Ale Si Nàdo Dzi Ne Wowɔ Nu Madzɔmadzɔ Ðe Ŋuwò

Xlẽ 1 Mose 37:​23-28; 39:​17-23 be nàkpɔ ale si Yosef do dzi esi wowɔ nu madzɔmadzɔ ɖe eŋu.

Bu nudzɔdzɔ bliboa ŋu. Nu ka tae amewo wɔ nu madzɔmadzɔ ɖe Yosef ŋu? (1 Mose 37:​3-11; 39:​1, 6-10) Ɣeyiɣi didi kae wòhiã be Yosef nado dzi? (1 Mose 37:2; 41:46) Le ɣeyiɣi mawo mea, nu kae Yehowa wɔ tsɔ kpe ɖe Yosef ŋu, gake nu kae Yehowa mewɔ o?—1 Mose 39:​2, 21; w23.01 17 mm. 13.

Ku nu me yi ŋgɔe. Biblia megblɔ tso Yosef ŋu be eʋli eɖokui ta gblɔ be alakpa dam Potifar srɔ̃ le ɖe ye si o. Aleke mawunyakpukpui siawo akpe ɖe mía ŋu míakpɔ nu si tae Yosef anya zi ɖoɖoe esi wotso enu alakpatɔe alo nu si tae mele be míakpɔ mɔ be woagblɔ nu sia nu si dzɔ la na mí tsitotsito o? (Lod. 20:2; Yoh. 21:25; Dɔw. 21:37) Nɔnɔme kawoe anya kpe ɖe Yosef ŋu wòte ŋu do dzi?—Mika 7:7; Luka 14:11; Yak. 1:​2, 3.

De dzesi nufiameawo. Bia ɖokuiwò be:

• ‘Nu madzɔmadzɔ kae amewo ate ŋu awɔ ɖe ŋunye le esi menye Yesu yomedzela ta?’ (Luka 21:​12, 16, 17; Heb. 10:​33, 34)

• ‘Nu kae mate ŋu awɔ fifia si akpe ɖe ŋunye be mado dzi ne wowɔ nu madzɔmadzɔ ɖe ŋunye?’ (Ps. 62:​7, 8; 105:​17-19; w19.07 2-7)