Nyabiaɖaka

◼ Nu kawoe wòle be ɖeviwo nasrɔ̃ be woayi ŋgɔ aɖo tsitsinyenye gbɔ?

Dzila Kristotɔwo dzea agbagba geɖe hafi ‘hea wo viwo le Yehowa ƒe amehehe kple nuxɔxlɔ̃ me.’ (Ef. 6:4) Le kpɔɖeŋu me, dzilawo kpɔe be eɖea vi ne yewodzro gbe sia gbe mawunyakpukpuia me kple ɖeviawo ŋdi sia ŋdi. Le ƒometadeaguɣi kple ɣeyiɣi bubuwo la, ƒomewo ate ŋu akpɔ míaƒe videowo ahadzro wo me. Woate ŋu adzro “Sɔhɛwo Biana Be . . . ” ƒe nyati aɖe si sɔ me. Woate ŋu awɔ Biblia me nudzɔdzɔ aɖe ƒe fefe alo awɔ ale si míaɖi ɖase ƒe wɔwɔfia. Ke hã be ɖeviwo ‘nayi ŋgɔ aɖo tsitsinyenye gbɔ’ la, ele be woafia Biblia me nyateƒe gogloawo wo.​—Heb. 6:1.

De ŋugble le nu siwo míefiaa amewo le gbeadzi ŋu kpɔ. Zi geɖe la, míedzea agbagba be míazã Nuka Tututue Nye Biblia ƒe Nufiafia? gbalẽa atsɔ adze Biblia-nusɔsrɔ̃ gɔme kple amewo ne míedo go wo zi gbãtɔ alo ne míetrɔ yi wo gbɔ. Ne wowu agbalẽ ma sɔsrɔ̃ nu la, míesrɔ̃a “Midzra Mia Ðokui Ðo Ðe Mawu Ƒe Lɔlɔ̃ La Me” gbalẽa hã kpli wo. Nu ka tae? Elabena Biblia ƒe Nufiafia gbalẽa naa Ŋɔŋlɔawo me sidzedze veviwo sua nusrɔ̃viwo si, eye “Mawu Ƒe Lɔlɔ̃” gbalẽa fiaa ale si woawɔ Biblia me gɔmeɖosewo ŋu dɔ le woƒe agbenɔnɔ me gbe sia gbe la wo. Agbalẽ eve siawo sɔsrɔ̃ kpena ɖe ame yeyewo ŋu be woaƒo “ke ɖe to” le Kristo me ‘ahali ke ɖe xɔse la me.’ (Kol. 2:6, 7) Agbalẽ siawo aɖe vi na mía viwo hã godoo! Ehiã be míafia nu woawo hã tso tafe la, Fiaɖuƒe la kple nɔnɔme si me ame kukuwo le ŋu. Ele be ɖeviwo nanya nu si tae Mawu ɖe mɔ fukpekpe li ɖo, kple nu si ana woade dzesi nuɖoanyi sia ƒe ŋkeke mamlɛawo. Ele be mía viwo naka ɖe edzi be Yehowa Ðasefowoe fiaa nyateƒea. Ele be woase Biblia me gɔmeɖosewo gɔme ahasrɔ̃ ale si woana hehe “woƒe nugɔmesese ƒe ŋutetewo.” (Heb. 5:14) Anyo be dzilawo nabu ɖeviawo ƒe ƒexɔxɔ kple nugɔmeseseŋutete ŋu. Ke hã, ɖevi geɖe tea ŋu srɔ̃a Biblia me nyateƒe gogloawo tso esime wole sue ŋutɔ gɔ̃ hã.​—Luka 2:42, 46, 47.