An k’u bisimila
1. Koo juman na an bena sababu ɲuman sɔrɔ ka seereya kɛ, ani mun na do?
1 Hakilijigi lajɛn be kɛ saan o saan. Koo si tɛ sababu di an ma ka seereyaba kɛ ka tɛmɛ o wagati kan. Miiri k’a filɛ: Ɲinan, an jigi b’a la ko mɔgɔ miliyɔn tan ni kɔ bena na Hakilijigi lajɛn na. Kalan bena a yira u la ko kunmabɔsara ye Jehova ka nilifɛn ye min b’a yira ko Jehova ni Yesu Krista y’an kanu kanuyaba la (Yuh. 3:16; 15:13). U bena a faamu fana u be se ka duga minw sɔrɔ o nilifɛn sababu fɛ (Es. 65:21-23). Nka, o koo sen fɛ, kalankɛla dɔrɔn lo tɛna seereya kɛ. An bɛɛ bena sababu sɔrɔ ka seereyaba kɛ n’an be lonanw bisimila ni dusudiya ye.—Rom. 15:7.
2. An be se ka lonanw bisimila ni dusudiya ye cogo di?
2 Kana sigiyɔrɔ ɲini ka sigi ani k’i makun ka porogramu daminɛ kɔnɔ dɔrɔn. Nka, i k’a bɔ i yɛrɛ la ka baro daminɛ n’i gɛrɛfɛ mɔgɔw ye. A be se ka kɛ ko lonanw hakili siginin tɛ ani u t’a lɔn koo min bena kɛ. N’an be yɛlɛmisɛn kɛ n’u ye ani k’u fo teriya la, n’a sɔrɔ o bena u hakili sigi. N’i b’a fɛ k’a lɔn ni balima dɔ lo ye i gɛrɛfɛ mɔgɔ dɔ weele ka na, i k’a tigi ɲininga n’a siɲɛ fɔlɔ lo ka na an ka lajɛnw na wala n’a be kafoden dɔ lɔn. I be se k’a ɲini a tigi fɛ a ka sigi i gɛrɛfɛ ani ka filɛri kɛ n’i ye Bibulu ni dɔnkili gafe kɔnɔ. Ni kalan be kɛra Masaya Boon kɔnɔ, i be se k’a yɔrɔ dɔw yira o tigi la. Kalan bannin kɔ, i yɛrɛ labila k’a ka ɲiningaliw jaabi. N’aw ka kan ka yɔrɔ labila joona kafo wɛrɛ mɔgɔw ye, i be se k’a fɔ ko: “Ne b’a fɛ k’a lɔn i be min miiri kalan nin koo la. An be se ka ɲɔgɔn sɔrɔ tugun cogo di?” O kɔ, labɛn kɛ walisa ka taga bɔ a tigi ye loon wɛrɛ. Weleweledala sumanin minw nana o lajɛn na, diinan mɔgɔkɔrɔw ka kan k’u janto k’olu jija sɔbɛ la.
3. Mun na a kɔrɔtanin lo an k’a bɔ an yɛrɛ la ka lonanw bisimila Hakilijigi lajɛn na?
3 A bena kɛ ko lonan caaman siɲɛ fɔlɔ lo k’a ye ko Jehova sagokɛlaw ninsɔndiyanin lo, hɛɛrɛ be u ni ɲɔgɔn cɛ ani u kanbɛnnin lo (Zab. 29:11; Es. 11:6-9; 65:13, 14). Hakilijigi lajɛn bannin kɔ, lonanw hakili bena to min na, o fanba bena bɔ anw lo la. O kama, an k’a bɔ an yɛrɛ la k’u bisimila.