 ɲɛɛ 1

An k’an labɛn ɲɔgɔn fɛ

◼ An k’a yira kalanden na yɔrɔ min na a be se ka gafew yiracogow sɔrɔ.

◼ An k’a dɛmɛ ka yiracogo nɔgɔman dɔ sugandi min bena sanga sɔrɔ kiin kɔnɔ.

◼ An k’a jagwɛlɛya a ka baara kɛ ni Bibulu ye waajuli la.

◼ An k’o yiracogo kɛ k’a filɛ ɲɔgɔn fɛ. Mɔgɔw delila ka sɔsɔli minw lawili an kama, an k’a yira kalanden na cogo min na a be se k’u jaabi nɛmɛnɛmɛ.

An ka waajuli kɛ ɲɔgɔn fɛ

◼ Aw tun ye yiracogo min degi ɲɔgɔn fɛ, i k’a to kalanden b’a filɛ i b’a kɛ cogo min na waajuli la.

◼ An k’an janto kalanden jogo n’a ka setigiya la. Tuma dɔw la, a ka fisa kalanden ka yiracogo faan dɔ dɔrɔn kɛ.

◼ An ka weleweledala kura dɛmɛ ka porogramu kɛ waajuli kama walisa a k’a seen don o baara la tuma o tuma.

Yɔrɔ 11nan: An ka kalandenw dɛmɛ ka viziti kuraw kɛ

Viziti kura labɛn be daminɛ ɲɔgɔnye fɔlɔ la. An ka kalanden jagwɛlɛya a k’a mako don a lamɛnbagaw la ni kɔnɔgwɛ ye. An k’a degi dɔɔni dɔɔni a ka mɔgɔw lasun u b’u ka fɛtaw fɔ a ye, a k’u lamɛn, ani a k’a janto u ka ɲɛnakow la.—km 7/05 ɲɛɛ 1.

An k’an yɛrɛw labɛn ka segi ka na

◼ An ka segi baro tɛmɛnen kan. Ani, an ka kalanden dɛmɛ ka barokun dɔ sugandi min bena diya a lamɛnbaga ye.

◼ An ka yiracogo surun dɔ labɛn, min basiginen be bibulusen kelen kan ani gafe ka dakun dɔ kan.

◼ An ka ɲiningali dɔ labɛn, an bena min kɛ baro laban na.

An ka teliya ka segi ka na makodon mɔgɔw dɛmɛ

◼ An ka kalanden jagwɛlɛya a segi ka na bɔ makodon mɔgɔw bɛɛ ye joona joona.

◼ An k’a dɛmɛ a k’a faamu ko a kɔrɔtalen be a ka timinandiya ka mɔgɔ dɔw ɲini, minw sɔrɔ man di.

◼ An k’a degi ɲɔgɔnye juu sigicogo la ni mɔgɔw ye, ani, an k’a dɛmɛ a k’a faamu ko a ka kan ka segi ka na i ko a y’a fɔ cogo min na.

Yɔrɔ 12nan: An ka kalandenw dɛmɛ ka bibulukalanw daminɛ ani k’u kɛ

A kɔrɔtalen be kosɔbɛ an ka Yesu ladegi ka ɲɛyirali ɲuman di kalanden ma. A ɲɛɛ mana la an ka ɲɛyirali kan waajuli la, a bena a faamu ko viziti kuraw kuun ye ka bibulukalanw daminɛ.—km 8/05 ɲɛɛ 1

Bibulukalan kofɔcogo

◼ An k’a ɲɛfɔ kalanden ye ko waajibi tɛ ka kalan kɛcogo lakali ka walawala.

◼ Tuma caaman na, a ka fisa an ka tɛmɛ gafe kalanta ka dakun kelen wala fila fɛ ka kalan kɛcogo ɲɛyira a tigi la.

◼ Ladili dɔw dira ka bibulukalan daminɛcogo yira. A’ ye segi u kelen kan k’a kɛ ka filɛ.—km 8/05 ɲɛɛ 8; km 1/02 ɲɛɛ 6.

An ka kalandenw degi u ka kɛ karamɔgɔw ye

◼ An ka kalandenw jagwɛlɛya u k’u sendon Ala ka Mara cidenyabaara lakɔli la.

◼ An ka labɛn kɛ walisa weleweledala kuraw k’an bila sira ka taga bibulukalan wɛrɛw kɛ. O la, u bena se k’u daa don dɔɔni kalan na.