Yala i b’i yɛrɛ labɛnna Hakilijigi lajɛn kama wa?

Nisankalo tile 33 loon tun lo. Yezu tun b’a lɔn ko suu kelen dɔrɔn lo tora a fɛ ka kɛ n’a ka cidenw ye sanni a juguw k’a faga. A tun bena a ka Tɛmɛnkan seli laban kɛ n’u ye. O kɔ, a tun bena landa kura dɔ sigi sen kan, o min ye Matigi ka surafana ye. O kooba ɲɔgɔn tun tɛ ɲɛ labɛn ɲuman kɔ. O kama, a ye Piyɛri ni Zan ci ko u ka taga koow labɛn (Luka 22:7-13). Kabi o tuma fɔɔ ka na se bi ma, kerecɛn minw b’a fɛ ka Hakilijigi lajɛn kɛ, fɔɔ u k’u yɛrɛ labɛn le (Luka 22:19). Hakilijigi lajɛn nata bena kɛ awirili tile 3nan loon. An ka kan ka koo jɔnjɔn jumanw lo kɛ o lajɛn kama?

Diinan mɔgɔkɔrɔw ka baara:

A’ ye labɛn kɛ walisa Hakilijigi lajɛn ka kɛ Masaya Boon kɔnɔ wala yɔrɔ wɛrɛ la min bɛnnin lo. Sigiyɔrɔ caaman ani yeelen ka kan ka kɛ yen ani mɔgɔ nɛnɛkiri man kan ka degun. A’ ye labɛn kɛ walisa kafo ka kɔn ka yɔrɔ saniya ka ɲɛ.
A’ ye balimacɛ nunu sugandi: kalankɛla setigi dɔ, kalan ɲɛminɛbaga ani minw bena delili kɛ sanni buru ni diwɛn ka di mɔgɔw ma.
Ni aw ni kafo wɛrɛw bena o lajɛn kɛ boon kelen kɔnɔ, a’ ye koo nunu latigɛ ɲɔgɔn fɛ: lajɛnw wagati, mɔgɔw bena don ani ka bɔ daa minw fɛ ani lɛri minw na, bolifɛnw bena bila yɔrɔ min na.
Minw bena mɔgɔw kunbɛn wala ka buru ni diwɛn di mɔgɔw ma, a’ y’olu sugandi ani k’u ka baarakɛcogo yira u la.
A’ ye fɛɛn nunu labɛn: buru ni diwɛn minw bɛnnin lo, tasaw, vɛriw, tabali ɲuman ani tabali fani.

Weleweledalaw ka kan min kɛ:

I yɛrɛ labɛn walisa k’i seen don bɛrɛbɛrɛ Hakilijigi lajɛn kanpaɲi na.
I ka Bibulu kalandenw, somɔgɔw, lakɔli filankuruw, baarakɛɲɔgɔnw ani i lɔnbaga wɛrɛw tɔgɔ sɛbɛ ani u weele ka na.
Bibulu kalangwɛ min latigɛra Hakilijigi wagati kama, i k’o kalan ani ka miiri a kan.
Kɔn ka na Hakilijigi lajɛn na walisa ka se ka lonanw bisimila.