Mun na i ka kan ka kuntigiya bonya?

1, 2. a) Mun na a man nɔgɔ an ma ka kuntigiya bonya? b) An bena ɲiningali jumanw lo lajɛ?

YALA i delila ka denmisɛn dɔ ɲɛda kɔrɔsi tuma min na a faa wala a baa y’a ɲini a fɛ a ka koo dɔ kɛ min man di a ye fewu wa? I bena a ye joona a ɲɛda cogo la ko a ka miiriya be fila fila. A tulo be u kaan na ani a b’a lɔn ko a ka kan k’u ka kuntigiya bonya. Nka nin sen fɛ, a t’a fɛ ka mɛnni kɛ u fɛ. Miiriya fila minw b’o deen tɔɔrɔla, o ye koo ye min ka teli k’an bɛɛ sɔrɔ.

² A man nɔgɔ an ma tuma bɛɛ ka kuntigiya bonya. Yala tuma dɔw la a ka gwɛlɛ i ma ka mɔgɔ dɔw bonya minw be ni kuntigiya dɔ ye wa? N’o lo, i kelen tɛ. A be komi mɔgɔw ma kuntigiya mafiɲɛya tuma si la ten ka se bi ma. Nka, Bibulu b’a fɔ ko an ka kan ka bonya la mɔgɔw kan minw be ni kuntigiya ye an kun na (Talenw 24:21). Tiɲɛn na, a kɔrɔtanin lo an k’o kɛ n’an b’a fɛ ka to Ala ka kanuya la. O koo be na ni ɲiningali dɔw ye. Mun na a ka gwɛlɛ an ma ten ka kuntigiya bonya? Mun na Jehova b’o ɲini an fɛ, ani mun lo bena an dɛmɛ k’o kɛ? A laban, an be se k’a yira cogo juman na ko an be kuntigiya bonya?

MUN NA A MAN NƆGƆ?

3, 4. Jurumutɔya ni dafabaliya koo daminɛna cogo di? Ani, mun na an ka jurumutɔya b’a to a ka gwɛlɛ an ma ka kuntigiya bonya?

³ An k’a filɛ dɔɔni fɛɛn fila minw kama a be se ka gwɛlɛya an ma ka mɔgɔw bonya minw be ni kuntigiya ye. A fɔlɔ, an ye mɔgɔ dafabaliw ye. Filanan, mɔgɔ minw be ni kuntigiya ye an kun na, olu fana dafanin tɛ. Adamadenw ka jurumutɔya n’u ka dafabaliya koo daminɛna a mɛnna, kabi Adama ni Awa murutira Ala ka kuntigiya ma Edɛn nankɔ kɔnɔ. Jurumuko daminɛna o cogo la ni murutili ye. Halibi an ka teli ka muruti sabu an wolola ten le.—Zɛnɛzi 2:15-17; 3:1-7; Zaburuw 51:7; Ɔrɔmukaw 5:12.

⁴ An ka jurumutɔya kosɔn, an caaman ka teli ka yada ani ka kuncɛbaya kɛ. Nka, majigilenya ye jogo ye min tɛ mɔgɔ caaman na. N’an b’a fɛ ka kɛ ni majigilenya ye, fɔɔ an k’an jija sɔbɛ la. Hali n’an ye saan caaman kɛ Ala ka baara la ni kantigiya ye, a be se ka kɛ ko an be tulogwɛlɛya ni kuncɛbaya kɛ. Ɲɛyirali fɛ, an ka miiri Kore koo la. Tɔɔrɔ caaman bɛɛ n’a ta, a tora ni Jehova ka jama ye. O bɛɛ n’a ta, a ɲɛɛ bɔra lɔyɔrɔba fɛ ani a ye ɲɛnagwɛlɛya kɛ ka muruti Musa kama, o min tun ye mɔgɔ majiginin ye ka tɛmɛ mɔgɔw bɛɛ kan o wagati la (Nɔnburuw 12:3; 16:1-3). Miiri fana masacɛ Oziyasi koo la. Kuncɛbaya y’a lasun a donna Jehova ka batoso kɔnɔ ani ka baara senuman dɔ kɛ min tun ye sarakalasebagaw dɔrɔn ka baara ye (2 Tilew Kibaru [Masaw ka loon o loon kibaru kitabu] 26:16-21). O cɛɛw ka murutili ma diya u la fewu. U ka ɲɛyirali juguw ye lasɔmini ye an bɛɛ fɛ. An ka kan ka kuncɛbaya kɛlɛ sabu ale lo b’a to a ka gwɛlɛ an ma ka kuntigiya bonya.

