I ɲɛɛ jɔlen be koo kelen kan wa?

1. Nin kuma kɔrɔ ko di: “N’i ɲɛkisɛw ka kɛnɛ”?

¹ An ɲɛɛ jɔlen be koo minw kan, u be nɔɔ to an ka kɛwalew kan. O kama, Yesu ka kuma nunu bɛnnen lo: “Ni i ɲɛkisɛw ka kɛnɛ, i farikolo bɛɛ bɛ yeelen na.” (Mat. 6:22) N’an “ɲɛkisɛw ka kɛnɛ” Alako ta fan fɛ, an ɲɛɛ jɔlen bena to laɲinita kelen lo kan, o min ye Ala sago kɛli ye. An be Masayakow kɛ an ɲɛnako fɔlɔ ye ani baara ni bololafɛn minw tɛ waajibiyako ye, an t’a to u ka an ka cidenya baara nagasi.

2. Mun lo be se k’an ka koow filɛcogo nagasi, nka mun lo be se k’an dɛmɛ?

² An mako b’a la k’an yɛrɛ sɛgɛsɛgɛ: Arajo ni telewisɔn n’a ɲɔgɔnnaw be se k’a to an k’a miiri ko an mako be fɛɛn dɔw la. An ɲɛɛ fana be se ka bɔ walifɛnw fɛ. O bɛɛ be se k’an ka koow filɛcogo nagasi. Sanni an ka laɲinita dɔ magwɛn wala ka fɛɛn dɔ san min bena wagati, wari ani fanga caaman ɲini an fɛ, a ka ɲi an k’a “sɔngɔ jate k’a filɛ” fɔlɔ. An k’an yɛrɛ ɲininga ko: “Ne be baara min kɛ Jehova ye, yala nin fɛɛn bena dɔ fara o kan wa, wala a bena a nagasi?” (Luka 14:28; Fil. 1:9-11). A ka ɲi fana an ka to k’a filɛ tuma o tuma cogo min na an bena se k’an ka ɲɛnamaya kɛ cogo nɔgɔman na tugun walisa ka dɔ fara an ka cidenya baara kan.—2 Kɔr. 13:5; Efes. 5:10.

3. An be kalan juman sɔrɔ balimamuso dɔ fɛ min ye yɛlɛmani dɔw kɛ walisa k’a ka ɲɛnamaya kɛ cogo nɔgɔman na?

³ Tuma min na balimamuso dɔ ye kudayi piyɔniye baara daminɛ, a tun be baloɲini baara min kɛ tuma bɛɛ, a y’a latigɛ k’o mara hali k’a sɔrɔ a tun be se ka baara kɛ loon damanin dɔrɔn walisa k’a ka makow wasa. A laban, a sɔnna a ma ko: “Mɔgɔ si tɛ se ka kɛ kuntigi fila ka jɔn ye. Waajibi tun lo ne ka n’ ka negelakow saraka ani ka dan n’ makoyakow dɔrɔn ma. Ne y’a faamu ko bololafɛnw sanga be ben ani ne bena n’ yɛrɛ sɛgɛn ni n’ b’a ɲini k’u sɔrɔ.” A ka koow cogoya y’a to a sera ka yɛlɛmani dɔw kɛ walisa k’a ka ɲɛnamaya kɛ cogo nɔgɔman na ani a ye baara wɛrɛ yaala janko ka to piyɔniye baara la.

4. Sisan kɔni, mun na kɔrɔtɔ b’a la an k’an ɲɛɛ jɔlen to koo kelen kan?

⁴ Komi an ka wagati tɔɔ man jan, a kɔrɔtalen lo kosɔbɛ an k’an ɲɛɛ jɔlen to koo kelen kan. Loon kelen mana tɛmɛ, o b’a to an be gwɛrɛ duniɲa nin laban ma ani Ala ka duniɲa kura daminɛ ma (1 Kɔr. 7:29, 31). N’an ɲɛɛ jɔlen be waajuli baara kan, o lo bena a to an ka se k’an yɛrɛ kisi ani k’an lamɛnbagaw fana kisi.—1 Tim. 4:16.