Tafe La Ʋu Tsitretsitsi Ƒe Mɔkpɔkpɔ Ði

Ŋkuɖodzia nyea ɣeyiɣi nyui aɖe na mí be míade ŋugble le etsɔmeyayra siwo tafea ʋu ɖi na mí la ŋu. Yayra siawo dometɔ ɖekae nye tsitretsitsia. Yehowa meɖoe be amegbetɔwo naku hafi o. Eya tae nu siwo gbãa dzi na ame vevie la dometɔ ɖekae nye míaƒe ame vevi aɖe ƒe ku. (1Ko 15:26) Esi Yesu kpɔ eƒe nusrɔ̃lawo wonɔ Lazaro si ku fam la, ete ɖe edzi vevie. (Yh 11:33-35) Esi wònye Yesu srɔ̃ Fofoa ƒe nɔnɔmewo pɛpɛpɛ heɖenɛ fiana ta la, míate ŋu aka ɖe edzi be etena ɖe Yehowa hã dzi ŋutɔ ne wòkpɔ mí míele míaƒe ame vevi siwo ku la fam. (Yh 14:7) Yehowa le mɔ kpɔm vevie na ɣeyiɣi si wòafɔ esubɔla siwo ku la ɖe tsitre, eye ele be míawo hã míakpɔ mɔ na ɣeyiɣi ma.—Hio 14:14, 15.

Ðoɖo ka nue Yehowa afɔ amewo ɖe tsitre ɖo? Megblɔ nu geɖe tso eŋu o. Gake esi Yehowa nye Mawu si wɔa nu ɖe ɖoɖo nu ta la, míate ŋu aka ɖe edzi be afɔ amewo ɖe tsitre le ɖoɖo nyui nu. (1Ko 14:33, 40) Le kunuwɔwɔwo teƒe la, ɖewohĩ woawɔ ɖoɖo ɖe wɔna tɔxɛwo ŋu be míatsɔ ado woe zɔ na ame siwo woafɔ ɖe tsitre. Ðe nèdea ŋugble le tsitretsitsia ŋu, vevietɔ ne èle wò ame vevi aɖe si ku fama? (2Ko 4:17, 18) Ðe nèdaa akpe na Yehowa ɖe tafe si wòna kple ale si wòɖee fia le Ŋɔŋlɔawo me be kukuawo agava nɔ agbe ake la ta?—Kol 3:15.

• Xɔ̃wò kple wò ƒometɔ kawoe nèle mɔ kpɔm na vevie le tsitretsitsia me?

• Ame siwo ŋu Biblia ƒo nu tsoe dometɔ kawoe nèle mɔ kpɔm vevie be yeado go ahaɖo dze kple?