5. Adamaden dafabaliw y’u ka kuntigiya kɛ ka digi mɔgɔw kan cogo di?

⁵ Faan wɛrɛ fɛ, adamaden dafabali dɔw ka kuntigiya kɛcogo y’a to mɔgɔ caaman tɛ kuntigiya bonya. U caaman fariyara mɔgɔw ma wala u y’u fanga digi mɔgɔw kan. Tiɲɛn na, adamadenw ka koow b’a yira ko u caaman m’u ka kuntigiya kɛ cogo ɲuman na fewu (Waajulikɛla 8:9). Ɲɛyirali fɛ, Sayuli tun ye mɔgɔ ɲuman ye, a majiginin tun lo tuma min na Jehova y’a sugandi k’a kɛ masacɛ ye. Nka, a y’a yɛrɛ bila kuncɛbaya ni ɲangoya la ani a tora ka cɛɛ kantigiman Dawuda niin tɔɔrɔ (1 Samuyɛli 9:20, 21; 10:20-22; 18:7-11). Masacɛ ɲuman minw ye Israɛl mara, Dawuda nana kɛ olu dɔ ye. Nka, a y’a ka fanga digi dɔw kan a kɛtɔ ka iticɛ Uri ka muso sonya ani k’o cɛɛ jalakibali bila kɛlɛbolow ɲɛfɛ walisa u k’a faga (2 Samuyɛli 11:1-17). Tiɲɛn na, dafabaliya b’a to a man nɔgɔ adamadenw fɛ k’u ka kuntigiya kɛ cogo ɲuman na. Kuntigi minw tɛ Jehova bonya, olu yɛrɛ ta ka jugu. Angeletɛri faamancɛ dɔ y’a lakali cogo min na katolikiw ka papu dɔw y’a to u ye mɔgɔ caaman niin tɔɔrɔ ani a y’a fɔ ko: “Kuntigiya be mɔgɔ tiɲɛ, ka kɛ bɛɛ kuntigi ye, o be mɔgɔ tiɲɛ pewu pewu.” Ka nin bɛɛ to an hakili la, an ka ɲiningali nin lajɛ: Mun na an ka kan ka kuntigiya bonya?

MUN NA AN KA KAN KA KUNTIGIYA BONYA?

6, 7. a) An be Jehova kanu, o b’an lasun ka mun lo kɛ, ani mun na? b) Mɔgɔ b’a yira cogo di ko a kolonin lo?

⁶ Koo jɔnjɔn minw b’a to an ka kan ka kuntigiya bonya, u basiginin be kanuya lo kan: an be Jehova kanu, ani an b’an mɔgɔɲɔgɔn n’an yɛrɛ kanu fana. Komi an be Jehova kanu ka tɛmɛ fɛɛn bɛɛ kan, o kama an b’a fɛ k’a ninsɔndiya (Talenw 27:11; Mariki 12:29, 30). An b’a lɔn ko kabi murutili kɛra Edɛn kɔnɔ, mɔgɔw b’a la k’a ka masabaya sɔsɔ ko joo t’a fɛ ka kɛ duniɲa kuru bɛɛ kuntigi ye. Adamadenw fanba tugura Sutana kɔ ani ka ban Jehova ka kuntigiya ma. An kɔni, a ka di an ye ka tugu Jehova kɔ. Kumaba minw fɔra Yirali 4:11 kɔnɔ, n’an b’u kalan, u b’an dusu lamaga. An b’a faamu ka ɲɛ ko joo be Jehova lo fɛ ka kɛ duniɲa kuru bɛɛ kuntigi ye! An be Jehova ka masabaya lafasa ani an be sɔn a k’an ɲɛminɛ an ka loon o loon ɲɛnamaya kɔnɔ.

⁷ Ka Jehova ka kuntigiya bonya, o tɛ dan kanminɛli dɔrɔn ma. A ka di an ye ka mɛnni kɛ Jehova fɛ sabu an b’a kanu. Nka, koo dɔw be se k’a to a be gwɛlɛya an ma kosɔbɛ ka mɛnni kɛ a fɛ. O koo ɲɔgɔnw na, an ka kan k’an yɛrɛ degi kololi la i ko an ye cɛdennin min koo fɔ a daminɛ na. An hakili b’a la ko Yezu kolola a Faa ye k’a sago kɛ hali n’a tun ka gwɛlɛ a ma kosɔbɛ. A y’a fɔ a Faa ye ko: “Ne sago kana kɛ fɔɔ e sago.”—Luka 22:42.

