Ðo Taɖodzinuwo Le Ŋkuɖodzi Ƒe Ɣeyiɣia Me

Ƒe sia ƒea, Yehowa ƒe amewo kpɔa mɔ be yewoawɔ Ŋkuɖodzia ɖekae. Le kwasiɖa siwo do ŋgɔ na Ŋkuɖodzia kple esiwo kplɔe ɖo mea, míewɔa mɔnukpɔkpɔ tɔxɛ siwo sua mía si la ŋu dɔ tsɔ kafua Yehowa hedaa akpe nɛ ɖe tafea ta. (Ef 1:3, 7) Le kpɔɖeŋu me, míedzea agbagba ale si míate ŋui be míakpe amewo na Ŋkuɖodzia. Ame aɖewo tea ŋu trɔa asi le woƒe ɖoɖowo ŋu ale be woate ŋu azã gaƒoƒo 30 alo 50 atsɔ awɔ kpekpeɖeŋu mɔɖeɖedɔa le March alo April me. Àdi be yeawɔ geɖe le gbeƒãɖeɖedɔa me le Ŋkuɖodzi ƒe ɣeyiɣia me le ƒe sia mea? Nu kae akpe ɖe ŋuwò be nàwɔ esia?

Zi geɖea, míetea ŋu wɔa dɔ geɖe wu ne míewɔ ɖoɖo ɖe nuwo ŋu do ŋgɔ. (Lod 21:5) Esi Ŋkuɖodzi ƒe ɣeyiɣia le gogom taa, ele be míadze ɖoɖowɔwɔ ɖe nuwo ŋu fifia. De ŋugble le ale si nàdi be yeawɔ geɖe le subɔsubɔdɔa me le Ŋkuɖodzi ƒe ɣeyiɣia me ŋu, eye kpɔe ɖa be nu kae nàte ŋu awɔ be nàɖo wò taɖodzinuwo gbɔ hã. Eyome do gbe ɖa na Yehowa be wòayra ɖe wò agbagbadzedzewo dzi.—1Yh 5:14, 15.

Mɔ kawo nue nèsusu be yeate ŋu awɔ geɖe le Ŋkuɖodzi ƒe ɣeyiɣia me le?