I yɛrɛ labɛn Hakilijigi lajɛn kama ni dusudiya ye
1. Hakilijigi lajɛn wagati be sababu ɲuman di an ma ka mun lo kɛ?
1 Hakilijigi lajɛn bena kɛ talatalon, marisikalo tile 26. A bena sababu ɲuman di an ma an ka ninsɔndiya Jehova ka labɛn koo la a ye min kɛ an kisili kosɔn (Es. 61:10). O dusudiya bena an dɛmɛ an k’an yɛrɛ labɛn ka ɲɛ Hakilijigi lajɛn kama hali k’a sɔrɔ o loon yɛrɛ ma se fɔlɔ. Cogo di do?
2. Mun lo b’an lasun ka labɛnw kɛ Hakilijigi lajɛn kama?
2 O lajɛn labɛncogo: Matigi ka surafana ye kooba ye. Nka, a be kɛ cogo nɔgɔman na. An ka kɔn ka labɛn dɔw kɛ walisa an kana ɲinɛ koo fitininw kɔ (Ntal. 21:5). An k’o lajɛn kɛwagati n’a kɛyɔrɔ sugandi ka ɲɛ. Buru ni diwɛn minw daganin lo, olu ka kan ka labɛn. O lajɛn kɛyɔrɔ ka kan ka saniya ani ka labɛn. Kalankɛla ka kan k’a yɛrɛ labɛn koɲuman. Minw sugandira ka mɔgɔw kunbɛn wala ka buru ni diwɛn di mɔgɔw ma, baara kɛcogo ɲuman ka kan ka yira u la. Siga t’a la, o labɛnw fanba kɔni kɛra ka ban. An be ni waleɲumanlɔn ye kunmabɔsara koo la. O lo b’an lasun k’an yɛrɛ labɛn koɲuman Hakilijigi lajɛn kama sabu o ye koo senuman ye.—1 Piɛrɛ 1:8, 9.
3. An be se k’an dusukun cogoya labɛn cogo di Matigi ka surafana kama?
3 I dusukun cogoya labɛn: A kɔrɔtanin lo fana an k’an dusukun cogoya labɛn walisa ka se ka Hakilijigi lajɛn kɔrɔ faamu bɛrɛbɛrɛ (Esd. 7:10). Bibulu kalangwɛ min latigɛra Hakilijigi wagati kama, an ka wagati ta k’o lajɛ. An ka miiri k’a filɛ koo minw kɛra Yesu ka loon labanw na k’a to dugukolo kan. N’an be miiri Yesu ka yɛrɛsaraka hakili koo la, o bena an lasun k’a ladegi.—Gal. 2:20.
4. Kunmabɔsara nafa juman lo be e ninsɔndiya ka tɛmɛ tɔɔw kan?
4 Krista ka saya be Jehova ka masabaya lafasa. A b’an kisi ka bɔ jurumu ni saya bolo (1 Yuh. 2:2). O sababu fɛ, hɛɛrɛ be se ka kɛ an ni Ala cɛ ani an be se ka ɲɛnamaya banbali sɔrɔ (Kol. 1:21, 22). A b’an dɛmɛ fana an k’an cɛsiri k’an ka yɛrɛkundili dafa ani ka kɛ Krista ka kalanden kantigimanw ye (Mat. 16:24). I k’i yɛrɛ labɛn Hakilijigi lajɛn nata kama ani i ka kɛ yen. Jehova ka dɔ fara i ka dusudiya kan!