Zã Míaƒe Nyatakakadzraɖoƒea Le Subɔsubɔdɔa Me​—“Biblia Me Biabiawo Ƒe Ŋuɖoɖowo”

Le jw.org Nyatakakadzraɖoƒea ƒe akpa si nye “Biblia Ƒe Nufiafiawo” la, àkpɔ teƒe si nye “Biblia Me Biabiawo Ƒe Ŋuɖoɖowo.” Ne míenya be nya mawo siwo amewo lɔ̃a biabia la ƒe ŋuɖoɖowo le afi ma la, ke míate ŋu ahe woƒe susu ayi afi ma be woakpɔ Ŋɔŋlɔawo me ŋuɖoɖoawo. Míate ŋu abia nya mawo atsɔ adze dzeɖoɖowo gɔme le gbeadzi hã. Míatia biabiaawo dometɔ ɖeka si ka amewo le míaƒe anyigbamamaa me ahana aƒemenɔlaa nagblɔ eƒe susu, eye míazã numeɖeɖe si le jw.org atsɔ ana wòanya nu si Biblia gblɔ tso eŋu. Eyome míate ŋu afiae afi si míekpɔ ŋuɖoɖoa le. Mɔnu bubu hãe nye be míana wòaxlẽ ŋuɖoɖoa tẽe le Nyatakakadzraɖoƒea. Mɔnu si ŋu dɔ dzikpɔla mɔzɔla aɖe srɔ̃ wɔna wòdzea edzi nɛ ye nye be egblɔna be: “Ame geɖe biana be, ‘Mawue nana míekpea fua?’ Àdi be yeakpɔ ŋuɖoɖoa le aɖabaƒoƒo 51 pɛ ko mea?” Azɔ ezãa eƒe asitelefon tsɔ ƒoa ŋuɖoɖoa si woxlẽ lé ɖe mɔ̃ dzi la nɛ. Ehea aƒemenɔlaa ƒe susu yia Biblia ƒe Nufiafia gbalẽa ƒe ta 11 lia dzi tsɔ ƒoa etae.