Nya Kae Biblia Gblɔ Tso Nukliaʋa Ŋu?
Ale si xexea me dziɖuɖu sesẽwo le aʋawɔnu klitsuwo wɔm la na wòdze ƒãa be nukliaʋa ate ŋu adzɔ bɔbɔe. Amewo tsi dzi vevie be zi ale si wole nukliaʋawɔnu yeyewo wɔm la, zi nenemae wòle bɔbɔe be nukliaʋa nadzɔ. Amewo vɔ̃na gɔ̃ hã be ne woda nukliabɔmb sue ɖeka pɛ hã la, ate ŋu ana nukliaʋa nadzɔ agblẽ nu le xexe bliboa ŋu. Agbalẽ aɖe gblɔ be, míele ɣeyiɣi si “nukliaʋa ate ŋu adzɔ bɔbɔe” me.—Bulletin of the Atomic Scientists.
Ðe nukliaʋa ate ŋu adzɔa? Ne edzɔ la, ɖe wòana míaƒe anyigba natsrɔ̃a? Aleke míawɔ anɔ te ɖe vɔvɔ̃ be nukliaʋa ate ŋu adzɔ la nu? Nya kae Biblia gblɔ?
Nyati sia aɖo biabia siawo ŋu
Ðe Biblia gblɔe ɖi be nukliaʋa adzɔa?
Biblia meƒo nu tso nukliaʋa ŋu o. Ke hã egblɔ nudzɔdzɔ kple amewo ƒe nɔnɔme siwo ate ŋu ana be nukliaʋa nadzɔ bɔbɔe la ŋu nya ɖi.
Bu mawunyakpukpui siwo gbɔna kple nu siwo le dzɔdzɔm le xexea me ŋu kpɔ:
Mawunyakpukpuia: Yesu ƒe nusrɔ̃lawo biae be: “Nu kae anye wò anyinɔɣi kple nuɖoanyia ƒe nuwuɣi la ƒe dzesi?” Yesu ɖo eŋu be: “Dukɔ atso ɖe dukɔ ŋu, eye fiaɖuƒe ɖe fiaɖuƒe ŋu.”—Mateo 24:3, 7.
Xexemenudzɔdzɔwo: Dukɔwo, vevietɔ esiwo si nukliaʋawɔnuwo le la, va le aʋa wɔm kple wo nɔewo fifia wu tsã.
“Ʋunyaʋunyawɔwɔ va do agbogbo ɖe edzi le ƒe siwo va yi me: nudzɔdzɔ siwo he masɔmasɔwo vɛ la dzi ɖe edzi.”—The Armed Conflict Location & Event Data Project.
Mawunyakpukpuia: “Le nuwuɣi la, anyiehefia akpe [kple dziehefia], eye woanɔ wo nɔewo tutum.”—Daniel 11:40.
Xexemenudzɔdzɔwo: Dukɔ siwo tsi tre ɖe wo nɔewo ŋu kple dukɔ bubu siwo de wo dzi la le wo nɔewo tutum, alo le ho ʋlim kple wo nɔewo, ale be yewoakpɔ ŋusẽ geɖe wu, abe ale si Biblia gblɔe ɖi ene. Togbɔ be dukɔ siwo si nukliaʋawɔnu sesẽwo le la mele ezãm tsɔ le aʋa kpem kple wo nɔewo egbea o hã la, woyi edzi le nukliaʋawɔnu siwo kli tsu wu la wɔm.
“Le ƒe ewo siwo va yi me la, aʋawɔwɔ geɖe yi edzi le dukɔwo dome, eye le wo dometɔ aɖewo me la, xexemedziɖuɖu sesẽ aɖewo de akpa ɖeka dzi eye bubuwo hã de akpa kemɛa dzi.”—The Uppsala Conflict Data Program.
Mawunyakpukpuia: “Le ŋkeke mamlɛawo me la, ɣeyiɣi sesẽ siwo me nɔnɔ asesẽ la ava. Elabena amewo anye . . . ame siwo melɔ̃na ɖe ɖoɖo aɖeke dzi o, ameŋugblẽlawo, ame siwo meɖua wo ɖokuiwo dzi o, ame wɔadãwo.”—2 Timoteo 3:1-3.