8. a) Ka kolo Jehova ye, o kɔrɔ ko di ani Jehova yɛrɛ be mun lo miiri o koo la? b) Mun lo be se k’an dɛmɛ ka ladili lamɛn ani ka sɔn kololi ma? (Ɲɛɛ 46-47 ka koorilen lajɛ.)

⁸ Ayiwa, Jehova tɛ kuma tugun an kelen kelen fɛ bi. A be tɛmɛ Bibulu fɛ ani a ka lasigidenw fɛ dugukolo kan k’o kɛ. Tuma caaman na, an b’a yira ko an be kolo Jehova ka kuntigiya ye an kɛtɔ ka bonya la mɔgɔw kan a ye minw sigi kuntigiya la wala a y’a to minw ka kuntigiya kɛ an kun na. O mɔgɔw be tɛmɛ Bibulu fɛ k’an ladi ani k’an kolo. N’an be ban u ma ani ka muruti, an be don Ala lo gasi la. Tuma min na Israɛldenw ŋunuŋununa ani u murutira Musa kama, Jehova y’a jati ko u y’o kɛ ale lo la.—Nɔnburuw 14:26, 27.

9. N’an b’an mɔgɔɲɔgɔn kanu, mun na o bena an lasun ka kuntigiya bonya? A ɲɛɛ yira.

⁹ An be kuntigiya bonya sabu an b’an mɔgɔɲɔgɔnw kanu fana. Cogo di do? Ayiwa, i ka miiri k’a filɛ i ye kɛlɛbolo dɔ ka sɔrɔdasi ye. Kɛlɛbolo ka see sɔrɔli ani a ka kisili yɛrɛ be bɔ sɔrɔdasi kelen kelen bɛɛ ka kanminɛli n’a ka kololi la, ni bɛɛ kelen kelen be sɔn a kuntigi ka fɔta ma. N’i murutira ka ban i kuntigi ka fɔta ma, i bena i sɔrɔdasiɲɔgɔnw bɛɛ bila farati la. Tiɲɛn lo, adamadenw ka kɛlɛbolow be tiɲɛni minw kɛ bi duniɲa kɔnɔ, u ka jugu kosɔbɛ. Nka, Jehova be ni kɛlɛbolow ye minw be koɲuman dɔrɔn lo kɛ. Bibulu be Jehova kofɔ siɲɛ caaman ko “Kɛlɛbolow Matigi.” (1 Samuyɛli 1:3, ABM). A be mɛlɛkɛ barikaman caaman caamanba ɲɛminɛ. A sagokɛla minw be dugukolo kan, tuma dɔw la, a b’u suma ni kɛlɛbolo ye (2 Timote 2:3; Ezekiyɛli 37:1-10, ABM). Jehova ye mɔgɔ minw sigi kuntigiya la an kun na, n’an murutira olu bolo, an ni minw be ɲɔgɔn dɛmɛ kɛlɛ la Alako ta fan fɛ, yala an tɛna olu bila farati la wa? Ni kerecɛn dɔ murutira diinan mɔgɔkɔrɔw kama, kafoden tɔɔw be se ka tɔɔrɔ sɔrɔ o kosɔn (1 Korɛntikaw 12:14, 25, 26). Ni deen dɔ murutira, denbayamɔgɔw bɛɛ be se ka tɔɔrɔ sɔrɔ o kosɔn. O la, kuntigiya kalifara minw ma, n’an b’u bonya ani ka mɛnni kɛ u fɛ, an b’a yira ko an b’an mɔgɔɲɔgɔnw kanu.

10, 11. N’an t’a fɛ ka bɔnɛ lase an yɛrɛ ma, cogo juman na o be se k’an lasun ka kuntigiya bonya?

¹⁰ An be kuntigiya bonya sabu an yɛrɛ ka nafa b’a la fana. Ni Jehova b’a ɲini an fɛ ko an ka kuntigiya bonya, tuma caaman na a b’a fɔ fana an bena nafa min sɔrɔ o la. Ɲɛyirali fɛ, a b’a fɔ denmisɛnw ye ko u k’u faa n’u baa bonya walisa u ka se ka sijan ni hɛɛrɛ sɔrɔ (Deteronɔmu 5:16; Efɛzikaw 6:2, 3). A b’a fɔ an ye ko an ka kafo ka diinan mɔgɔkɔrɔw bonya sabu n’an m’o kɛ o be se ka kɛ makosa ye an fɛ Alako ta fan fɛ (Eburuw 13:7, 17). A b’a fɔ an ye fana ko an ka mɛnni kɛ faamanw fɛ sabu o b’an tanga.—Ɔrɔmukaw 13:4.

