BIBLIA ME BIABIAWO ƑE ŊUÐOÐOWO
Ðe mawudɔlawo kpena ɖe mía ŋua?
Abe ale si mawudɔlawo kpe ɖe Mawu subɔla wɔnuteƒe Daniel ŋu le blema ene la, nenema kee wokpena ɖe amewo ŋu egbea be nya nyui la naɖe vi na wo
Yehowa Mawu wɔ mawudɔla miliɔn geɖe xoxoxo hafi va wɔ amegbetɔwo. (Hiob 38:4, 7) Mawudɔla siawo nye gbɔgbɔmeme siwo si ŋusẽ le, siwo wɔa Mawu ƒe gbe dzi. Ɣeaɖewoɣi la, Mawu dɔa wo ɖa be woafia mɔ yeƒe subɔla siwo le anyigba dzi ahakpɔ wo ta. (Psalmo 91:10, 11) Egbea, mawudɔlawo le kpekpem ɖe amewo ŋu be nya nyui si Yesu yomedzelawo le gbeƒã ɖemee la naɖe vi na wo.—Xlẽ Nyaɖeɖefia 14:6, 7.
Ðe wòle be míado gbe ɖa na mawudɔlawoa? Ao. Subɔsubɔnuwɔnae gbedodoɖa nye, eye Mawu ɖeka koe wòdze be míado gbe ɖa na. (Nyaɖeɖefia 19:10) Esi wònye be Mawu ƒe subɔlawoe mawudɔlawo nye ta la, womewɔa amewo ƒe gbe dzi o, ke boŋ Mawu ƒe gbe dzie wowɔna. Eya ta Mawu ɖeka koe wòle be míado gbe ɖa na to Yesu dzi.—Xlẽ Psalmo 103:20, 21; Mateo 26:53.
Ðe mawudɔla vɔ̃ɖiwo hã lia?
Esi Mawu wɔ mawudɔlawo la, ena tiatiawɔwɔ ƒe ablɔɖe wo abe amegbetɔwo ke ene, si fia be woate ŋu atiae be yewoawɔ nyui alo vɔ̃. Nublanuitɔe la, mawudɔla geɖewo dze aglã ɖe Mawu ŋu. (2 Petro 2:4) Wo dometɔ si dze aglã gbã lae nye Satana; bubuwo hã dze eyome eye wozu gbɔgbɔ vɔ̃wo. Ƒe aɖewoe nye esi va yi la, wonya Satana kple eƒe gbɔgbɔ vɔ̃wo ɖa le dziƒo hetsɔ wo ƒu gbe ɖe anyigba dzi.—Xlẽ Nyaɖeɖefia 12:7-9.
Ŋutasesẽ kple nu vɔ̃ɖi wɔwɔ siwo le dzidzim ɖe edzi tso ƒe 1914 me ke la nye dzesi be eteƒe madidi o, Mawu axɔ ŋusẽ le Satana kple gbɔgbɔ vɔ̃wo siaa si. Ekema Mawu ana anyigba la nazu Paradiso abe ale si wòɖoe le gɔmedzedzea me ene.—Xlẽ Nyaɖeɖefia 12:12; 21:3, 4.