Xexemenudzɔdzɔwo: Abe ale si ko amewo wɔa nu egbea ene la, xexemedziɖulawo hã melɔ̃na ɖe wo nɔewo ƒe susuwo dzi ɣesiaɣi o. Gake le esi teƒe be woakpɔ nyawo gbɔ le ŋutifafa me la, wodoa ŋɔdzi na wo nɔewo boŋ eye wowɔa nu akpasesẽtɔe. Ale si wowɔa nui ate ŋu ana nukliaʋa nafe ati.
“Ne wometo mɔ aɖeke dzi kpɔ egbɔ be dukɔwo wɔa nu aduadu kple wo nɔewo o la, ɖeko aʋa dziŋɔwo agado gã ɖe edzi.”—S. Saran Kple J. Harman, World Economic Forum.
Ðe Mawu aɖe mɔ nukliaʋa nadzɔa?
Biblia megblɔe o. Gake egblɔ be “nu dovoɖinamewo” adzɔ le míaƒe ŋkekea me. (Luka 21:11) Esia ƒe kpɔɖeŋu aɖee nye atɔmikbɔmb siwo woda le Xexemeʋa Evelia me. Biblia gblɔ susu si tae Mawu ɖe mɔ aʋawɔwɔ li. Be nàsrɔ̃ nu geɖe tso nya sia ŋu la, kpɔ video si nye Nu Ka Tae Mawu Ðe Mɔ Fukpekpe Li?
Ðe nukliaʋa atsrɔ̃ míaƒe anyigba la?
Ao. Ne amegbetɔwo agazã nukliaʋawɔnuwo hã la, Mawu maɖe mɔ woƒe nuwɔna sia nana xexe bliboa natsrɔ̃ o. Menye ɖeko Biblia gblɔ be naneke matsrɔ̃ míaƒe anyigbaa o, ke boŋ egblɔ hã be amegbetɔwo anɔ edzi tegbee.
Ame aɖewo susunɛ be ɣeaɖeɣi ava la, nukliaʋa agblẽ nu le anyigbaa ŋu ale gbegbe be amegbetɔ ʋɛ aɖewo koe asusɔ ɖe edzi eye agbenɔnɔ asesẽ na wo. Ke hã, Biblia na míenya be Mawu aɖɔ nu siwo katã aʋawɔwɔ gblẽ le anyigba ŋu la ɖo keŋkeŋ.
Mawu di be míakpɔ dzidzɔ le anyigba si nya kpɔ ŋutɔ la dzi
Mía Wɔlaa trɔ asi le anyigba ŋu ale gbegbe be ate ŋu aɖɔ eɖokui ɖo. Azɔ hã, Mawu azã eƒe ŋusẽ atsɔ aɖɔ anyigbaa ɖo wòazu yeye, eye wòanye afi si amegbetɔwo anɔ tegbee.—Psalmo 37:11, 29; Nyaɖeɖefia 21:5.
Aleke nàwɔ anɔ te ɖe vɔvɔ̃ be nukliaʋa adzɔ nu?
Ame aɖewo vɔ̃na be nukliaʋa adzɔ eye agblẽ nu eteƒe makɔ o. Biblia ƒe ŋugbedodowo kple aɖaŋuɖoɖowo ate ŋu akpe ɖe ame siawo tɔgbi ŋu be woaɖu vɔvɔ̃ dzi. Le mɔ ka nu?
Biblia gblɔ etsɔme nyui aɖe ŋu nya ɖi ku ɖe anyigbaa kple ame siwo le edzi ŋu. Ŋugbedodo sia le abe “seke ene na míaƒe luʋɔwo,” eye nusɔsrɔ̃ tso eŋu akpe ɖe mía ŋu míagatsi dzi fũu o. (Hebritɔwo 6:19) Míate ŋu aɖe míaƒe dzimaɖitsitsi dzi akpɔtɔ ne míebua egbetɔ ko ŋu, eye míetsia dzi ɖe nu siwo míesusu be woava dzɔ le etsɔme ŋu fũu o. Yesu gblɔ be, “ŋkeke ɖe sia ɖe ƒe kuxiwo sɔ gbɔ nɛ.”—Mateo 6:34.