¹¹ N’an b’a lɔn fɛɛn min kama Jehova b’a ɲini an fɛ an ka kuntigiya bonya, o bena an dɛmɛ k’o kɛ. Tiɲɛn tɛ? Yɔrɔ jɔnjɔn saba la, an k’a filɛ cogo min na an be se k’a yira ko an be kuntigiya bonya.

KUNTIGIYA BONYACOGO DENBAYA KƆNƆ

12. Jehova ye lɔyɔrɔ juman di gwatigi ma, ani a ka ɲi k’o dafa cogo di?

¹² Jehova yɛrɛ lo ye denbaya juu sigi. Komi Ala tɛ koferekenin tigi ye, a ye labɛn kɛ walisa denbaya ka koow ka kɛ a ɲɛɛ ma (1 Korɛntikaw 14:33). A ye furucɛ lo kɛ denbaya kuntigi ye. Furucɛ b’a kuntigi Krista Yezu bonya a kɛtɔ k’a ka kuntigiya kɛ i ko Yezu b’a kɛ cogo min na kafo kun na (Efɛzikaw 5:23). O kama, furucɛ man kan k’a kuun bɔ a ka kunkanbaara kɔrɔ, nka a ka kan k’a cɛsiri k’a dafa. A fana man kan ka fariya wala k’a fanga digi a muso n’a deenw kan, nka a ka kan ka magaya ani k’u minɛ ni kanuya ni ɲumanya ye. A b’a to a hakili la ko daan b’ale ka kuntigiya la, a ka kuntigiya tɛ Jehova ta sanfɛ abada.

13. Muso be se k’a ka lɔyɔrɔ baara kɛ cogo di walisa k’a koo diya Jehova ye?

¹³ Muso ka kan ka kɛ a cɛɛ dɛmɛbaga ye min kɛɲɛnin be a cɛɛ ma. Ala ye kuntigiya di ale fana ma sabu Bibulu b’a fɔ denmisɛnw ye k’u kana ban u “bamuso darakan na.” (Talenw 1:8). A ka kuntigiya tɛ a cɛɛ ta sanfɛ. Kerecɛnmuso b’a cɛɛ ka kuntigiya bonya a kɛtɔ k’a dɛmɛ k’a ka soo kuntigiya dafa. A man kan k’a dɔgɔya wala k’a lasun a k’ale sago kɛ diyagoya la. A fana t’a ɲini k’a ka lɔyɔrɔ ta. Nka a b’a dɛmɛ ani a be jɛn n’a ye ka koow kɛ. N’a cɛɛ ye koo dɔ latigɛ min man di a ye, a be se k’a ka miiriya fɔ ni bonya ye, nka a be kolo a cɛɛ ye. N’a cɛɛ ka diinan be dan na n’ale ta ye, o koo be se ka gwɛlɛya dɔw lase a ma. Nka n’a be kolo, o be se k’a cɛɛ lasun ka Jehova yɔrɔ ɲini.—1 Piyɛri 3:1.

14. Denmisɛnw be se k’u wolobagaw ni Jehova ninsɔndiya cogo di?

¹⁴ Ni denmisɛnw be mɛnni kɛ u faa n’u baa fɛ, o be Jehova ninsɔndiya. O be u wolobagaw fana ninsɔndiya ani k’u bonya (Talenw 10:1). Denmisɛnw ka kan k’o kanminɛli kelen lo kɛ hali n’u bangebaga kelen dɔrɔn lo b’u lamɔna. U b’a faamu ko u faa wala u baa min b’u lamɔna a kelen, a mako b’a la kosɔbɛ u k’a dɛmɛ ani ka mɛnni kɛ a fɛ. Ala ye lɔyɔrɔ min di denbaya mɔgɔw ma, ni bɛɛ b’o dafa, o be kɛ sababu ye ninsɔndiyaba ni hɛɛrɛ be sɔrɔ denbaya kɔnɔ. O be bonya la Jehova Ala kan, ale min ye denbayaw bɛɛ jusigibaga ye.—Efɛzikaw 3:14, 15.

