Womebɔbɔ De Ta Agu O

Ɣeyiɣi aɖe le Fia Nebukadnezar ƒe drɔ̃ea kuku tso legba gãa ŋu megbe la, ewɔ sikalegba gã aɖe. Eli legba la ɖe Dura tagba eye wòna dukɔ la ƒe ame ŋkutawo va ƒo ƒu ɖe legbaa ŋkume, Sadrak, Mesak kple Abednego hã le wo dome. Fia la ɖe gbe be: ‘Ne miese kpẽwo, saŋku kple dze nueveeawo ƒe ɖiɖi la, miabɔbɔ ade ta agu na sikalegba la! Ame si mabɔbɔ ade ta agu o la, woatsɔe aƒu gbe ɖe kpodzo si le bibim vlavlavla la me.’ Ðe Hebrivi etɔ̃awo abɔbɔ ade ta agu na legbaa loo alo woayi edzi asubɔ Yehowa ɖeɖe koa?

Fia la ɖe gbe be woaƒo haa. Ame sia ame bɔbɔ de ta agu na legba la, gake Sadrak, Mesak kple Abednego ya mewɔe o. Ame aɖewo kpɔ wo eye wogblɔ na fiaa be: ‘Hebrivi etɔ̃ mawo gbe be yewomade ta agu na wò legba la o.’ Nebukadnezar dɔ ame woyɔ wo vɛ eye wògblɔ na wo be: ‘Mana mɔnukpɔkpɔ bubu mi be miade ta agu na legba la. Ne miegbe la, matsɔ mi aƒu gbe ɖe kpodzo la me. Mawu aɖeke mate ŋu axɔ na mi o.’ Woɖo eŋu nɛ be: ‘Mehiã be nàna mɔnukpɔkpɔ bubu mí o. Mía Mawu la ate ŋu axɔ na mí. Gake ne meɖe mí o hã la, Oo fia, míasubɔ wò legba la o.’

Nebukadnezar do dziku vevie. Egblɔ na eƒe ameawo be: ‘Mido dzo ɖe kpodzoa me wòaxɔ dzo zi gbɔ zi adre wu ale si wodonɛ!’ Eyome eɖe gbe na eƒe asrafoawo be: ‘Mibla ŋutsu siawo miatsɔ wo aƒu gbe ɖe dzoa me!’ Kpodzoa xɔ dzo ale gbegbe be esi asrafoawo te ɖe eŋu la woku enumake. Hebrivi etɔ̃awo ge dze dzoa me. Gake esi Nebukadnezar do mo ɖa be yeakpɔ dzoa me ɖa la, ekpɔ ame ene le dzoa me ke menye ame etɔ̃ o, eye wonɔ zɔzɔm le dzoa me. Eƒe dzi lã kpo eye wòbia eƒe amegãwo be: ‘Menye ame etɔ̃e míetsɔ ƒu gbe ɖe dzoa me oa? Mele ame ene kpɔm eye wo dometɔ ɖeka le abe mawudɔla ene!’

Nebukadnezar te ɖe dzoa ŋu eye wòdo ɣli gblɔ be: ‘Mi Mawu Ŋusẽkatãtɔ la subɔlawo, mido go!’ Esi Sadrak, Mesak kple Abednego do go le dzoa me evɔ nu vevi aɖeke mewɔ wo o la, ewɔ nuku na ame sia ame. Naneke mewɔ woƒe ŋutilã, taɖa kple awu si wodo o, dzo meʋẽ le wo ŋu gɔ̃ hã o.

Nebukadnezar gblɔ be: ‘Sadrak, Mesak kple Abednego ƒe Mawu la lolo ŋutɔ. Edɔ eƒe dɔla ɖa wòva xɔ na wo. Mawu aɖeke mede woƒe Mawu la nu o.’

Àdi be yeawɔ nuteƒe na Yehowa le nɔnɔme sesẽwo me abe Hebrivi etɔ̃awo enea?