Emenyawo

Ele vevie be míaxɔ Kristo ƒe tafevɔsaa dzi ase; tafea wɔa akpa vevi aɖe be tame si Yehowa ɖo ɖe amegbetɔwo ŋu tso gɔmedzedzea me la nava me. Nyati eve siawo adzro nu si tae tafea va hiã, viɖe siwo wòhe vɛ kple ale si míate ŋu aɖee afia be míekpɔ ŋudzedze ɖe nunana sia si xɔ asi wu ɖe sia ɖe, si mía Fofo lɔ̃ame si le dziƒo la na mí ŋu.

Yehowa na ame vovovowo kplɔ eƒe amewo ƒe akpe geɖe. Nu ka tae míate ŋu agblɔ be Yehowae nɔ mɔ fiam kplɔla mawo, eye aleke míewɔ nya be eyae le mɔ fiam kluvi nuteƒewɔla kple aɖaŋudzela la egbea? Nyati siawo adzro kpeɖodzi etɔ̃ siwo ɖea dzesi le ame siwo Mawu tia be woanye ye teƒenɔlawo ŋu ɣesiaɣi la me.