MƆGƆW BONYACOGO KAFO KƆNƆ

15. a) An be se k’a yira cogo di ko an be Jehova ka kuntigiya bonya kafo kɔnɔ? b) Mun lo be se k’an dɛmɛ ka mɛnni kɛ an ɲɛminɛbagaw fɛ? (Gafe nin ɲɛɛ 48-49 ka koorilen lajɛ.)

¹⁵ Jehova y’a Dencɛ lo kɛ kerecɛn kafo kuntigi ye (Kɔlɔsikaw 1:13). Yezu fana ye cii di a ka “Jɔnkɛ dannamɔgɔ hakiliman” ma a k’a janto Ala ka jama ka Alakow la dugukolo kan (Matiyo 24:45-47, ABM). Jehova Seerew ka Koow Ɲɛnabɔla Jɛnkulu lo ye o jɔncɛ jɛnkulumɔgɔw ka lasigiden ye. I ko kerecɛn fɔlɔw ka wagati la, bi fana diinan mɔgɔkɔrɔw be Koow Ɲɛnabɔla Jɛnkulu ka cikanw n’a ka ladiliw sɔrɔ batakiw fɛ wala a ka lasigidenw fɛ i n’a fɔ kɔrɔsibaga tagamakɛlaw. N’an be diinan mɔgɔkɔrɔw ka kuntigiya bonya, o b’a yira ko an be mɛnni kɛra Jehova lo fɛ.—Eburuw 13:17.

16. Mun na a fɔra ko hakili senu lo be diinan mɔgɔkɔrɔw sigi u ka baara la?

¹⁶ Diinan mɔgɔkɔrɔw ni kɔrɔsigi cidenw tɛ mɔgɔ dafaninw ye. Fiyɛn b’u la i n’a fɔ dɔ be an fana na. O bɛɛ n’a ta, Ala y’u kɛ “nili fɛnw” ye walisa ka kafo dɛmɛ a ka to ka barika sɔrɔ Alako ta fan fɛ (Efɛzikaw 4:8, ABM). Hakili senu lo ye diinan mɔgɔkɔrɔw sigi u ka baara la (Kɛwaliw 20:28). Cogo di do? A fɔlɔ, o cɛɛw ka kan ka sarati dɔw dafa, o minw sɛbɛra Ala ka Kuma kɔnɔ hakili senu barika la (1 Timote 3:1-7, 12; Titi 1:5-9). Ka fara o kan, ni diinan mɔgɔkɔrɔw be sɛgɛsɛgɛri kɛra k’a filɛ ni balimacɛ dɔ be saratiw dafa, u be delili kɛ kosɔbɛ walisa Jehova ka hakili senu k’u ɲɛminɛ.

17. Mun na kerecɛnmusow b’u kuun datugu tuma dɔw la n’u be kafo ka baara dɔw kɛra?

¹⁷ Koow sira fɛ, diinan mɔgɔkɔrɔw wala kɔrɔsigi cidenw lo ka kan ka baara dɔw ɲɛminɛ kafo kɔnɔ i n’a fɔ waajulibaara lajɛn. Nka, a be se ka kɛ ko olu si labilanin tɛ yen k’o baara ɲɔgɔn kɛ. O koo ɲɔgɔn na, balimacɛ minw batizera, olu dɔw be se k’o baara kɛ u nɔɔ na. Ni balimacɛ batizenin si labilanin tɛ yen, balimamuso setigi dɔw be se k’o kɛ. Nka u ka kan k’u kuun datugua (1 Korɛntikaw 11:3-10). O sarati tɛ musow dɔgɔya. Nka, o be sababu di musow ma u k’a yira ko Jehova ye labɛn min kɛ ka ɲɛsin kuntigiyako ma denbaya ni kafo kɔnɔ, u b’o bonya.

FAAMANW BONYACOGO

18, 19. a) Miiriya minw sɛbɛra Ɔrɔmukaw 13:1-7 la, i be se k’u ɲɛfɔ cogo di? b) An b’a yira cogo di ko an be faamanw bonya?