Le nyateƒe me la, ele vevie be mí katã míawɔ nu siwo ana míaƒe susu nadze akɔ anyi eye míaɖe dzi ɖi. Míate ŋu awɔ esia ne míeƒoa asa na nyatakaka siwo ana míatsi dzimaɖi, le kpɔɖeŋu me, numedzodzro siwo ku ɖe nukliaʋawɔnuwo ŋu, amewo ƒe susu le eŋu, kple nu si amewo le gbɔgblɔm be ava dzɔ le etsɔme. Asaƒoƒo na nu siawo mefia be míetsɔ ɖeke le nu siwo le edzi yim la me o. Ke boŋ, ɖeko míele agbagba dzem be míaganɔ nu siwo ŋu míate ŋu awɔ naneke le o, eye ɖewohĩ womava eme hã o la ŋu bum fũu o.
Tsɔ susu ɖo nu nyui siwo le dzɔdzɔm le wò agbe me ŋu ale be nàdzudzɔ nya vɔ̃wo ŋu bubu.
Biblia na etsɔmemɔkpɔkpɔ nyui aɖe si ŋu kakaɖedzi le la mí
Ne èsrɔ̃ nu geɖe tso Mawu ƒe ŋugbedodowo ŋu la, esia ana mɔkpɔkpɔ nasu asiwò, nàkpɔ dzidzɔ eye nàɖe dzi ɖi.
Ðe Biblia gblɔe ɖi be Armagedon anye nukliaʋa?
Ame aɖewo susuna be Armagedon anye nukliaʋa si adzɔ le xexea me katã. Eye wobua ale si gbegbe aʋa sia agblẽ nui ŋu.
Ke hã, Biblia zã nya “Armagedon” na aʋa si ayi edzi le “anyigba blibo la dzi fiawo,” alo amegbetɔwo ƒe dziɖuɖuwo, kple Mawu dome.a(Nyaɖeɖefia 16:14, 16) Armagedon-ʋa matsrɔ̃ ame ɖe sia ɖe ko le anyigba dzi, abe ale si wòanɔ ne woda nukliabɔmb ene o. Ke boŋ le Armagedon-ʋa me la, Mawu atsrɔ̃ ame vɔ̃ɖiwo ko, eye esia ana ŋutifafa kple dedienɔnɔ vavãtɔ naxɔ aƒe ɖe anyigba bliboa dzi.—Psalmo 37:9, 10; Yesaya 32:17, 18; Mateo 6:10.
Nu kae Biblia gblɔ be eyae aɖe aʋawɔwɔ ɖa?
Yehowab Mawu azã eƒe ŋusẽ atsɔ atsi dukɔwo ƒe aʋawɔwɔwo nu eye wòagblẽ woƒe aʋawɔnuwo dome. Awɔ esia to eƒe Fiaɖuƒe, si nye dziƒodziɖuɖu aɖe si ava xɔ ɖe amegbetɔ dziɖuɖuwo katã teƒe la dzi.—Daniel 2:44.
Mawu Fiaɖuƒea afia amewo ale si woanɔ anyi le ŋutifafa kple dziɖeɖi me. Esi wònye dziɖuɖu ɖeka koe aɖu anyigba bliboa dzi ta la, dukɔwo magatsi tre ɖe wo nɔewo ŋu azɔ o; amewo magasrɔ̃ ale si woawɔ aʋa gɔ̃ hã azɔ o! (Mika 4:1-3) Nu kae esia ahe vɛ? “Wo dometɔ ɖe sia ɖe abɔbɔ nɔ eƒe wainka kple eƒe gboti te bɔkɔɔ, eye ame aɖeke mado voɖi na wo o.”—Mika 4:4.
a Kpɔ nyati si nye “Nu Kae Nye Armagedon-ʋa La?”
b Mawu ƒe ŋkɔe nye Yehowa. (Psalmo 83:18) Kpɔ nyati si nye “Ame Kae Nye Yehowa?”