Ale Si Nàwɔ Abi Ðe Ðaseɖiɖidɔa Me—Na Hehe Biblia Nusrɔ̃viwo Be Nusɔsrɔ̃ Ƒe Ðoɖo Nyui Nanɔ Wo Si

Nu Si Ta Wòle Vevie: Hafi Biblia nusrɔ̃viwo nate ŋu ayi ŋgɔ le gbɔgbɔ me la, ehiã be woanɔ Mawu ƒe Nya la me nuɖuɖu sesẽwo ɖum be wòado ŋusẽ woƒe susu kple dzi ke menye gɔmedzenufiafiawo ɖeɖe ko o. (Heb. 5:12–6:1) Nusɔsrɔ̃ bia kutrikuku. Ebia be woatsɔ nu yeye siwo srɔ̃m wole la anɔ sɔsɔm kple nu siwo ame nya xoxo eye woade dzesi mɔ siwo nu nu yeye siawo aɖe vi na ame le. (Lod. 2:1-6) Ne nusrɔ̃viwo srɔ̃ ale si woawɔ numekukui la akpe ɖe wo ŋu woate ŋu azã Biblia alo míaƒe agbalẽwo atsɔ akpɔ ŋuɖoɖo na woƒe biabiawo alo esiwo amewo abia wo. Eye agbagba siwo woadze be yewoatsɔ nu siwo srɔ̃m yewole ade dɔwɔwɔ me la akpe ɖe wo ŋu woanɔ te ɖe tetekpɔ siwo woado goe esi wonye Kristotɔwo ta la nu.—Luka 6:47, 48.

Ale Si Nàwɔe:

Te gbe ɖe ale si wòle vevie be wòado gbe ɖa abia Yehowa ƒe kpekpeɖeŋu hafi adze nusɔsrɔ̃ ɖe sia ɖe gɔme la dzi.—Yoh. 14:26; 1 Kor. 2:10.
Tso nusɔsrɔ̃a ƒe gɔmedzedze la, de dzi ƒo na wò nusrɔ̃via be wòadzra ɖo ɖe Biblia nusɔsrɔ̃ ɖe sia ɖe ŋu do ŋgɔ. Tsɔ wò nusrɔ̃gbalẽa fiae, eye nàfia ale si wòate fli ɖe nya veviawo ko te lae.
Fia wò nusrɔ̃via ale si wòaɖo nyawo ŋu le eya ŋutɔ ƒe nyawo me. Mègana nusɔsrɔ̃a nanɔ kplalaa ahanye nyabiabia kple ŋuɖoɖo si me nusrɔ̃via naxlẽ ŋuɖoɖoawo tso agbalẽa me tẽe ko evɔ o.
De dzi ƒo na wò nusrɔ̃via be wòaxlẽ Mawu ƒe Nya la ƒe akpa aɖe gbe sia gbe. Tsɔ Biblia xexlẽ ƒe ɖoɖowɔɖi si le jw.org si fia mɔ bɔbɔe aɖe si dzi wòato awɔ esia la fiae. Ebia kutrikuku hafi woate ŋu anɔ Biblia xlẽm gbe sia gbe, gake nu nyui geɖe ate ŋu ado tso agbagba si wòadze be yeawɔ esia la me.—Ps. 1:2, 3.
Fia wò nusrɔ̃via ale si wòate ŋu azã Watchtower Library alo Internet Dzi Agbalẽdzraɖoƒea atsɔ adi ŋuɖoɖo na Biblia me biabia siwo le esi. Kpe ɖe eŋu wòate ŋu anya ŋɔŋlɔdzesi kpui siwo wotsɔ dea dzesi agbalẽ siwo koŋ míezãna le hame ƒe kpekpewo me la hã.

Te Esia Kpɔ Le Ɣletia Me:

Ne miesrɔ̃ memama siwo le tanya sue aɖe te alo ta aɖe vɔ la, bia wò Biblia nusrɔ̃via ne wòaƒo nu tso nu siwo wòsrɔ̃ la ŋu kpuie. Ne nusrɔ̃vi mele asiwò o la, ekema ne èxlẽ Biblia ƒe akpa aɖe alo Gbetakpɔxɔ aɖe la, dze agbagba be nàto nu siwo nèsrɔ̃ la ɖe eme be wòakpe ɖe ŋuwò be nu siwo nèxlẽna la gɔme sese naganyo ɖe edzi.