¹⁸ Miiriya minw sɛbɛra Ɔrɔmukaw 13:1-7 la, kerecɛn sɔbɛw b’u janto k’u sira tagama koɲuman. O vɛrisew kalan b’an dɛmɛ an k’a faamu ko ‘faaman’ minw kofɔra yen olu ye gofɛrɛnɛman ka faamanw lo ye. Jehova mana a to o faamanw ka mɛɛn cogo o cogo, u be baara nafamanw n’an makoɲɛko dɔw kɛra ani u be mɔgɔw bali u kana koow kɛ u kun fɛ. An b’a yira ko an be bonya la o faamanw kan an kɛtɔ ka jamana ka sariyaw labato. An b’an janto k’an ka lanpow bɛɛ sara. Faamanw mana sɛbɛ o sɛbɛ ɲini an fɛ, an b’o dafa ka ɲɛ. Sariya o sariya mana ɲɛsin an yɛrɛ ma, an ka denbaya, an ka baarada wala an bololafɛnw ma, an b’o sariya labato. Nka an tɛ sɔn ka kolo faamanw ye n’u y’a ɲini an fɛ ko an ka Ala ka sariya dɔ tiɲɛ. O koo ɲɔgɔn na, an be Yezu ka cidenw ladegi k’a fɔ faamanw ye ko: “Anw te se ka ban Ala sago la ka adamadenw ta kɛ.”—Kɛwaliw 5:28, 29; koorilen nin lajɛ gafe ɲɛɛ 42 kan: “Ne ka kan ka kolo kuntigiya juman ye?”

¹⁹ An b’a yira ko an be faamanw bonya an ka koow kɛcogo fana fɛ. Tuma dɔw la, an be se k’an yɛrɛ sɔrɔ gofɛrɛnɛman mɔgɔw ɲɛɛ kɔrɔ. Ciden Pol y’a yɛrɛ sɔrɔ kuntigi dɔw ɲɛɛ kɔrɔ i n’a fɔ masacɛ Agiripa ani gofɛrɛnɛrɛ Fɛsitusi. O cɛɛw ka sɔnkolonya bɛɛ na ta, Pol kumana u fɛ ni bonya ye (Kɛwaliw 26:2, 25). An ka Pol ladegi n’an be kumana gofɛrɛnɛman ka mɔgɔ dɔ fɛ: a ka kɛ faamanba ye wala polisicɛ dama ye. Lakɔliso la, kerecɛn denmisɛnw b’u jija k’o bonya ɲɔgɔn la u ka karamɔgɔw ni lakɔli ɲɛmɔgɔw n’a baarakɛlaw kan. Mɔgɔ minw b’an ka diinan tɔgɔ ɲuman fɔ, an tɛ olu dɔrɔn bonya dɛ. Nka, hali minw be Jehova Seerew kɛlɛ, an b’olu fana bonya n’an be kumana u fɛ. Tiɲɛn na, mɔgɔ minw tɛ Jehova Seerew ye, olu ka kan k’a kɔrɔsi ko an be mɔgɔw bonya.—Ɔrɔmukaw 12:17, 18; 1 Piyɛri 3:15.

20, 21. N’an be kuntigiya bonya cogo bɛnnin na, nafa jumanw be se ka sɔrɔ o la?

²⁰ An kana sigasiga ka mɔgɔw bonya. Ciden Piyɛri y’a sɛbɛ ko: “Aw ka mɔgɔ bɛɛ boɲa.” (1 Piyɛri 2:17). Mɔgɔw mana a kɔrɔsi ko an b’u bonya sɔbɛ la, o be se ka nɔɔba to u kan. I hakili to a la ko bi, mɔgɔ caaman t’u mɔgɔɲɔgɔn bonya. N’an be mɔgɔw bonya, an b’a yira o cogo la ko an be Yezu ka cikan nin labato: “Aw ka kɛwaliɲumanw kɛ ka yeelen bɔ mɔgɔw ye ten, waasa u ka aw sankolo la Faa boɲa.”—Matiyo 5:16.

²¹ Nin duniɲa dibiman kɔnɔ, mɔgɔ minw be ni dusukun ɲuman ye, Ala ka yeelen b’olu sama. O cogo la, n’an be mɔgɔ bonya denbaya ni kafo kɔnɔ ani n’an be gofɛrɛnɛman mɔgɔw fana bonya, o be se ka mɔgɔ dɔw lasun u ka tagama n’an ye yeelen na. O ye jigiya kabakoman ye dɛ! Nka, hali n’o ma kɛ, an lanin be koo kelen na: n’an be mɔgɔw bonya, o ka di Jehova ye ani o b’an dɛmɛ an ka to Ala ka kanuya la. O ye sara ye min ɲɔgɔn tɛ yen!